БИҺИГИ МОЛОТОВНАБЫТ…

Полина Молотовна тыа сиригэр күн сирин көрөн олоҕо тыа хаһаайыстыбатын кытары эҥэрдэһэн үлэтэ барыта бу салаа сайдыытыгар туһуламмыта. Ол курдук Полина Молотовна 1955 сыллаахха Чурапчы оройуонун Дьабыла нэһилиэгэр төрөөбүтэ. Ол кэмнээҕи ыччат сиэринэн 16 сааһыгар дойдутугар Ленин аатынан колхуоска ыанньыксыттыы киирэр. Онтон 1971 сыллаахха Чурапчыга интернат оскуолаҕа буфекка үлэлиир. Оччолорго колкуостарга, сопхуостарга үрдүк үөрэхтээх специалистарга наадыйыы улаата турар кэмэ этэ. Онон ыччат Дьокуускайга, киин куораттарга үрдүк үөрэх кыһаларыгар киирэн бүтэрэн дойдуларыгар төннөн кэлэн саҥа олоҕу тутууга эрчимнээхтик ылсыбыттара. Полина Молотовна 1975 сыллаахха Дьокуускайдааҕы государственнай университет тыа хаһаайыстыбатын факультетын зооинженерия отделениетыгар  үөрэххэ киирэн 1980 сыллаахха бүтэрэн үрдүк үөрэхтээх специалист буолан Бүлүү оройуонугар “Мастаах” сопхуос “Халбаакы” отделениетыгар зоотехнигынан кэлин кооператив директорын солбуйааччынан ананан үлэлээн барар. Манна кини 9 сыл үлэлиир. Онтон 1989 сылтан 1993 сылга диэри “Мастаах” сопхуоһугар оҥоһуллар бородууксуйа хаачыстыбатын, астааһынын, батарыытын специалиһынан үлэлиир. Норуот хонтуруолун бэрэссэдээтэлэ.

Полина Молотовна 1993 сылтан «Холбос» АОЗТ дириэктэрин солбуйааччынан, профком бэрэссэдээтэлинэн ананан үлэлиир. 2000 сылтан 2001 сылга диэри Дьокуускайга “Бүлүү” ҮХАПХ ААУо бэрэстэбиитэлистибэтин директора. Ити кэмҥэ уопуттаах специалист тыа хаһаайыстыбатын министиэристибэтин иһинэн тэриллибит тыа хаһаайыстыбатын бородууксуйатын уонна семеноводство хаачыстыбатын хонтуруоллуур инспекция специалиһынан онтон салайааччытынан ананар. Манна кини 2011 сылга диэри үлэлиир. Онтон 2012 сыллаахха Дьокуускай куорат тыатын хаһаайыстыбатын управлениетыгар салайааччынан үлэлээн барар. Бу кэмҥэ куорат тыатын хаһаайыстыбатын сайыннарыыга элбэх үлэ ыытыллар. Дьокуускайы тулалыыр тыа хаһаайыстыбатынан дьарыктанар хаһаайыстыбалар, тэрилтэлэр үлэлэрин сүрүннүүр, түмэр сыаллаах үлэлэр чопчуланан судаарыстыбаттан оҥоһуллар уонна куорат программаларынан көрүллэр өйөбүллэргэ кыттыы улаатан барар. Ити кэмнэргэ СӨ “2012-2016cc тыа хаһаайыстыбатын салаатын сайыннарыы, бородууксуйа, аһылык ырыынагын бэрээдэктээһин” судаарыстыбаннай “Дьокуускай куорат” куораттааҕы уокуругун агропояһын сайыннарыы” муниципальнай программалар олоххо киириилэрэ ситиһиилээхтик ыытыллыбыта.

Кэнники сылларга Полина Молотовна “Туймаада”Агрохолдинг АУо тыа хаһаайыстыбатын управленитетын салайааччытынан үлэлээбитэ. Кини бу үлэлиир кэмигэр уопуттаах үлэһит, билиилээх специалист быһыытынан эдэр специалистарга элбэх сүбэ-ама биэрэрэ, хаһан да ханнык да ыарахаттартан чаҕыйбакка ылсан иһэрэ барыбытыгар үтүө холобур буолара.

Уопсайа Полина Молотовна тыа хаһаайыстыбатын салаатыгар 38 сыл, ол иһиттэн 16 сыл Дьокуускай тыатын хаһаайыстыбатын управлениетыгар үлэлээбит.

Бу уһун сылларга үтүө суобастаах үлэтэ үрдүктүк сыаналанан Полина Молотовна “СӨ тыатын хаһаайыстыбатын үтүөлээх үлэһитэ”, “СӨ тыатын хаһаайыстыбатын туйгуна”, “Дьокуускай куорат иннигэр үтүөлэрин иһин” бэлиэлэринэн наҕараадаламмыта. Элбэх бочуотунай грамоталарынан бэлиэтэммитэ.

Биһиги ортобутуттан маннык үтүө киһи туораабыта олус хомолтолоох, биһиги куруутун суохтуохпут… Полина Молотовна Кардашевская – саха норуотун чаҕылхай кыыһын туһунан сырдык өйдөбүнньүк куруутун баар буолуо. Полина Молотовна чугас дьонугар, аймахтарыгар дириҥ кутурҕаммытын биллэрэбит…

***

“Туймаада” Агрохолдинг АУо коллектиба.

Сэтинньи 5 күнэ. 2021с.