Бүгүн — сааскы Ньукуолун уонна Саха сиригэр Сайылык күнэ

Кыһарҕаннаах тымныы кыһыммыт ааһан, күүтүүлээх сайыммыт барахсан тиийэн кэллэ.

Урукку дьылларга алаастарынан быданан олорбут, хороҕор муостааҕы, сыспай сиэллээҕи иитэн олорор өбүгэлэрбит от-мас тыллар кэмигэр сүөһүлэрин илдьэ кыстыктарыттан сайылыкка көһөн тахсаллара.

Ыам ыйын 22 күнүн кинилэр дьыл бүтэн, саҥа сыл саҕаланар кэмэ диэн ааҕаллара. Нууччалар кэлэн, православие итэҕэлин киллэриэхтэриттэн, саха Саҥа сыла Ньукуола таҥара күнүн кытта алтыспыта. Бу күн дьон-сэргэ сайылыктарыгар тахсан алаадьылыыллара, кус буһаран сииллэрэ, сири-дойдуну аһаталлара, үрдүкү айыылартан уйгуну-быйаҥы, этэҥҥэ буолууну көрдөһөн сиэри-туому толороллоро.

СӨ Ил Дархана Айсен Николаев 2018 сыл сэтинньи 6 күнүнээҕи Ыйааҕар сөп түбэһиннэрэн, Саха сиригэр ыам ыйын 22 күнүгэр Сайылык күнэ бэлиэтэммитэ быйыл сэттис сыла. Төһө даҕаны билигин аҕыйах тэрээһиннээх хаһаайыстыбалар сайылыкка сүөһүлэрин таһаарбыттарын иһин, бу бэлиэ күн уруккуттан тиийэн кэлбит үтүө үгэһи сөргүтэр уонна сүөһү-ас тутан үлэлии-хамсыы сылдьар тыа үлэһит дьонун өрө тутар аналлаах.

Улууска тэриллиилээх хаһаайыстыбалар бу күннэргэ сүөһүлэрин сайылыкка көһөрөр идэлээхтэр. Быйыл эмиэ улуус үрдүнэн 9 нэһилиэккэ 14 сайылык үлэлиэҕэ. Онно барыта 2340 ынах сүөһү, ол иһигэр 1038 ыанар ынах сайылыахтара. Бастакынан «Ньурба-Агро МТС» ынахтарын ыам ыйын 16 күнүгэр Бэс Атах сайылыгар көһөрдө.

Оттон «Күндээдэ» АУо 277 субай сүөһүтүн Дьаархан диэн сиргэ таһааран, хаайан аһата тураллар. Тэрилтэ генеральнай дириэктэрэ Сергей Захаров кыстык этэҥҥэ түмүктэнэн эрэрин иһитиннэрдэ.
«Бу нэдиэлэ бүтэһигэр Кириэс уонна Араҥастаах диэн сайылыктарбытыгар 231 ынаҕы таһаарыахпыт, — диир кини. — Ону таһынан Хаар диэн сиргэ ньирэйдэрбитин таһааран сайылатыахпыт.

Сайылыктарга 8 ыанньыксыт, 2 бостуук уонна 2 ньирэй көрөөччү үлэлиэхтэрэ. Настаабынньык ыанньыксыттарынан Ирина Нахова уонна Георгий Матвеев буолаллар. Билиҥҥитэ күҥҥэ 1 туоннаҕа тиийбэт үүт ыанар. Сайылыкка таҕыстахтарына уонна от тэптэҕинэ ынахтарбыт үүттэрэ да элбиэҕэ. Сайылыктар үлэлэрин биригэдьиир Константин Герасимов уонна зоотехник Алексей Аллахинов көрөн-истэн сүрүннүөхтэрэ.

***

Геннадий АНТОНОВ

Сүрүн хаартыскаҕа: Бэс Атах сайылыгар. 2024 с.