Хайдах да кыыһырбыппыт иһин, ити сыһыарыылар нөҥүө эрийэн кэпсэтэр, биидьийэлэһэр аны табыллыа суоҕа. Тахсарын тахсыа эрээри, быстыаҕа, саҥата сүтүөҕэ, “харыаҕа”. Ити – Роскомнадзор масыанньыктартан, араас экстремистэртэн быыһыыр дьайыыта. Бары билэ олорорбут курдук, кэлиҥҥи кэмҥэ бассаап уонна телеграм сыһыарыылар нэһилиэнньэттэн харчыны албыннаан ыларга, араас дьайыыларга кытыннарарга олус табыгастаах буоллулар. Хайдах да сэрэтэр, өйдөтөр үлэни ыыппыт үрдүнэн икки өттүттэн хамсааһын тохтообот. Оччоҕуна хайдах буолабыт? Төһө да хааччахтааһын киирбитин үрдүнэн, ити сыһыарыы нөҥүө суруйсар, иһитиннэриилэри ыытар кыаллыаҕа. Ол эбэтэр үлэҕэ-хамнаска, күннээҕи алтыһыыга мэһэй суох буолар.
“Цифровая Россия” бырайыак федеральнай координатора, Судаарыстыбаннай Дуума Иһитиннэрэр бэлиитикэҕэ, технологияҕа уонна сибээскэ кэмитиэтин чилиэнэ Антон Немкин итинник быһаарыныы нэһилиэнньэни төлөпүөнүнэн уонна интэриниэтинэн тахсар масыанньыктартан быыһыыр үлэ көрүҥэ буоларын санатар. “Этиллэр мессенджердэр кэккэ сылларга сокуону тутуспакка кэллилэр: быраабы утарар матырыйааллары сотторботтор, персональнай дааннайы харыстааһын ирдэбиллэрин толорботтор. Чуолаан ити сыһыарыылар нөҥүө аферистар күннэтэ Арассыыйа гражданнарын араас көрүҥүнэн албынныыллар”.
Дуума Иһитиннэрэр бэлиитикэҕэ, технологияҕа уонна сибээскэ кэмитиэтин салайааччыта Сергей Боярскай итинник быһаарыныы төлөпүөнүнэн үлэлиир масыанньыктары утары үлэҕэ, нэһилиэнньэни террористартан көмүскээһиҥҥэ сөптөөх хардыы буоларын бигэргэтэр. Кини этэринэн, Арассыыйа гражданнарын 27 бырыһыана төлөпүөн масыанньыктарыгар түбэһэр. “Ити албыҥҥа бэйэм, доҕотторум, аймахтарым, кэллиэгэлэрим уонна үлэһиттэрим түбэһэн турардаахпыт. Кинилэртэн сорохторо кирэдьииккэ киирэн, уурунуу харчыларыттан мэлийэн, кырата суох суумаҕа албыннаттылар. Ол барыта бассаап уонна телеграм сыһыарыыларынан оҥоһуллубута биллэр”, – диэн эбэн этэр.
Арассыыйа Сыыппараҕа министиэристибэтигэр кибермасыанньыктары кытта үлэ ыытыллар. “Антифрод” диэн систиэмэҕэ бары оператордар холбонон, араас нүөмэрдэртэн эрийии 90 бырыһыана кэмигэр тохтотуллар.
Телеграм сыһыарыыга масыанньыктааһын араас көрүҥүн утары ускуустубаннай интеллект таһымыгар үлэ ыытыллар. Чуолаан бу сыһыарыыга килийиэн ким эрийэрин билэр, блоктуур анал өҥөлөрө туруорулуннулар.
Саамай туһанар сыһыарыыбыт хааччахтаммыт буоллаҕына, хайдах кэпсэтэбит? Урукку курдук дьоммутун кытта тутан олорон сэһэргэһэрбит, араас сири-дойдуну көрөрбүт бүтэр дуо? Дьэ, онуоха Вконтакте сыһыарыы МАХ диэн табыгастаах мессенджери таһаарда. Балаҕан ыйыгар сүрэхтэниэн иннинэ кэпсэтэр кыаҕы таһынан күннээҕигэ туһаныллар функцияларын таһаарда. Бэс ыйын саҥата туһанааччы ахсаана хайыы-үйэ мөлүйүөнү куоһарбыта. Сурутааччы ахсаана күнтэн-күн элбиир, кэккэтэ хаҥыыр. Онон саҥа кэм тосхойор кыаҕын туһан, аан дойдуну кытта ситимҥин быһыма.
***
Aartyk.ru
Оставить комментарий