Курс валют
$
63.95
0.06
71.13
0.23
Курс валют
Курс валют
$
63.95
0.06
71.13
0.23
Меню
Поиск по сайту

Алексей Иннокентьев: «Чуукаартан уонна Хорулаттан эвакуация диэн сымыйа дойҕох»

24.07.2019 15:24 0
Алексей Иннокентьев: «Чуукаартан уонна Хорулаттан эвакуация диэн сымыйа дойҕох»

Ньурба улууһугар бүгүҥҥү күннээҕи туругунан 3 нэһилиэк: Хорула, Чуукаар уонна Күндээдэ территорияларыгар регистрацияламмыт 3 баһаар буола турар. Билиҥҥи информациянан нэһилиэнньэлээх пууннарга куттал суох. Федеральнай уонна өрөспүүбүлүкэтээҕи баһаары утары охсуһар сулууспалар кэлэн үлэлии сылдьаллар. Нэһилиэнньэ өттүттэн эмиэ добровольнай баһаарынай хамаандалар тахсан үлэлии сылдьаллар. Миэстэтигэр нэһилиэктэр баһылыктара бааллар. Улууска ыксаллаах быһыыга-майгыга хамыыһыйа үлэлии олорор.

Ньурба улууһун  баһылыга, Алексей Иннокентьев ойуур баhаардарын балаhыанньатын билиhиннэрдэ:

— Ааспыт нэдиэлэҕэ баһаардар элбээн, от ыйын 12 күнүгэр улуус сиригэр-уотугар баһаары утары ураты эрэсиими биллэрбиппит. Дьон-сэргэ мэнээк тыаҕа тахсан кутаа оттоллорун, улахан маассабай тыаҕа тахсыылары бобон турабыт. Быйыл халлааммыт туруга, көрөргүт курдук, куйаас, быстах этиҥнээх ардахтар түһэн ааһаллар. Наһаа элбэх термоточка баар.

Быйыл федеральнай уонна өрөспүүбүлүкэтээҕи сулууспалар күүскэ үлэлииллэрин бэлиэтиэхпин баҕарабын. Тиэхиньикэнэн эмиэ күүс-көмө баар. Иллэрээ күн буолбут улуус Сүбэтин дьокутааттарын сиэссийэтинэн эбии 1 мөл. солк. үбү аварийнай-чөлүгэр түһэрэр үлэлэргэ көрдүбүт. Улахан мобилизационнай үлэлэр барар буоллахтарына, ГСМ, сапчаас уонна ас-үөл ылыытыгар туттуллуоҕа.

Бэҕэһээ Ватсап ситиминэн ааттара биллибэт дьон СӨ Ил Дарханыгар аадырыстаммыт суругу ыытан тарҕаттылар. Улахан баһаардар турдулар, улуус салалтата, баһаары утары охсуһар сулууспа тугу да үлэлээбэккэ олороллор, Ньурбаҕа өрөспүүбүлүкэ хамыыһыйатын ыытыҥ диэн ис хоһоонноох. Дьиҥэ, биһиги кимнээх суруйалларын билэбит. Ити былырыыҥҥы суруктарын курдук ис хоһоонноох, Малдьаҕары Сайылык диэн уларытан эрэ биэрбиттэр.

Ити дьоҥҥо этиэхпин баҕарабын: эһиги Ньурба улууһун олоҕор-дьаһаҕар, кини сайдыытыгар, дьонун-сэргэтин олоҕо чөллөөх туруктаах буоларыгар кыһаллыбат буоллаххытына, дьону бутуйбаккыт ордук. Дьону дезинформациялыыр, дьону булкуйар-бутуйар иһитиннэриилэри тарҕатыы сокуонунан көҥүллэммэт. Итиннэ туһааннаах уорганнар үлэлэстэхтэринэ эһиги эппиэккэ тардыллыаххытын сөп. Онон быстах кэмҥэ итинник санааҕа киирбит буоллаххытына итинтэн туттунаргытыгар ыҥырабын.

Дьокуускайга олорор биир дойдулаахтартан тахсарын быһыытынан землячество чилиэннэриттэн, бэрэссэдээтэлиттэн Аркадий Филиппович Саввиновтан бу боппуруоска үлэлэһэргитигэр көрдөһөбүн.

Мин санаабар, өрөспүүбүлүкэ салалтата, өрөспүүбүлүкэ Аҕа баһылыга Ньурба улууһугар бара турар үлэни-хамнаһы уонна билиҥҥи баһаар балаһыанньатын барытын билэн олороллор. Онон ити нэһилиэнньэлээх пууннартан — Чуукаартан уонна Хорулаттан эвакуация диэн сымыйа дойҕох.

Улуус салалтата, ыксаллаах быһыыга-майгыга хамыыһыйа, тустаах өрөспүүбүлүкэтээҕи уонна муниципальнай сулууспалар сөптөөх миэрэни ылан олороллор. Бэҕэһээ уонна бүгүн Роспотребнадзор Ньурбатааҕы салаатын салайааччыта Г.М. Николаева официальнай иһитиннэриини биэрэн турар. Буруо концентрацията көҥүллэнэр алын боруогу аһарбат. Бу буруо Күндээдэ нэһилиэгиттэн 3 көстөөх Кугдаар баһаарыттан кэлэр. Бэҕэһээҥи күннээҕи туругунан Чуукаарга уонна Хорулаҕа улахан буруо суоҕа. Буруо тыал хайдах хайысхаланарыттан тутулуктаах.

Ким боппуруостаах биир кэлим дьуһуурунай диспетчерскэй сулууспатыгар эрийэн ыйытыаххытын сөп. Төлөпүөнэ — 2-22-01. Сөптөөх информация улуус дьаһалтатын пресс-сулууспатын нөҥүө бара турар. Ыксаллаах быһыыга-майгыга хамыыһыйа, Роспотребнадзор эмиэ иһитиннэрэ-биллэрэ тураллар.

***

Ньурба улууһун дьаһалтатын пресс-сулууспата

Оставить комментарий    

!