40 күн ааста эйигинэ суох…

Аны эн хаһан да мичилийэ үөрэн, ис-искиттэн сырдаан ааммытын аһан киирбэккин…

Тапталлаах киһибит Стрекаловская Светлана Анатольевна ыарахан ыарыыттан олус соһумардык сирдээҕи олохтон туораабыта кулун тутар 14 күнүгэр номнуо 40 хонуга буолар. Орто дойдуга олорор кэмигэр биһиги дьиэ кэргэҥҥэ эргийэр кииммит, куппут, суобаспыт буолара. Күндү киһибитин ааспыт кэмҥэ туруоран саныыр төһө да ыараханын иҺин кини туһунан кэриэстэбил суруйан эрэбит.

Мэлдьи үөрэ-көтө, дьээбэ-хообо буола сылдьар Һээтикпит олоҕо эмискэ чүмэчи уотун саба үрбүт курдук умуллан хаалбыта хомолтотуон, соһуччутуон… Ким эбит эрдэ бу курдук буолуо диэн эппитэ, сэрэппитэ буоллар ама итэҕэйиэ этибит дуо?! Ол курдук Сибиэтэбит олоҕо хаһан да быстыа суох курдук күөстүү оргуйара, кини сатаабата , билбэтэ суоҕун кэриэтэ этэ. Үлэлии сылдьар курдук туттубакка да сылдьан үлэни барытын үмүрүтэн, ас бөҕөтүн астаан, иис бөҕөтүн иистэнэн күнүн билбэккэ аһарара. Иккис дойду оҥостубут Өлөөнүгэр икки этээстээх дьиэ, тэлгэһэлэригэр сахалыы балаҕан туттаннар быр -бааччы олорбуттара. Өлөөҥҥө оҕуруот аһын үүннэрии кэккэ кыһалҕалардаах да буоллар, Света ытыс саҕа сиргэ хортуоппуй, моркуоп олордоро, оҕурсуу, помидор, бэл диэтэр клубниканы кытары үүннэрэрэ. Оҕурсууттан үүнүү бөҕөтүн хомуйан дьоҥҥо бэрсэрэ, ордугун атыылыыра. Сайынын кини тэлгэһэтэ араас дьэрэкээн сибэккинэн симэнэрэ, кыһынын дьиэтин иһэ кыһыҥҥы сад буолан күөҕүнэн чэлгийэрэ. Өлөөҥҥө хатыҥ үүммэт диэн дойдутугар Ньурбаҕа кэллэ да хайаан да хатыҥ түөрүнэн илдьэ барара уонна ону таһынан бузина, черемуха, рябина кытары илдьэн олордоро уонна онтуларым силис тардан үүнэн эрэллэр диэн олус үөрэ кэпсээччи. Үүнээйинэн дьарыгырыы таһынан куурусса, хаас, перепелка иитэн Өлөөҥҥө сымыыт суох кэмигэр элбэхтэ дьоҥҥо туһаабыта сэрэйиллэр.

Дьылҕа Хаан нарын-намчы Светабытын”чээн” диэн аһыммакка киһи эрэ тулуйбат иэдээнин – икки оҕотун эрдэ сүтэриини киниэхэ анаабыта… Ийэ барахсан төһөлөөх элбэх хараҕын уута тохпута, төһөлөөх абарбыта, аймаммыта буолуой? Бу маны барытын тулуйан, сымыһаҕын быһа ытыран хаанынан оҕуолуур сүрэҕин оспот баастарын атын дьоҥҥо көрдөрбөккө, үҥсэргээбэккэ барытын иһигэр тута сылдьыбыта. Дьон көрөрүгэр күүстээх, хорсун санаалаах, мэлдьи үөрэр-көтөр Светик, онтон бэйэтэ эрэ билинэр ис туругар – тостубут умнастаах хоҥкуйбут Сибэкки этэ… Ону бэйэтэ эрэ билэрэ.

Биһиги Светабыт-Һээтикпит аатын курдук сып-сырдык киһи этэ, бу орто дойдуттан эрдэ барыаҕын билбит курдук хас биирдии кинилиин алтыспыт киһиэхэ сүрэҕэр умуллубат уоту саҕан, хаһан да умнуллубат сырдык санааны хаалларан бардаҕа. Наһаа элбэх билэр дьоннооҕо, дьиҥнээх дьүөгэлэрдээҕэ, табаарыстардааҕа. Үөрэҕинэн алын кылаас учуутала этэ. Онтон кэлин иитээччи үөрэҕин бүтэрэн Маалыкай, Өлөөн уһуйааннарыгар иитээччинэн үлэлээбитэ онтон кэлин Өлөөннөөҕү баһаарынай чааска диспетчэрдээбитэ. Хайа да тэрилтэҕэ үтүө суобастаахтык үлэлээн коллегаларын дириҥ ытыктабылларын ылара, үтүө холобур буолара. Олус элбэх грамоталара, махтал суруктара, түөскэ иилиллэр бэлиэлэрэ ону туоһулууллар.

Олорор олохпутун кустук сэттэ араас өҥүнэн киэргэтэр күнүдү Киһибит, ып-ыраас уулаах мэник Үрүйэчээммит, кыһалҕаны барытын күнүнэн быһаарар аптаах Аанньалбыт, эн букатыннаахтык барбыккын отой итэҕэйиэ суох курдукпут. Ол эрэн, эн оҕолоргун булан , илиилэриттэн сиэтэн биһиги билбэт атын олохпутугар үктэнэн саҥа суол тэлэн барбыккын ылынабыт уонна онно дьоллоох буолуоҥ диэн итэҕэйэбит. Күндү киһибит – таптыыр кэргэним, ийэм, эбээбит, оҕом, балтым, эдьиийбит Светлана Анатольевна, үөһээ мэҥэ халлаантан сырдык сулус буолан тырымнаан сиргэ хаалбыт дьоҥҥун араҥаччылыы туруоҥ диэн эрэнэбит. Тыыннаахпыт тухары таптыахпыт, ахтыахпыт, суохтуохпут. Быдан дьылларга быраһаай.

Бу ыар күҥҥэ аһыыбытын тэҥҥэ үллэстибит чугас дьоммутугар, Светабыт доҕотторугар бука барыгытыгар махталбытын тиэрдэбит, этэҥҥэ буолуҥ.

***

Кэргэнэ, уола, сиэннэрэ, ийэтэ, эдьиийэ, балта, быраата,
Маалыкай, Ньурба улууһа