Сунтаардааҕы киин бибилэтиэкэ быйыл үйэлээх үбүлүөйүн бэлиэтиир

Сунтаарга буоластааҕы бибилэтиэкэ тэриллибитэ быйыл 100 сыла буолар. Улуустааҕы Леонид Попов аатынан киин бибилэтиэкэ үбүлүөйдээх сылын көрсө эдэр ыччакка интеллектуальнай оонньуу ыытта.

Оонньууга Сунтаардааҕы политехническэй лиссиэй, 1-кы, 3-с N-дээх оскуолалар үөрэнээччилэрэ, психологическэй сулууспа исписэлиистэрэ, улуус үөрэҕириитин салалтатыттан 2 хамаандаҕа арахсан, (“Үөрбүттэр”, “Квадратиктар”) күөн көрсөн 3 түһүмэхтээх күрэскэ кытыннылар, бибилэтиэкэҕэ сыһыаннаах ыйытыктарга хоруйдаатылар.

«Ыччат ааҕарын сөбүлүүр буолан судургутук эппиэттэстэ. Күрэх түмүгүнэн 1 миэстэҕэ 470 бааллаах “Квадратиктар” хамаанда таҕыста. Хамаанда чилиэннэрэ дипломунан наҕараадаланнылар. Хас биирдии кыттааччыга туоһу сурук, өйдөбүнньүк бэлэх туттарылынна. Ыччат саҥаны билэн, үөрэн-көтөн, дуоһуйан тарҕаста», – диэн улуустааҕы киин бибилэтиэкэ ааҕааччыны кытта үлэлиир салаатын үлэһиттэрэ иһитиннэрэллэр.

***

“Сунтаар сонуннара” хаһыат.