Александр Атласов тыа сирин сайдыытын түстүүр тэрээһиннэргэ кытынна

Саха Өрөспүүбүлүкэтин Ил Түмэнин тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов Нам улууһугар Модут нэһилиэгин социальнай инники сайдыытыгар туһуламмыт үс үөрүүлээх тэрээһинигэр кыттыыны ылла.

Нам оройуонун МТ пресс-сулууспата иһитиннэрбитинэн, бастакы түгэнинэн, намнар киэн туттар биир дойдулаахтара, государственнай, общественнай деятель, Саха АССР Госпланын салайааччытынан, ол аата билиҥҥинэн экономика миниистиринэн үлэлээбит, ССРС Национальностарын сэбиэтин уонна Киин исполкомун чилиэнэ Илья Николаевич Прядезников аатынан уулусса өрөмүөннэнэн үөрүүлээх арыллыыта буолла.

Бу уулуссаны олохтоох нэhилиэнньэ бачыымын өйүүр программаҕа (ППМИ) кыттан, куонкуруһу кыайан үп-харчы көрүллэн өрөмүөн үлэтэ ыытылынна. Уулуссаны арыйыыга аалай лиэнтэни улуус баһылыга Юрий Слепцов, СӨ үп министерствотын бачыымнары үбүлээһин отделын салайааччыта Светлана Колодезникова, Модут нэһилиэгин баһылыга Ефим Гоголев уонна нэһилиэк бочуоттаах олохтооҕо, учууталлар учууталлара Екатерина Лукинова үөрүүлээх быһыыга-майгыга быстылар.

Өрөмүөн үлэтин үбүлээһинигэр республика, улуус, нэһилиэк уонна олохтоохтор көхтөөхтүк кыттыһан бэйэлэрин кылааттарын киллэрдилэр. Саҥа өрөмүөннэммит уулуссаны дьон-сэргэ үөрэ-көтө ытыс доҕуһуолунан астылар.

Суол оҥоһуутугар көхтөөхтүк үлэлээбит дьоҥҥо Махтал суруктар туттарылыннылар, уулусса өрөмүөннэнэн силигэ сиппитинэн истиҥ эҕэрдэлэрин тиэртилэр. Элбэх саҥа дьиэ-уот тутуллан, нэһилиэк өссө киэркэйдин, сайыннын диэн баҕа санааларын тиэртилэр.

Ол кэнниттэн тыа сирин биир кэлим сайыннарыы программанан (КРСТ) Ийэ скверин үөрүүлээх арыллыыта буолла.

Сквер бырайыагын СР үтүөлээх артыыһа Валентина Чиркова уонна нэһилиэк оҕо уһуйаанын коллектива толкуйдаабыттар. Олоххо киириитин «Снега» архитектурнай бюро үлэһиттэрэ Александр Осипов уонна Дайаана Егорова оҥорбуттар. Тутуу үлэтин «Ситим» ХЭТ (салайааччы Сергей Семенов) уонна урбаанньыттар Виталий Марков уонна Саид Назарзода ыыттылар.

Ийэ скверигэр төрөппүттэр сынньанар сирдэрэ, уһуйаан оҕолоругар аналлаах оонньуур зона уонна «Ийэ оҕотунаан» турар, ийэни уруйдуур арт-эбийиэктэрэ оҥоһулуннулар.

Улуус баһылыга Юрий Слепцов, нэһилиэк баһылыга Ефим Гоголев, Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов, «Мин Сахам сирэ XXI үйэҕэ» бүтүн республикатааҕы үтүө дьыала хамсааһын салайааччыта Алексей Петров уонна сэрии сылын оҕото Дарья Ядрихинская эҕэрдэ тыл эттилэр. Саҥа тутуллубут сквер үйэлээх буоларыгар, олохтоохтор көрө-истэ, харыстыы сылдьалларыгар баҕа санааларын тиэртилэр.

Ийэ баар буолан сирдээҕи олох баар. Ийэҕэ тапталбыт хаһан да уҕараабат, махталбыт хаһан да бүппэт. Ийэҕэ махтаныы, сүгүрүйүү бэлиэтэ буолар өйдөбүнньүк сквер үйэлээх буоллун.

Модут нэһилиэгэр үһүс үөрүүлээх тэрээһининэн эдэр специалистарга анаан 4 квартиралаах дьиэ арыллыыта буолла.

Уопсайа 181 кв.м иэннээх дьиэни урбаанньыт Саид Назарзода тутан үлэҕэ киллэрдэ. Хас биирдии квартира иккилии хостоох, толору хааччыллыылаах. Бу дьиэҕэ эдэр учууталлар олоруохтара.

Үөрүүлээх тэрээһин алгыс сиэрин-туомун толоруунан саҕаланна. Ефим Ефимович аал уоту оттон айах тутан аһатта. Улуус баһылыга Юрий Слепцов, нэһилиэк баһылыга Ефим Гоголев, Ил Түмэн тыа хаһаайыстыбатыгар уонна аграрнай политикаҕа сис комитетын председателэ Александр Атласов «Мин Сахам сирэ XXI үйэҕэ» бүтүн республикатааҕы үтүө дьыала хамсааһын салайааччыта Алексей Петров уонна улуустааҕы үөрэх салаатын салайааччыта Мария Игнатьева аалай лиэнтэни быстылар, эҕэрдэ тылларын эттилэр.

Саҥа дьиэни урбаанньыт Саид Назарзода толору бэйэтэ үбүлээн тутта. Онон бу үлэ «Мин Сахам сирэ XXI үйэҕэ» бүтүн республикатааҕы үтүө дьыала хамсааһыҥҥа киирэн үп-харчы көрүллэн толору үбүлэниэ диэн эрэллэрин биллэрдилэр.

«Маннык тутуулар тыа сирин инники сайдыытын түстууллэр, дьон-сэргэ төрөөбүт төрүт түөлбэтигэр олохсуйарыгар, эдэр специалистар бары өттүнэн хааччыллыылаах дьиэҕэ киирэн тыа сиригэр үлэлии хаалалларыгар олук уураллар. Ол аата тыа сирэ үүнэр-сайдар кэскиллээх!», – диэн норуот дьокутаата Александр Атласов үөрүүтүн үллэһиннэ.

***

Ил Түмэн пресс-сулууспата

Хаартыскалар: https://t.me/namskiyulus сайтан турдулар