Курс валют
$
77.73
0.99
85.74
0.23
Курс валют
Курс валют
$
77.73
0.99
85.74
0.23
Меню
Поиск по сайту

ДЬААҤЫЛАР ОТ ТИЭЙИИТИГЭР КӨМӨ ИҺИН МАХТАНАЛЛАР

14.02.2020 12:29 0
ДЬААҤЫЛАР ОТ ТИЭЙИИТИГЭР КӨМӨ ИҺИН МАХТАНАЛЛАР
Бу күннэргэ Дьааҥыга Таатта улууһун Кыйытыттан рулоннаах оттору тиэйэллэр. Бэтэринээринэй бэрэбиэркэтэ ааһан, хонтуруолунай ыйааһына ыытыллан бэлэмнэниллибит оттору туһааннаах сиригэр тиксэрэр үлэ-хамнас күөстүү бара турар.
Олохтоох Галина Стручкова – Табайаана кэпсииринэн, былырыын өрөспүүбүлүкэ үрдүнэн, чуолаан хоту улуустарга уот курааннар, эбии айылҕа баһаардара турбуттарын түмүгэр, Дьааҥыга  сорох нэһилиэктэр олоччу оттообокколор, кыстыкка бэлэмэ суох олорон хаалбыттара. Урукку сыллар усталарыгар быйаҥнаах күөх отунан дэлэччи анньан турбут ходуһаларбыт килэҥ иэннээх “мээчиктиир хонуу” курдук сараччы хатан баран, иччитэҕинэн көрөн сайылаатылар.
“Ким кыахтаах, баҕалаах, нэһилиэнньэ арыый да сэниэлээх өттө лаппа тэйиччи, көтөр аал хас да чаас көтөн тиийэр ырааҕар оттоотулар-мастаатылар. Онтон-мантан салҕанан, быйылгы кыстыгы инчэҕэй тирбэҕэ быстыбатынан, кимиэхэ эрэ кыһалҕа ордук кытаанахтык кыһарыйдар да, туораан эрэр курдукпут. Олунньу ыйбытыгар кыл мүччү үктэннибит ээ дэһэммит, ыарахан сүгэһэри санныбытыттан бырахпыт саҕа сананан олоробут.
Онтубут даҕаны ботуччу оруннаах. Ким үөрбэт, чэпчээбэт буолаахтыай, бу айылаах быстарыктарга кэм даҕаны өрөспүүбүлүкэбит дьаһалтата салҕаан, көмө илиитин утары уунан, аны сайын сыһыыбытыгар сылгыбыт кистиэҕэ, хонуубутугар хороҕор муостаахпыт маҥырыаҕа диэн үөрэрбит кэмнээх буоллаҕа. Үрүҥ аспыт дэлэйиэҕэ, үүппүт, сүөгэйбит астаныаҕа.
Бу күннэргэ тохсунньу уорааннаах тымныыларыттан, айана ырааҕыттан, суолун сылаатыттан саллан, самнан хаалбаккалар, эр дьонтон эрэ дьоһуннаахтара, ыраах уһук хоту сытар сир диэн уустугурдубаккалар Таатта улууһун Кыйы нэһилиэгин курдук тэйиччи сытар сиртэн алаас отун тиэйиитин саҕалааннар олус даҕаны абыраатылар. Бэтэринээринэй бэрэбиэркэтэ ааһан, хонтуруолунай ыйааһынын ыытаннар, бэлэмнэниллибит рулоннаах оттору туһааннаах сиригэр тиксэригэр үлэ-хамнас күөстүү бара турар. Сүрүнэ диэн, суһал көмөҕө наадыйар хоту дойдуга, урукку да өттүгэр от-мас тиийиммэт-түгэммэт кырыымчык дьылларыгар өрөспүүбүлүкэбит бары муннуктарыттан көмөлөһөн олорор киин улуустарга хотугулуу уруй-айхал, махтал тылларын этэбин“, – диэн олохтоох үөрэр.
***
“Олунньу ый саҥатыттан ынах төрүөҕэ номнуо саҕаланна. Билиҥҥи туругунан Сартаҥ нэһилиэгэр үс, Сыһыы Мэйиитин учаастагар биир төбө төрөөбүтэ биллэр. Сотору кэминэн аны уотурбабыт уонна эбиэспит эбии аһылык курдук бу күннэргэ кэлиэҕэ. Уотурбаны сылын ахсын унньуктаах уһун айаҥҥа соҕотоҕун (1 КамАЗ массыына) тиэйэр суоппарбытыгар Г.Г.Алексеевка махталбыт улахан. Сартаҥ нэһилиэгэр биэс массыына – 56 туонна от кэллэ. Аны сенаж эбии кэллэҕинэ бэрт буолуо этэ”, – диэн Галина Стручкова – Табайаана этэр.

***
“Дьааҥы аартыга” хаһыат

Оставить комментарий    

!