— Оҕо эрдэхпиттэн аан бастаан аҕам соҕурууттан аҕалбыт быыкаайык статуэткатыттан саҕалаан мунньан барбытым, — диэн этэр Розалия Максимовна. — Саамай сөбүлээн араас норуоттар куукулаларын мунньабын. Дьүөгэлэрим, аймахтарым ханна сылдьыбыт сирдэриттэн мунньарбын билэр буолан бары куукула кэһиилээх кэлэллэр. Бэйэм эмиэ хотунан-соҕуруунан, тас дойдуларга сылдьан анаан-минээн атыылаһар этим.
Коллекциябар бу аҥардас куукулалары мунньубут 25 сылым устата саха кыргыттарыттан саҕалаан эбээн, нуучча, бурят, татар, киргиз, казах, узбек, таджик, Кытай, Индия, Монголия, Болгария, Румыния, Азия уо.д.а. дойдулар куукулалара баар. Дубайтан, Доминикантан кытта куукула аҕалан бэлэхтээн үөрдүбүттэрэ.
Розалия Максимовна аата ахсаана биллибэт коллекцията дьиэтигэр олус кичэллээхтик ууруллан турар. Сылдьыбыт эрэ бары сөҕө-махтайа көрөр. Биирдэ эмит түгэн көһүннэҕинэ бу ураты коллекцията дьон дьүүлүгэр тахсар. Ньурба коллекционердарын быыстапкатыгар мэлдьи көхтөөхтүк кыттар.
41-с сылын оҕо иитиитигэр таһаарыылаахтык үлэлиир Р.М.Сун тапталлаах «Туллукчаан» уһуйаанын 35 сыллаах үбүлүөйүн тэрээһинигэр куукулаларын илдьэн көрдөрөн кэлбит дьон интэриэһин тарпыта.
Бүгүн, норуот сомоҕолоһуутун күнүгэр сөп түбэһиннэрэн, эһиэхэ Ньурбабыт биир ураты дьарыктаах Далбар хотунун туһунан кылгастык билиһиннэрдим.
***
Лариса Дорофеева, «Огни Нюрбы» хаhыаттан
Оставить комментарий