Бүгүн Алексей Еремеев салайааччылаах Ил Түмэн оробуочай бөлөҕө Аммаҕа үлэтин саҕалаата
Бугун Ил Тумэн Судаарыстыбаннай Мунньаҕын спикера Алексей Еремеев, сис кэмитиэттэр бэрэссэдээтэллэрэ Александр Атласов, Владимир Прокопьев, Александр Корякин кыттыылаах оробуочай бөлөҕө Амма улууһуттан үлэлэрин саҕалаатыгар.
Дьокутааттар нэһилиэнньэни кытта көрсүһүүлэрэ төгүрүк остуол тула олорон 2025 сылтан аһы-үөлү оҥоруу сүрүн хайысхаларын улуустар бэйэлэрэ быһааралларыгар боломуочуйа бэриллибитинэн киириэхтээх мэхэниисимнэр тустарынан саҥа сокуон олоххо киириитин тула кэпсэтииттэн саҕаланна.
Нэһилиэк баһылыктара, тыа хаһаайыстыбатын тэрээһиннээх уонна бааһынай хаһаайыстыбаларын салайааччылара, бу салаа исписэлиистэрэ атах тэпсэн олорон дьокутааттарга долгутар ыйытыыларын биэрдилэр, эппиэттэри иһиттилэр. Олохтоохтор оттуур ходуһалары туһаҕа таһаарыыга сыһыаннаах сокуон наадатын туһунан, нолуок ирдэбиллэрин тула бэйэлэрин санааларын этиннилэр. Маны таһынан, үүккэ көрүллэр үп-харчы үрдүүрүгэр, тыа сиригэр исписэлиистэри олохсутууну тула, о.д.а. тыа сирин тутаах боппуруостарыгар болҕомторун туһаайдылар. Тэриллиилээх хаһаайыстыбалар салайааччылара сэлээркэ ыараан, улэҕэ-хамнаска охсорун этэн туран, көрүллэр өйөбүл кээмэйэ үрдүүрүгэр баҕа санааларын тиэртилэр.
Ону сэргэ, эдэр дьону тыа сиригэр, үлэҕэ-хамнаска чугаһатар туһугар сөптөөх усулуобуйаны тэрийэргэ тыа сиригэр улахан болҕомто ууруллуон наада диэн үгүс киһи ыйда. Аммалар онно аналлаах, тыа сирин өрө тардарга бары хайысхалары туһанан сонун мэхэниисимнэри тобулуохха диэн дьокутааттары ыҥырдылар.
Салгыы дьокутааттар «Ыраас уу» федеральнай программа өйөбүлүнэн былырыын улэҕэ киирбит ууну ыраастыыр ыстаансыйа улэтин билистилэр. Ыстаансыйа сууккаҕа 1500 куб ууну ыраастыыр кыамталаах. Манн барыта 16 киһи улэлиир. Эбийиэк иккис түһүмэҕэр туһанааччыларга дьиэлэригэр диэри ситими тардар сорук турар.
Эбиэттэн киэһээ дьокутааттар тыа хаһаайыстыбатын тэрилтэлэринэн сырыттылар, Абаҕаҕа, Сулҕаччыга тахсан сылгы баасатыгар сылдьан сылгыһыттары, сүөһү көрөөччүлэри кытта көрсөн кэпсэтиэхтэрэ. Онтон киэһээ Чурапчыга айанныахтара.
***
Ил Түмэн пресс-сулууспата
Фото Василия Кононова
(Информация эбиллэр)
Оставить комментарий