Александр Атласов халаан уутуттан эмсэҕэлээбит хаһаайыстыбаларга үлэ хаамыытын билистэ

Бэҕэһээ, балаҕан ыйын 13 күнүгэр, норуот депутата, Саха Өрөспүүбүлүкэтин Ил Түмэнин тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов уонна Нам улууһун МТ тыа хаһаайыстыбатын управлениетын салайааччыта Владимир Макаров халаан уутуттан эмсэҕэлээбит тыа хаһаайыстыбатынан дьарыктанар бары көрүҥнээх хаһаайыстыбаларга сылдьан чөлүгэр түһэрии үлэлэрин билистилэр. 

Ол курдук Хатырык, Маймаҕа, Модут нэһилиэктэригэр сылдьан халаантан эмсэҕэлээбит сүөһүлээх – сылгылаах ыаллары көрсөн  кэпсэттилэр. Ону таһынан, Хатырыкка ынах – сүөһү көрөр бааһынай хаһаайыстыба салайааччыта Александра Слепцова хотонугар, Маймаҕаҕа Татьяна Слепцова сылгы көрөр базатыгар сылдьан чөлүгэр түһэрии үлэ хаамыытын билистилэр, кэпсэттилэр.

Өрөмүөн үлэтигэр, саҥа хотон тутуутугар, кыстыкка киириигэ ханнык кыһалҕалар баалларын ыйыталастылар, бэлиэтэннилэр уонна былааннаатылар.
Бу күннэргэ дьон бэйэтин күүһүнэн хотоннорун өрөмүөннүү, тута сылдьаллар. Сорох хаһаайыстыбалар бэйэлэрин күүстэринэн өрөмүөн үлэтин эрдэ түмүктээбиттэрэ.
Депутат Александр Атласов өрөспүүбүлүкэ бюджетыттан төлөбүр бу ыйга кэлиэ диэн иһитиннэрдэ.
Улуустааҕы тыа хаһаайыстыбатын управлениетын салайааччыта Владимир Макаров
этэринэн дьон – сэргэ санаата бөҕөх, үп – харчы түстэҕинэ ороскуоттарын сабынан, эбии матырыйаал атыылаһан кыстыкка киириигэ бэлэм буолуохтара диэн эттэ.

Чөлүгэр  түһэрии үлэлэр хаамыылара улуус баһылыга Юрий Слепцов уонна халаантан эмсэҕэлээбит нэһилиэктэр, улуус дьаһалтатын, анал дирекция хонтуруолларыгар тураллар.

***

«Нам улууһа» МТ пресс – сулууспата