Мин 1957 с. икки сыллаах сиэстэрэ курсун бүтэрэн баран Райздрав Гусев П.М. бирикээһинэн трахдиспансерга старшай сиэстэрэнэн үлэҕэ киирбитим. Врачпыт Середкина Галина Степановна этэ. Оччолорго трахоманы утары фельдшердэр Тимофеева Т.М., Птицына А.М., Щеклеина А.В. буоланнар наар тыаларынан командировкаҕа сылдьаллара. Галина Степановна араас операциялары оҥорор этэ. Манна Ньурбаҕа оччолорго Дьокуускайга кэлэр-барар улахан уустуктардааҕа. Старшай медсестра процедурнай да, операционнай да сиэстэрэ эбээһинэһин барытын толорор этэ. Галина Степановна глаукоманы, катарактаны, эчэйбит хараҕы ылааһын курдук уустук операциялары оҥортуура. Мин кинини кытта 12 сыл бииргэ үлэлээбитим. Үлэлиир сылларыгар трахома диэн ыарыыны Галина Степановна чахчы суох гынан барбыта. Онтон уонча сыл үлэлии сырыттахпына аны кожнай отделение аһыллыбыта, онно старшай сиэстэрэнэн бараҕын диэн Шадрин Ф.Е. бирикээһэ кэлбитэ. Кожнай отделение бырааһынан Трухонина Р.И. этэ, субу бириэмэҕэ араас венерическэй ыарыылар ол иһигэр сифилис ыарыы тарҕаммыта. Роза Ивановналыын күнүстэри-түүннэри, милицияны илдьэ баран арыгыһыттар мунньустар сирдэринэн кэрийэн наадалаах дьоннорбутун булаттыыр этибит. Оччолорго Трухонина Р.И. үлэ бөҕөнү ыытар этэ, лекция мэлдьи ааҕара, онон сотору кэминэн сифилис намыраабыта.
1978 сыллаахха Елисеев В.В. бирикээһинэн оройуон балыыһатын үрдүнэн кылаабынай сиэстэрэ буолбутум. Оччолорго үлэлээбит отделениелар старшай сиэстэрэлэрин көмөлөрүнэн араас өрүттээх үлэлэри син ыытар этибит. Балыыһа сиэстэринскэй сэбиэтэ ыйга иккитэ мунньахтыыр этэ.
Онно отделение старшай сиэстэрэлэрэ куруук отчуот оҥороллоро, былаан быһыытынан конференциялар кэмигэр буолар этилэр. Санитарнай сырдатар үлэлэр отчуоттара мэлдьи истиллэр буолара. Миигин кытта үлэлээбит отделение старшай сиэстэрэлэрэ Габышева Тамара Георгиевна, Васильева Татьяна Николаевна, Шушкова Любовь Ивановна, Николаева Мария Прокопьевна бары даҕаны кыһаллымтыа-толорумтуо, үтүө суобастаах сиэстэринскэй сэбиэт чилиэннэрэ этилэр. Үлэлээбит кэмнэрбэрбэр элбэх кылаабынай быраастары кытта алтыһан аастым, ол курдук Гусев П.К Стародворскай В.В., Егоров Я.П Шадрин Ф.Е., Елисеев В.В., Егорова Е.Г., Григорьев Н.Н., Афанасьев В.Т. Копылова Л.Н. буолаллар.
Сити сыллар кэмнэригэр 3 төгүл Доруобуйа харыстабылы министерствотын Бочуотуна грамотатын ылбытым. 1974 сыллаахха «Соц. куоталаһыы туйгуна» диэн РСФСР значогунан наҕараадаламмытым. 1996 с. «Саха Республикатын доруобуйатын харыстабылын туйгуна» диэн ааты иҥэрбиттэрэ. Биллэн турар, үлэ бэтэрээнээбин, үлэбинэн үрдүк категориялаахпын. Билигин даҕаны күүһүм кыайарынан киин балыыһа психоневрологическай отделениетын старшай сиэстэрэтинэн үлэлиибин.
Бу Аан дойду медицинскэй сиэстэрэлэрин күнүнэн бары кэллиэгэлэрбин ис сүрэхпиттэн эҕэрдэлиибин. Олоххутугар дьолу соргуну, үлэҕитигэр үрдүк ситиһиилэри баҕарабын, бука бары доруобай буолуҥ!
***
Евдокия Михайловна СКРЯБИНА,
СӨ Доруобуйатын харыстабылын туйгуна, үлэ бэтэрээнэ, үрдүк категориялаах сиэстэрэ,
2003 сыл
Оставить комментарий