Курс валют
$
77.92
0.04
91.31
0.01
Курс валют
Курс валют
$
77.92
0.04
91.31
0.01
Меню
Поиск по сайту

Кылаас салайааччыларыгар эбии төлөбүргэ оройуон коэффициенэ учуоттаныа

21.09.2020 21:16 0
Кылаас салайааччыларыгар эбии төлөбүргэ оройуон коэффициенэ учуоттаныа

Кылаас салайааччыларыгар хамнастарыгар эбии төлөбүр ааҕыллыаҕа. Саха сиригэр барыта 9 тыһыынчаттан тахса уһуйааччы ылыаҕа.


Химия учуутала Евдокия Аммосова Мүрүтээҕи “Уолан” гимназия алтыс «б» кылааһын былырыыҥҥыттан салайар. Кылааһыгар 15 уол үөрэнэр. Инньэ гынан иитии-такайыы кыргыттардааҕар чыҥха атын. Бастаан утаа хайдах биир тылы булабын диэн ытырыктата санаабыта. Оттон билигин уолаттарга эдьиийдэрин кэриэтэ күндү киһи, хас биир үөрэнээччи ситиһиитэ – уһуйааччыга муҥур үөрүүтэ. Гимназияҕа уолаттары дьиҥ сахалыы эйгэҕэ сыһыарыы итиэннэ эр киһи быһыытынан бигэ тыллаах, олоххо туспа көрүүлээх буолуу сирдээһин инники күөҥҥэ тутуллар. Евдокия Федосьевна былырыын кылааһын ылаат даҕаны, уолаттар хонуктаах байыаннай үөрэххэ барбыттара, саха үгэһин батыһан, “удьуор утума” диэн анал оскуоланы ааспыттара. Уопсайынан туох баар олимпиадаларга, наука түһүлгэлэригэр кытталларыгар кылаас салайааччыта сүбэлээн-амалаан, мэлдьи аттыларыгар буолар.

Биллэн туран, кылааһы салайыы олус эппиэттээх, үлэтэ хара баһаам, сурунаалы толорууттан саҕалаан, хас биирдии оҕо уйулҕатын, дьиэтээҕи усулуобуйатын барытын биэс тарбаҕын курдук билиэхтээх. Кини ис туругун сайыннарыахтаах, төрөппүтү кытта ыкса ситимнээхтик сылдьан, оҕо туһугар бары кыһамньытын ууруохтаах.

Ити иһин бу үөрэх дьылыттан кылаас салайааччыларыгар ый ахсын эбии төлөбүр ананар. Олохтоммут суумата 5 тыһыынча, ол онно оройуон коэффициенэ итиэннэ хотугу надбавка учуоттанар. Холобура, ханна оройуон коэффициенэ 40 бырыһыан буоллаҕына, 11 тыһ. солк. ылар, оттон коэффициент 60 бырыһыаҥҥа тэҥнэһэр улуустарыгар кылаас салайааччытыгар 12 тыһ. солк. төлөнүөҕэ. Аны туран кылаас салайааччыта хас оҕону салайарыттан, төһө уһуннук үлэлээбититтэн тутулуга суох төлөбүр бэриллэр. Уоппускаҕа, ыалдьан быстах кэмҥэ үлэлээбэтэҕинэ даҕаны ааҕыллар. Эбии төлөбүр коррекционнай оскуолаларга үлэлиир педагогтарга эмиэ көрүллэн, республикаҕа бу сылга 9 тыһыынча 179 уһуйааччы ылыаҕа. Итиннэ быйылгы үбүлээһинэ 545 мөл. солк. буолар, эһиил уонна 2022 сылга үс бүк улаатыаҕа. Бу сыллааҕы сууматтан субвенция быһыытынан улуустарга 134 мөлүйүөнтэн тахса солк. үллэрилиннэ.

Даҕатан эттэххэ, кылаас салайааччыларыгар эбии төлөбүрү анааһын туһунан Президент Владимир Путин Федеральнай Мунньахха туһаайыытыгар этэн турар. Ол саҥа үөрэх дьылыттан олоххо киирэн, кылаас салайааччыта үлэтэ өссө айымньылаах, таһаарыылаах буоларыгар тирэх буолуоҕа.

***

Екатерина Аммосова,
Источник: ulus.media

Оставить комментарий