Бүлүүгэ инникитин үүт туттарааччы элбиэ диэн эрэллээхтэр

“Улуус үрдүнэн быһа холоон 10 500-чэ ынах сүөһү, онтон ыанар ынаҕа – 4 000 кэриҥэ төбө. Сыспай сиэллээх ахсаана – 7 200 төбө, биэтэ – 4961. Төбө ахсаана улууска тэрээһиннээх хаһаайыстыбаҕа 54% тэҥнэһэр. Быйыл эбии 69 бэйэ дьарыктанаах урбаанньыт эбиллэн, көрдөрүү өссө улаатара сабаҕаланар. Улуус тыа хаһаайыстыбатынан дьарыктанар буолан, 100-тэн элбэх ыанньыктаах 7 кэпэрэтиип, биир «Ампардаах» ХЭТ, 13 улахан бааһынай хаһаайыстыба  баар. Ону таһынан, 107 бэйэ дьарыктаах уонна 14 нэһилиэктээҕи кэпэрэтиип үлэлиир”, – диэн кэпсээтэ.

Былырыын уопсайа тыа хаһаайыстыбатын министиэристибэтин бүддьүөтүттэн 390 млн солкуобай субвенция кэлбитин туһунан Павел Иннокентьев иһитиннэрдэ. Үүккэ 250 млн солк бэриллибитэ.

“Быйыл саҥа мэхэнньиисим киирэн, 450 млн солкуобай кэриҥэ кэлэр. Бэйэ боломуочуйата бэриллэн, манна былырыыҥҥыттан улахан мунньахтар, кэпсэтиилэр барбыттара. Онон улуус баһылыгын дьаһалынан, инники күөҥҥэ үүт соҕотуопкатыгар көрдүбүт. Быйылгы үүт субсидията 316 млн солк тэҥнэстэ, субсидя кээмэйэ 75 солк буолла. Ол курдук, 10 солк улаатыннардыбыт. Оҥорон таһаарааччылар 15 солк биэрэн, үүт тутуута Бүлүү улууһугар 90 солкуобайга биир лиитирэтэ таҕыста. Чааһынай дьоҥҥо төбө харчыта 31 тыһыынча солкуобайынан быһылынна“, – диэн Павел Павлович эттэ.

Улуус үрдүнэн 4 оҥорон таһаарааччы үлэлиир. Быйылгы былаан 4225 тонна буолан, сыал-сорук — бородууксуйаны элбэтиигэ үлэ куускэ барыахтааҕын тоһоҕолоон бэлиэтээтэ. Инньэ гынан, инникитин үүт туттарааччы элбиэ диэн эрэллээхтэр.

Павел Иннокентьев үлэтигэр көрсөр кыһалҕаларын туһунан кэпсээтэ:

– Саҥа тыа хааьаайыстыбатын сокуонугар уопсай бүддьүөт сокуона уларыйан, санардыы электроннай бүддьүөккэ киириигэ ыарахаттары көрүстүбүт. Нормативнай правовой докумуоннары оҥорууга уопсай холобур (“образец”) суоҕа дьыаланы атахтыыр, бытаардар. Үчүгэйдик быһааран үөрэтэр куурус, сэминээр баара буоллар. Ону таһынан, ыстаапканы (ставканы) бигэргэтиигэ биир чуолкай эппиэт суох буолан, улуус бэйэтин эппиэтинэһигэр уларыйыылары ыллынна. Инньэ гынан,  мин билэрбинэн, 34 улуустан 5 эрэ уларытыы киллэрдэ, ол иһигэр Бүлүү улууһа. Сокуон саҥа киирэн, дьэ үлэлээн эрэр. Ол  курдук, 15 ис боломуочуйа тыа хаһаайыстыбатын эбийиэктэрин тутуутугар киирдэ. Улууска быйыл тутууга 29 млн 600 тыһ. солкуобай кэлэр, онно биһиги хас биирдии тутууну уопсай сууманан таһаардыбыт (сайылык, сылгы баазата, хотон уо.д.а.) Быйылгы сылга алта эбийиэккэ тутуу барыахтаах, манна кыттар хаһаайыстыбалар 30% бэйэлэриттэн угаллар.

Санатан эттэххэ, Ил Түмэн спикерэ Алексей Еремеев салайааччылаах норуот дьокутааттарын оробуочай бөлөҕө бу күннэргэ Бүлүү бөлөх улуустарыгар үлэлиир.   

***
Ил Түмэн пресс-сулууспата