Сэрии толоонугар охтубут, Улуу Кыайыыны аҕалсыбыт буойуттары кэриэстээн, Ньурба куоракка «Мин мантан сэриигэ барбытым» өйдөбүнньүккэ сибэккилэр уурулуннулар. Урут манна баар аартыгынан баарсалаах борохуокка киирэн, биһиги биир дойдулаахтарбыт фроҥҥа айаннаабыттара. «Кыталык» КД үлэһитэ Варвара Плотникова туруоруутунан оҕолор оччотооҕу кэми тилиннэрэн итэҕэтиилээхтик оонньоон көрдөрдүлэр. Саллааттар суруктарын аахпыттарыгар дьон Аҕа дойду Улуу сэриитигэр охтубут аймахтарын санаан санньыйан-кутуруйан ыллылар. Кырдьыга, бу алдьархайдаах сэрии төһө да кэм ааспытын иһин, хас биирдии дьиэ кэргэҥҥэ сырҕан баас буолан сылдьар, сэрии уотугар сүтэрбит аймахтарбытын сүтэрбиппит умнуллубат.
Киһи-аймах историятыгар хаһан да буолбатах кырыктаах сэриигэ биһиги дойдубут 27 мөл. киһитин сүтэрбитэ. Ол иһигэр Ньурба оройуонуттан 2697 киһи ыҥырыллан барбытыттан, 1152 киһи сэрии хонуутугар хорсуннук охтубута. 900-тэн тахса киһи уордьанынан уонна мэтээлинэн наҕарадаламмыта.
Чуумпуруу мүнүүтэтэ биллэрилиннэ. Миитиҥҥэ улуус баһылыгын солбуйааччыта Наталия Петрова, Ньурба куорат баһылыгын солбуйааччыта Павел Необутов, улуустааҕы бэтэрээннэр Сэбиэттэрин бэрэссэдээтэлэ Татьяна Олесова тыл эттилэр. Кыайыы үбүлүөйдээх сыла быйыл өссө биир улахан Кыайыыны аҕаларыгар, иллээх-эйэлээх олох эргиллэригэр уонна оҕолорбут, ыччаттарбыт дойду сайдарын туһугар үлэлиир-хамсыыр, дойдубутун көмүскүүр патриот дьон буола улааталларыгар баҕардылар. Улуус уонна Ньурба к. бочуоттаах олохтооҕо Владимир Саввинов бу аартыгынан биһиги эбэлэрбит , хос эбэлэрбит сэриигэ кэргэттэрин атаарбыт ытык миэстэлэрэ буоларын бэлиэтээтэ, оройуон олохтоохторо үлэ фронугар үлэлэриттэн билиһиннэрдэ, оҕолорго үтүө алгыс тылларын анаата.
Тэрээһини култуура департаменын салайааччытын солбуйааччыта Дора Бурнашева, Ст. Васильев аатынан Ньурбатааҕы элбэх хайысхалаах гимназия ырыаҕа учуутала Светлана Васильева киһи дууһатын кылын таарыйар ырыаларынан киэргэттилэр.
***
Геннадий АНТОНОВ
Оставить комментарий