Үөһээ Бүлүү Намыгар саҥа оскуола үлэҕэ киирдэ

Бүгүн  Үөһээ Бүлүү  үтүө-мааны олохтоохторугар үс бүк үөрүүлээх түгэн буолла.   Нам нэһилиэгэр 220 миэстэлээх таас саҥа оскуола үлэҕэ киирдэ.

Үөрүлээх тэрээһиҥҥэ СӨ үөрэҕин уонна наукаҕа миниистирин 1-кы солбуйааччы Феодосия Габышева, Үөһээ Бүлүү улууһун баһылыга Владимир Поскачин, Ил Түмэн дьокутааттара Марфа Филиппова, Гаврил Алексеев, Иван Шамаев кытыннылар.
Алгысчыт аал уоту айах тутан аһатан Үрдүк Айыылартан көрдөспүтүн кэнниттэн саҥа дьиэ аһыллыытын туоһулуур аалай лиэнтэни үөрэх миниистирин 1-кы солбуйааччы Феодосия Габышева, улуус баһылыга Владимир Поскачин, Нам агро-хайысхалаах оскуолатын дириэктэрэ Аскалон Николаев, Нам оскуолатын  бэтэрээн  учуутала, саха норуодунай бэйиэтэ Бүөтүр  Тобуруокап  кыра кыыһа Саргылаана Наумова уонна 10-с кылаас үөрэнээччитэ, өрөспүүбүлүкэ бастыҥ спортсмена Настя Нюкканова үөрэнээччилэр, учууталлар, олохтоохтор үөрүүлэрин ортотугар быстылар.

Салгыы саҥа оскуолаҕа саха норуодунай учуутала Бүөтүр Тобуруокап аата иҥэриллибитин эттилэр, ону үөрэнээччилэр, учууталлар, олохтоохтор дохсун ытыс тыаһынан уруйдаатылар
Саҥа оскуолаҕа маҥнайгы аһаҕас уруоктары ыытыыга аналлаах линейкаҕа улуус баһылыга Владимир Поскачин: «Оҕолору, учууталлары үөрүүлээх күн үүммүтүнэн ис сүрэхпиттэн эҕэрдэлиибин. Кэлиҥҥи кэмҥэ улууспутугар дьоһуннаах хас даҕаны саҥа оскуола тутуллан үлэҕэ киирдилэр. Оҕолор оскуолаҕытын харыстааҥ, саамай сүрүнэ, үчүгэйдик үөрэниҥ», — диэн эҕэрдэлээтэ.

Чугдаарар тыастаах чуораанньыктар ыҥырыыларынан ыалдьыттар аһаҕас уруоктарга киирэн,  уруккуларын санаан араас предметтэргэ үөрэннилэр.

Саҥа оскуола аһыллыытын үөрүүлээх мунньахха сүрүн эҕэрдэ дакылааты СӨ үөрэххэ уонна наукаҕа миниистирин 1-кыра солбуйааччы Феодосия Габышева: «Нам оскуолатын үөрэнээччилэрин, учууталларын уонна олохтоохторун саҥа таас оскуола үлэҕэ киирбитинэн ис сүрэхпиттэн эҕэрдэлиибин! Саҥа оскуола аһыллыыта улахан событие буолар. Нам оскуолата араас кэмнэри туораан кэллэ. Ол курдук биир кэмҥэ кыараҕастык олорбуттара, онтон саҥа мас оскуола үлэҕэ киирбитэ. Аны туран, эмискэ оскуола умайбыта. Онно тута кэлэн сөптөөх дьаһаллары ылан көмө кэмигэр оҥоһуллубута. Итинник уустук кэмнэри уҥуордаан, бу саҥа оскуола аһыллыытыгар кэлэн турабыт. Федеральнай, өрөспүүбүлэкэ уонна улуус анал бырагыраамалара манна улахан төһүү буоллулар. Үс бырагырааматтан үп көрүллүбүтүн түмүгэр бары өттүнэн толору хааччыллыылаах оскуола тутулунна.
Арассыыйа үрдүнэн 2016 сылтан 2025 сылга диэри иккис сменанан үөрэтии уонна хаарбах туруктаах оскуолалар суох буолуохтаахтар диэн анал бырагыраама үлэлиир. Бу бырагырааманы олоххо киллэриигэ биһиги өрөспүүбүлүкэбит Уһук Илиҥҥи уокурук үрдүнэн биир бастыҥнар кэккэлэригэр сылдьар. Ирдэбил быһыытынан бу бырагырааҕа кыттарга хос үбүлээһин уонна оскуола типовой бырайыага баар буолуохтаахтар. Аны туран, биир ирдэбилинэн маннык улахан оскуолалар элбэх нэһилиэнньэлээх пууннарга тутуллуохтаахтар диэн. Ону биһиги өрөспүүбүлэкэбит усулуобуйата ыарахана барыта учуоттаналынна. Итинэн сиэттэрэн, федеральнай перечеҥҥэ типовой 23 оскуола бырайыага киирдэ. Бу эмиэ улахан ситиһии буолар.
Өссө төгүл барыгытын саҥа оскуола үлэҕэ киирбитинэн Ил Дархан Егор Борисов аатыттан эҕэрдэлиибин!», — диэн эттэ.
Салгыы эҕэрдэ тылы улуус баһылыга Владимир Поскачин эттэ:
— Нам  олохтоохторугар тугунан да кэмнэммэт улахан бэлэх оҥоһуллубутунан эҕэрдэлиибин.  Бастатан туран, бу оскуола үлэҕэ киириитигэр улуус дьоно бары биир киһи курдук түмсэн кытынныбыт, үлэлээтибит. Ол курдук, былырыын кыһыҥҥыттан атын нэһилиэктэр оскуолалар учууталлара анал кыраапыгынан кэлэн үлэлээбиттэрэ махталлаах дьыала. Аны туран, биир сүрүн ситиһиибитинэн улууспут олохтоох «МАКС» тэрилтэтэ маннык улахан дьиэни-уоту  тутуута буолар. Олохтоох уолаттарбыт маннык баараҕай тутууну тутар кыахтаахтарын итэҕэттилэр. Кинилэргэ туспа ис сүрэхтэн эҕэрдэ.
Түгэнинэн туһанан, бу оскуола тутуллуутугар күүс-көмө буолбут Феодосия Васильевна Габышеваҕа бэйэм тус ааппыттан эҕэрдэбин, махталбын тиэрдэбин.
Саҥа оскуола тутуллуута бу барыбыт кыайыыбыт, ситиһиибит. Өссө төгүл барыгытыгар ис сүрэхтэн улахан эҕэрдэ!

Спиридон Борбуев, улуус үөрэҕин управлениетын начаалынньыга:
— Барыгытын бу ураты күнүнэн ис сүрэхтэн эҕэрдэлиибин. Үлэлииргэ бары өттүнэн табыгастаах оскуола үлэҕэ киирдэ. Ол курдук, аактабай саалата туспа блок быһыытынан турар. Ол аата аактабай саалаҕа буолар араас тэрээһиннэр уруоктарга мэһэйдээбэт. Быйыл Үөһээ Бүлүү улууһугар үөрэх эйгэтигэр биэс саҥа эбийиэк үлэҕэ киириэҕэ. Маҥнайгы дьиэ бу буолар.
Түгэнинэн туһанан, оскуола тутуллуутугар бары өттүнэн көмөлөспүт Феодосия Васильевна Габышеваҕа улуус үөрэҕин үлэһиттэрин, олохтоохторун ааттарыыттан махталбын тиэрдэбин!
Салгыы Ил Түмэн дьокутааттара Марфа Филиппова, Гаврил Николаев уонна Иван Шамаев эҕэрдэлээтилэр.
Саҥа оскуола тутууга үтүө суобастаахтык үлэлээбит дьоҥҥо анал наҕараадалар туттарылыннылар.

Учууталлар, ыалдьыттар санаалара

Дмитрий Наумов, суруйааччы, прозаик:
— Саҥа оскуола үлэҕэ киирбитинэн Үөһээ Бүлүү улууһун олохтоохторун ис сүрэхпиттэн эҕэрдэлиибин!  Нам олохтоохторугар үс бүк үөрүүлээх түгэн,  эргэ оскуолалара тэллэй иҥин буолан эрэйи көрбүттэрэ. Дьэ билигин бу таас дьиэҕэ киирэн, учууталлар өссө күүскэ таһаарыылаахтык үлэлиэхтэрэ, оҕолор туйгуннук үөрэниэхтэрэ турдаҕа. Мин биир бэйэм олус үөрэн турабын, ол курдук, мин Намҥа өр үлэлээбитим, улахан оҕолорум бу оскуоланы үөрэнэн бүтэрбиттэрэ. Аны туран, аҕа кынным Петр Тобуруокап аата оскуолаҕа иҥэриллибитэ олохтоохторго туспа ураты үөрүү буолла.

Елена Санникова, учуутал:
— Өр сыллар устата күүппүт ыра санаабыт туолбутуттан учууталлар сүргэбит чахчы көтөҕүллэн сылдьабыт. Олус тупсаҕай оскуола үлэҕэ киирдэ. Аныгы ирдэбилгэ бары өттүнэн толору эппиэттиир. Тутааччыларга ис сүрэхтэн улахан махтал!

Мария Васильева, Оҥхойго олорор, оскуола выпуснига:
— Саҥа оскуоланы көрөн олус үөрдүм, астынным. Нам оскуолатын выпускнига буолабын. Үөрүүлээх аһыллыыга анаан-минээн кэллим. Түгэнинэн туһанан, Нам олохтоохторун саҥа оскуола үлэҕэ киирбитинэн ис сүрэхпиттэн эҕэрдэлиибин!

Кылгас ыспыраапка:

Нам оскуолата 1928 сыллаахха аһыллыбыта,
1937 сыллаахха сэттэ кылаастаах оскуола буолбута,
1967 сыллаахха орто оскуола аатын сүкпүтэ,
2003 сыллаахха агро-хайысхалаах оскуола буолбута.

***

Александр Тарасов, Үөһээ Бүлүү