Дьаархаҥҥа Варвара Софроновна Николаеваны 90 сааһынан эҕэрдэлээтилэр

Ыам ыйын 22 к. улуус баһылыгын социальнай боппуруостарга солбуйааччыта  Анна Уларова Дьаархан нэһилиэгин бочуоттаах олохтооҕо, тыыл бэтэрээнэ Николаева Варвара Ильиничнаны 90 сааһын туолбутунан истиҥник эҕэрдэлээтэ. Анна Михайловна Варвара Ильиничнаҕа РФ Бэрэсидьиэнэ В.В.Путин В.В., СӨ Ил Дархана А.С.Николаев уонна улуус баһылыга А.М.Иннокентьев Эҕэрдэ суруктарын, нэһилиэк баһылыга Павел  Александров Эҕэрдэ суругу уонна бэлэх туттардылар.

Варвара Николаева 1932 с. ыам ыйын 22 к. Чаппанда Саалтаанытыгар холхуостаах дьиэ кэргэнигэр төрөөбүтэ. 1941 с. дьонун кытта Дьаархаҥҥа көһөн кэлбиттэрэ, ити сыл «Марха» холкуоска ыһыы үлэтигэр уонна оҕуруот аһын үүннэрэр биригээдэҕэ үлэтин саҕалаабыта. 1946 сылтан  холкуоска  тарбыйахтаах 15 ынаҕы тутан ыанньыксыттаан барбыта. Үлэтигэр үрдүк көрдөрүүлэрин иһин Варвара Ильинична 3 тарбыйах фондатынан  наҕараадаламмыта. 1957 с. «Ньурба» сопхуос тэриллиэҕиттэн, Чаппандатааҕы отделение Дьаарханнааҕы биригээдэтигэр ыанньыксытынан,  настаабынньыгынан уонна ферма сэбиэдиссэйинэн ситиһиилээхтик  үлэлээбитэ. Бочуоттаах сынньалаҥҥа тахсан баран,  Варвара Ильинична 10 сыл устата сопхуос Дьаарханнааҕы биригээдэтин Кыһыл муннугар повардаабыта.

Өр сыллаах үлэтин устатыгар Варвара Николаева производство бастыҥа  буолбута, элбэхтэ социалистическай куоталаһыы кыайыылааҕынан тахсыбыта. ССРС «Ийэ албан аата» 1, 2 уонна 3 истиэпэннээх уордьаннарынан, «1941-1945 сс. Аҕа дойду Улуу сэриитигэр килбиэннээх үлэтин иһин», «Үлэ бэтэрээнэ»,  Улуу Кыайыы үбүлүөйдээх мэтээллэринэн, ССРС «Ийэ буолуу» мэтээлин 1 истиэпэнинэн, «Коммунистическай үлэ ударнига», «Социалистическай куоталаһыы кыайыылааҕа», «СӨ тыатын хаһаайыстыбатын бэтэрээнэ»,  «Ньурба улууһун социальнай-экэнэмиичэскэй сайдыытыгар кылаатын иһин», «Ньурба» сопхуос бочуоттаах бэтэрээнэ» бэлиэлэринэн, баартыйа обкомун Грамоталарынан уонна  Дипломнарынан, «Дьаархан нэһилиэгин бочуоттаах олохтооҕо» званиенан наҕараадаламмыта. 

Варвара Ильинична Николаева 1952 с. 2 оҕолоох Софронов Василий Степановичка кэргэн тахсыбыта, кэргэнин кытта төрөтөн уонна иитэн 10 оҕону улаатыннарбыттара. Билигин Варвара Ильинична  32 сиэн тапталлаах эбэтэ уонна 60 хос сиэн хос эбэтэ буолар. Ытыктыыр киһибитигэр кытаанах доруобуйаны, өссө да уһуннук олороругар баҕарабыт!

***

Улуус дьаһалтатын пресс-сулууспата