Александр Атласов Нам улууһугар сыл түмүгүн таһаарар тэрээһиҥҥэ кыттыыны ылла

М.К. Аммосов аатынан культура уонна духуобунай сайдыы дыбарыаһыгар буолан ааспыт тэрээһини улуус баһылыгаЮрий Слепцов эҕэрдэ тылынан арыйда. Кини ааспыт сылга халаан уутун содулун туоратыыга төһө даҕаны ыарахаттар баалларын үрдүнэн, Нам улууһун дьоно-сэргэтэ биир киһи курдук турунан үлэлээн-хамнаан, кыстыкка этэҥҥэ киирэн сылы кэккэ ситиһиилэрдээх түмүктээбиттэрин иһитиннэрдэ. Кини халаан уутун содулун туоратыыга үлэлээбит дьоҥҥо, тэрилтэлэргэ, урбаанньыттарга, түмсүүлэргэ уонна көмөлөспүт улуустарга истиҥ махталын тиэртэ уонна наҕараадалары туттартаата.

«Үлэбит сүрүн ситиһиитинэн улууспутугар дьиэ кэргэн уонна элбэх оҕолоох дьиэ кэргэн ахсаана элбии турара буолар. Ол курдук, 2020 сыллаахха улууска 1195 дьиэ кэргэн баар эбит буоллаҕына, 2024 сылга 1429 дьиэ кэргэн баара бэлиэтэннэ. Эйэлээх олох туһугар анал байыаннай дьайыыга сулууспалыыр буойуттарбыт дьиэ кэргэттэрин күннээҕи кыһалҕаларын быһаарыыга нэһилиэк дьаһалталарын кытта биир санаанан үлэлээн кэллибит. Тутуу, суол хаһаайыстыбатын эйгэтигэр турбут сорукпутун толорон иһэбит. Модут нэһилиэгэр 150 миэстэлээх оскуола үлэҕэ киирдэ. Нам сэлиэнньэтигэр 450 миэстэлээх оскуола уонна эмтэнэр куорпус тутуллаллар. Түбэҕэ оскуола-уһуйаан 2026 с. үлэҕэ киириэхтээх», – диэн улуус баһылыга иһитиннэрдэ.

Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Александр Атласов ааспыт сыл түмүгүнэн тыа хаһаайыстыбатыгар улуус сүрүн көрдөрүүлэрин туолуута куһаҕана суох диэн бэлиэтээтэ. Улуус тыатын хаһаайыстыбатын үлэһиттэрэ уустук кэмҥэ ыарахаттартан чаҕыйбакка бары бииргэ турунан үлэлээн түмсүүлээхпитин көрдөрдүбүт диэн кини тоһоҕолоон бэлиэтээтэ. Кини үүммүт сылга тыа хаһаайыстыбатын үлэһиттэрин иннигэр улахан соруктар туралларын уонна сүрүн хайысхаларга былаан туолуутугар бары күүһү уурар наадатын санатта.

Александр Атласов тыа хаһаайыстыбатын сайдыытыгар кылааттарын иһин Ил Түмэн кэмитиэтин Бочуотунай грамотатын тыа хаһаайыстыбатын салаатыгар улуус баһылыгын солбуйааччыта Николаев Филиппп Васильевичка, Хатыҥ-Арыы нэһилиэгин баһылыгар Ноговицын Иван Дмитриевичка,   Модут нэһилиэгин баһылыгар Гоголев Ефим Ефимовичка, улуустааҕы тыа хаһ-н управлениетын  МКТ салайааччыта Петров Юрий Владимировичка туттартаата.

Салгыы улуус баһылыга тыа хаһаайыстыбатын бородууксуйатын сүрүн көрүҥнэрин толорууга кыайыылаахтары ааттаата уонна наҕараадалары туттарда:

I миэстэ – Бөтүҥ нэһилиэгэ (баһылык Михаил Макаров) пресс-подборщигынан наҕараадаланна;

II миэстэ – Үөдэй нэһилиэгэ (баһылык Иван Гаврильев) роторнай от охсорунан наҕараадаланна;

III миэстэ – Модут нэһилиэгэ (баһылык Ефим Гоголев) кыраабылынан наҕараадаланна.

***
Ил Түмэн пресс-сулууспата