Балаҕан ыйыттан туох уларыйарый?

Балаҕан ыйын 1 күнүттэн биһиги олохпутугар туох уларыйыылар күүтэллэрин сааһылаан кэпсиибит.

БИЭНСИЙЭЛЭЭХТЭРГЭ

Сорох дьон икки биэнсийэни ылыахтара

1. Байыаннайдар уонна быраабы араҥаччылыыр уорганнар үлэһиттэрэ биэнсийэҕэ тахсан баран гражданскай тэрилтэҕэ салгыы үлэлээбит буоллахтарына.
2. Сэриигэ сылдьан эмсэҕэлээн инбэлиит буолбут дьон.
3. Өлбүт байыаннайдар дьиэ кэргэттэрэ.

Иккис биэнсийэни ыларга үс ирдэбил баар: эр дьон 64 саастарын, дьахталлар 59 саастарын туолуохтаахтар; 15 сылтан итэҕэһэ суох гражданскай ыстаастаах буолуохтаахтар уонна 30 биэнсийэ баалын мунньуохтаахтар.

80 саастаахтар биэнсийэ икки төгүл улаатыа

Атырдьах ыйыгар 80 сааһын туолбут уонна I группалаах инбэлиит буолбут дьоҥҥо биэнсийэҕэ эбии төлөбүрдэрэ икки төгүл улаатар — 9584,69 солкуобайтан 19 169,38 солкуобайга диэри. Маныаха туох да сайаапка суруйар наадата суох, харчы аптамаатынан ааҕыллан түһүөҕэ.

ҮЛЭҺИТТЭРГЭ

Оҕолоох ийэлэргэ «тургутар болдьох» бобуллар

Үлэҕэ саҥа киирэр 3 сааһыгар диэри оҕолоох ийэлэргэ балаҕан ыйын 1 күнүттэн «тургутар болдьоҕу»  туруорар бобуллар. Бу быраабыла ийэтэ суох оҕону иитэр аҕаларга эбэтэр аймахтарыгар эмиэ сыһыаннаах. Бу иннинэ маннык чэпчэтии 1,5 сааһыгар диэри оҕолоохторго эрэ баара.

Билигин нуорма таһынан үлэлээһин сылга 120 чааһынан хааччахтанар буоллаҕына, саҥа сокуонунан (кэлэктиибинэй дуогабарга баар буоллаҕына) бу лимиит 240 чааска диэри улаатыан сөп. Оттон төлөбүрүн бэрээдэгэ уруккутун курдук хаалар: бастакы икки чаас — 1,5 төгүл үрдэтиллэн, онтон салгыы икки төгүл үрдэтиллэн төлөнөр.

ХАРЧЫГА УЛАРЫЙЫЫ

Болдьоҕо ааспыт табаары атыылыыр иһин — ыстараап

Маҕаһыыннарга маркировкалаах, болдьоҕо ааспыт табаары атыылааһын иһин ыстараап олохтонор. Ыстараап аптамаатынан суруллар: чааһынай урбаанньыттарга  — 10 000 солк., юридическай сирэйдэргэ — 20 000 солк.

Сыыппара солкуобайа

Дойду улахан бааннара бэйэлэрин килийиэннэрин сыыппара солкуобайын туһанар кыаҕы биэриэхтээхтэр. Дьон ити саҥа харчынан счет арыйыахтарын, бэйэ-бэйэлэригэр харчы ыытыһан уонна атыылаһыахтарын сөп. Улахан маҕаһыыннар эмиэ сыыппара солкуобайынан төлөбүрү тутан саҕалыахтаахтар.

ОҔОЛООХ ЫАЛЛАРГА

Ипотекаҕа 18 ыйдаах «каникул»

Оҕолоох ыалларга ипотекаларын төлүүрүн быстах кэмҥэ тохтотор саҥа быраабыла киирэр. Иккис эбэтэр онтон элбэх оҕо төрөөтөҕүнэ (эбэтэр оҕону иитэ ыллахха), ипотеканы тохтотор кэм болдьоҕо 6 ыйтан 18 ыйга диэри уһуур. Бу кэмҥэ ыал төлөбүрүн тохтотуон эбэтэр сууманы кыччатыан сөп, маныаха туох да ыстараап эбиллибэт уонна кирэдьиит устуоруйата буорту буолбат. Саҥа сокуон урукку дуогабардарга эмиэ сыһыаннаах.