Андрей Находкин РФ Тыа хаһаайыстыбатын үлэһиттэрин күнүнэн эҕэрдэлиир

Убаастабыллаах тыа хаһаайыстыбатын салаатын үлэһиттэрэ, бэтэрээннэрэ!

Тыа хаһаайыстыбатын бары салааларыгар үлэлэһэр олохтоох табаары оҥорон таһаарааччылары, туһааннаах тэрилтэ салайааччыларын, бочуоттаах сынньалаҥҥа олорор күндү үлэ ветераннарын  тыа хаһаайыстыбатын үлэһиттэрин бырааһынньыгынан итиитик-истиҥник Саха Өрөспүүбүлүкэтин Судаарыстыбаннай Мунньаҕын  Ил Түмэн тыа сиригэр уонна аграрнай политикаҕа сис кэмитиэтин аатыттан эҕэрдэлиибин!

Биһиги өрөспүүбүлүкэбит, улуустар салалталара, нэһилиэктэр салайааччылара тыа хаһаайыстыбатын сайдыытыгар туһуламмыт  тус сыаллаах государственнай программаны олоххо киллэриигэ  ыллыктаахтык ылсан, аныгылыы ирдэбиллэри тутуһан, саҥа технологиялары күүскэ киллэрэн, эдэр эрчимнээх специалистары түмэ тардан тыа сирин дьоно уйгу-быйаҥ  олохтоноругар үлэлэһэ сылдьаҕыт.

Бэйэбит иитэн-харайан, көрөн-истэн таһаарбыт бородууксуйабыт хас биирдии ыал остуолугар баар буоларыгар, доруобай, чөл туруктаах, баай эйгэлээх ыччат иитиллэн тахсарыгар кыһамньыгытын уураҕыт.

Түмсүүлээх буолуу, биир санааланыы барыбытын куустун, тыа сирэ, тыа хаһаайыстыбата иннин диэки барарыгар, сайдарыгар – биир санаалаахтар түмүстэхпитинэ, күүспүтүн холбоотохпутуна эрэ туох барыта кыаллыа!

Барыгытыгар байылыат олоҕу баҕарабын, өбүгэбит дьарыгынан дьарыктанар идэбит салгыы  сүппэттии тэнийдин,  уйгу-быйаҥ буолуохтун! Түбүктээх улэҕит үтүөтэ түмүктээх буолуохтун, мэлдьи ситиһии эрэ эҥэрдэстин, куруук дьол-соргу эрэ тосхойдун!

***

Эҕэрдэни кытта,  Саха Өрөспүүбүлүкэтин Судаарыстыбаннай мунньаҕын (Ил-Түмэн) депутата А.М. Находкин