Сэртипикээт улуустарга тиийдэ

Ааспыт сылга Саха сирэ дойду тоҕус субъегыттан биир бастакынан “Доступное дополнительное образование для детей” диэн федеральнай приоритетнай бырайыакка хабыллыбыта. Тустаах бырайыакка олоҕуран, былырыыҥҥыттан биирдиилээн оҕоҕо үбүлэммит сэртипикээт (персонифицированное финансирование), онтон быйыл “Кванториум” техническэй паарка үлэлээн эрэр.

Ааспыт нэдиэлэҕэ бырайыак биһиги өрөспүүбүлүкэбитигэр хайдах үлэлии турарын итиэннэ тиһэх сонуннарын кытта СӨ үөрэҕин уонна наукатын миниистирин солбуйааччы Эдуард Кондратьев үллэһиннэ.

-Тустаах бырайыагынан үөрэҕи сайыннарыы икки бырагырааматыгар кытынныбыт. Биирдиилээн оҕоҕо үбүлэммит сэртипикээт бырагырааматыгар ааспыт сылга Дьокуускай куорат эрэ кыттыбыта. Сэртипикээт үчүгэйэ диэн, кыра дохуоттаах ыал оҕолорун, ыарахан балаһыанньалаах, учуокка турар оҕолору, ол эбэтэр социальнай-экэнэмиичэскэй балаһыанньатыттан тутулуга суох барыларын хабан дьарыктыыр сыаллаах. Федеральнай “дорожнай каартанан” 2020 сылга 5-18 диэри саастаах оҕо уопсай ахсааныттан 75 %-тан итэҕэһэ суох оҕо дьарыктаныахтаах. Оттон биһиги өссө үрдүк эбээһинэһи ылынабыт итиэннэ 2018 сыл бүтүүтэ номнуо 75 %-ҥа тиэрдэр былааннаахпыт. Биирдиилээн оҕоҕо үбүлэммит сэртипикээти олоххо киллэриигэ анаан, былырыын дойду хааһынатыттан субсидия быһыытынан 37,6 мөл солк., быйыл 31,7 мөл. солк. көрүллүбүтэ.

Сэтинньи саҥатыгар Королев куоракка бырайыактыыр сиэссийэ буолан ааста. Манна ааспыт сылга биирдиилээн оҕоҕо үбүлэммит сэртипикээти маҥнайгынан олоххо киллэрбит 9 пилотнай субъект отчуоттаата. Бырайыакка билиҥҥитэ эбии идэтийиини биэрэр (предпрофильные) Оҕо искусствотын оскуолалара (ДШИ), Оҕо спортивнай оскуолалара (ДЮСШ) кыттыбаттар. Ол эрээри, судаарыстыбаннайа суох, оҕону дьарыктыырга бары усулуобуйаны олохтуур, сэртипикээттээх эбии үөрэхтээһининэн дьарыктанар тэрилтэлэр киирсиэхтэрин сөп. Былырыын, холобура, “Дьоҕур”, “ANT” уонна Хачиров ИП кыттыбыттара.

Бастыҥнар холобурдара

Уус Алдан уонна Хаҥалас улуустара тустаах бырагырааманы олоххо киллэриигэ биир бастыҥнар кэккэлэригэр сылдьаллар. Маныаха Уус Алдан улууһун үөрэҕин управлениетын начаалынньыгын солбуйааччы Мария Горохова иһитиннэрбитинэн, улууска тустаах бырагыраамаҕа хабыллыбыт 3 тэрилтэттэн 501 оҕо сэртипикээти туппут. Биирдиилээн оҕоҕо үбүлэммит сэртипикээт киирэн, 7 эбии куруһуок аһыллан, оҕо дьоҕурун атын хайысхаларын сайыннарар кыах үөскээтэ диэн бэлиэтиир.

Оттон Хаҥалас улууһун биирдиилээн оҕоҕо үбүлэммит сэртипикээккэ исписэлииһэ Диана Федорова: “Биһиги улууспутуттан тустаах бырайыакка “Оҕону эбии үөрэхтээһин киинэ” киирбитэ. Күн бүгүн оҕобут ахсаана — 591. Барыларын сэртипикээтинэн хабан олоробут. Мин санаабар, сэртипикээт оҕо бэйэтин дьоҕурун арыйарыгар кыах биэрэр, айымньылаах педагогтарга суолу арыйар. Оттон төрөппүттэр, кумааҕы толоруутун, интэриниэт мөлтөҕүн аахсыбатахха, биһирээбиттэрин биллэрэллэр. Дьиэттэн тахсыбакка эрэ, оҕону сөбүлээбит куруһуогар суруйтарыахха, сэртипикээккэ төһө суума хаалбытын, бэл, ким дьарыктыырын кытта көрө олоруохха сөп диэн этэллэр”, — диэн санаатын үллэстэр.

****

Людмила ПОПОВА, “Саха сирэ” хаһыат, edersaas.ru.