Бүгүн Георгий Бессонов төрөөбүтэ 110 сыла

Убаастабыллаах Саха Өрөспүүбүлүкэтин олохтоохторо, учууталлар, үөрэнээччилэр уонна педагогическай үлэ бэтэрээннэрэ!

Бүгүн Саха сиригэр кирбии күн бэлиэтэнэр – уһулуччулаах педагог, уопсастыбаннай диэйэтэл, Социалистическай Үлэ Дьоруойа Георгий Евдокимович Бессонов төрөөбүтэ 110 сыла.

Георгий Евдокимович 1915 сыллаахха атырдьах ыйын 18 күнүгэр Үөһээ Бүлүү сэлиэнньэтигэр төрөөбүтэ. Үөрэх эйгэтигэр анабылын булан, олоҕун барытын үүнэр көлүөнэни иитиигэ анаабыта. Учууталынан, оскуола дириэктэринэн уонна оҕо дьиэтин салайааччытынан үлэлээн өрөспүүбүлүкэҕэ үөрэҕирии систиэмэтин сайыннарыыга сүҥкэн кылаатын киллэрбитэ.

Г.Е. Бессонов саамай сүрүн ситиһиилэриттэн биирдэстэрэ — Саха Өрөспүүбүлүкэтигэр аан маҥнайгынан оскуолатааҕы тыыннаах муннугу, ону кытта кыраайы үөрэтэр оскуолатааҕы мусуойу тэрийии буолар.

Бессонов салалтатынан декоративнай сад үүннэриитин олуктара ууруллубуттара. Ол курдук, 25 гаа иэннээх бастакы ботаническай сад тэриллэн, Саха сиринээҕи тыа хаһаайыстыбата оҥорон таһаарыытын салгыы научнайдык чинчийэргэ уонна сайыннарарга төрүөт буолбута.

Уһун сыралаах үлэтин иһин Георгий Евдокимович хаста даҕаны судаарыстыбаннай наҕараадалары ылар чиэскэ тиксибитэ, ол иһигэр Ленин икки уордьана, Үлэ Кыһыл Знамятын уордьана, К.Д. Ушинскай мэтээлэ, «Ыччат настаабынньыга» уонна «ССӨС үөрэҕириитин туйгуна» бочуоттаах бэлиэлэр. ССӨС Үрдүкү Сэбиэтин Президиумун 1968 сыл от ыйын 1 күнүнээҕи Ыйааҕынан Социалистическай Үлэ Дьоруойун үрдүк аата киниэхэ иҥэриллибитэ.

Бессонов үгүс сыллаах ыстаастаах учуутал быһыытынан оҕо уйулҕатын дириҥник өйдүүрүнэн, үөрэнээччилэри ытыктыырынан уратыланара. Кини үрдүк таһымнаах учууталлары, быраастары, инженердэри, култуура диэйэтэллэрин иитэн таһаарбыта. Георгий Евдокимович уопута, үтүө майгыта, настаабынньык быһыытынан талаана үгүс бүтэрээччи ситиһиилээх исписэлиис буоларыгар төһүү буолбута.

Кини холобура үгүс педагогтары уонна түмэл үлэһиттэрин угуйар. Билигин Бессонов аатын Тойбохой нэһилиэгэр баар кыраайы үөрэтэр историческай мусуой комплекса сүгэр. Онно айылҕаны харыстыыр култуураны иитиигэ, төрөөбүт сир үгэстэрин үйэтитиигэ туһуламмыт тэрээһиннэр ыытыллаллар. Билигин Бессоновка элбэх өйдөбүнньүк тэрээһиннэр ыытыллаллар. Оскуолаларга, түмэллэргэ тэрээһиннэр, быыстапка бырайыактара, научнай кэмпириэнсийэлэр, бэстибээллэр уонна айар күрэхтэһиилэр өрүү ыытыллаллар.

Кэргэнин Ксения Алексеевна Константинованы кытта дьоһуннаах олоҕу олорбута. Кинилэр эйэлээх сыһыаннаһыылара, үтүө майгылара үгүс ыалга холобур буолар.

Георгий Евдокимович Бессонов үлэтэ, хаалларбыт нэһилиэстибэтэ бүтүн дойдубут бас билиитэ, киэн туттуута буолар.

Биир дойдулаахпыт үбүлүөйэ — бүтүн өрөспүүбүлүкэҕэ улахан суолталаах түгэн. Сахабыт сирин бары олохтоохторун бу бэлиэ күнүнэн СӨ Ил Түмэнин аатыттан эҕэрдэлиибит! Георгий Бессонов туһунан сырдык өйдөбүл биһиги сүрэхпитигэр үйэлэргэ хааллын!

***

Ил Түмэн пресс-сулууспата