Амматтан Ньургун Бояров – өрөспүүбүлүкэ чөмпүйүөнэ

Амматааҕы оскуола-интэринээт иитиллээччилэрэ Дьокуускайга адаптивнай спорт киинигэр доруобуйаларынан хааччахтаах оҕолорго мас тардыһыытыгар, штанганы сытан эрэ сыыйа анньыыга уонна остуол тенниһигэр ыытыллыбыт өрөспүүбүлүкэтээҕи чөмпүйэнээккэ ситиһиилээхтик кытыннылар.

Күрэхтэһии үөрүүлээх аһыллыытыгар өрөспүүбүлүкэтээҕи адаптивнай спорт киинин солбуйааччы директора Михаил Варламов эҕэрдэ тылыгар анал олимпиадаҕа спортивнай федерация өрөспүүбүлүкэҕэ тэриллибитин, Президенинэн Ил Түмэн наукаҕа, үөрэхтээһиҥҥэ, иһитиннэрэр-биллэрэр эйгэҕэ, уопсастыбаннай тэрилтэлэр сис кэмитиэттэрин бэрэссэдээтэлэ Феодосия Габышева талыллыбытын иһитиннэрдэ.

Өлүөхүмэ, Хаҥалас, Мэҥэ-Хаҥалас, Уус-Алдан улуустартан уонна Дьокуускай куораттан барыта 7 хамаанда оҕолоро күөн көрүстүлэр. Бастакы күн мас тардыһыытыгар 60 киилэҕэ Алеша Иванов үһүс, 64 киилэҕэ Ньургун Бояров бастакы, Виталий Егоров иккис миэстэлэри ылаттаатылар.

Иккис күн штанганы сытан эрэ анньыыга 52 киилэҕэ Толя Слепцов үрүҥ көмүс мэтээли иилиннэ. Оттон 67,5 киилэҕэ Виталий Егоров бүтэһик холонуутугар кыайыыга дьулуурун көрдөрөн, 50 киилэҕэ анньан үһүс миэстэлэннэ. Саамай ыарахан 67,5 киилэттэн үөһээ ыйааһыҥҥа Ньургун Бояров утарылааччыларын тыҥааһыннаах сытыы киирсиилэргэ баһыйа тутан, республика чемпионун үрдүк аатын ылыан ылла.

Кыргыттарга 60 кг күрэхтэспит Марфа Трифонова үрүҥ көмүс мэтээллэннэ. Остуол тенниһигэр кыргыттарга күрэхтэспит Тася Афанасьева чөмпүйэнээт боруонса мэтээлин иилиннэ. Амматааҕы оскуола интернат оҕолоро мас тардыһыытыгар, штанганы сытан эрэ анньыыга өрөспүүбүлүкэҕэ инники күөҥҥэ сылдьалларын өссө төгүл дакаастааатылар.

***

Источник: Амгагазета.рф