Маны тэҥэ, Бүтүн Арассыыйатааҕы олимпиадалар кыайыылаахтарын, орто үөрэх кыһаларыгар демонстрационнай эксээмэннэри туйгуннук туттарбыт устудьуоннары чиэстээтилэр.
Кинилэри Ил Дархан Айсен Николаев эҕэрдэлээтэ:
— Бүгүн үгэс курдук, бастыҥтан бастыҥ үөрэнээччилэри, кыайыылаахтары эҕэрдэлиибит, чиэстиибит. Үөрэххэ кыһамньыгыт, билиигэ тардыһыыгыт иһин махтанабын. Учууталларга, үөрэх кыһаларыгар, төрөппүттэргэ бэриниилээх үлэҕит, оҕолоргутугар уҕараабат эрэлгит иһин махтанабын.
Кэнники кэмҥэ үөрэнээччилэр математика, химия, информатика, физика курдук профильнай биридимиэттэри талар буоллулар. Ол профильнай үөрэхтээһини сайыннаран, сөпкө баран иһэрбитин көрдөрөр. Соторутааҕыта Наука аччыгый академиятыгар бара сылдьан, оҕолор научнай бырайыактарын көрөн-истэн, олус астыммытым.
Култуура сылыгар 9 оҕо нуучча тылыгар, саха тылыгар, эбэҥки тылыгар эксээмэннэри 100 баалга туттардылар. Арассыыйатааҕы олимпиадаларга кыттыбыт оҕолор өрөспүүбүлүкэ чиэһин ситиһилээхтик көмүскээтилэр.
Биһиги өрөспүүбүлүкэбит дойду биир сүрүн эрэгийиэнэ буолар, саҥа, технологическай хайысхалар сайда тураллар. Онно эдэр, эрчимнээх, ураты көрүүлээх, талааннаах, айар каадырдар наадалар. Эһиги баҕалаах идэҕитин ылан, бары билиигитин туһанан, дойдугут сайдарын туһугар үлэлиэххит-хамсыаххыт диэн эрэнэбин!
Ил Дархан оҕолорго уонна учууталларга 100 тыһыынча солкуобайдаах сэртипикээти туттарда.
Станислав, Өрөспүүбүлүкэтэҕи лиссиэй-интэринээти бүтэрээччи, харда тылы эттэ:
— Оскуоланы бүтэрээччилэр ааттарыттан үөрэнэргэ, сайдарга бары усулуобуйаны тэрийбиккит иһин махтанабын. Профильнай үөрэхтээһин баар буолан, таптыыр биридимиэппитинэн дьарыктанар кыахтаахпыт. Профильнай үөрэхтээһин көмөтүнэн, биһиги лиссиэйбитигэр быйыл 7 оҕо эксээмэни 100 баалга туттарда. Дириэктэрбит Иван Иванович Шамаевка, бары учууталларбытыгар, төрөппүттэрбитигэр биһиэхэ эрэлгит, тапталгыт, сыраҕыт иһин махтанабын! Мин бэйэм ядерщик идэтин талан, үөрэххэ киирэр былааннаахпын.
— Биһиги чэпчэкитэ суох үлэбитин сыаналыыргытыгар махтанабын. Быйыл гимназиябытыгар 3 оҕо эксээмэни 100 баалга туттарда. Өрөспүүбүлүкэ бастакы бэрэсидьиэн ситим оскуолаларын тэрийии сөптөөҕө көстөр. Эһиги »көмүс каадырдарбыт» буолаҕыт. Хаһан да ситиһиллибитинэн тохтоон хаалымаҥ. Олох аартыгар өрөгөй көтөллөөх аттанан эрэҕит, ол эрээри, бу ситиһиигит бэйэҕит эрэ кыайыыгыт буолбатах, төрөппүттэргит, уһуйааччыларгыт кыайыылара эмиэ баар, ону умнумаҥ, — диэн эттэ.
Оставить комментарий