Худуоһунньук Андрей Чикачев үлэлэрэ көрөөччүлэргэ сонуннук тиэрдилиннэ

Аҕа дойдуну көмүскээччилэр күннэригэр Ньурба к. «Кыталык» КД көрөөччүлэргэ сонун тэрээһини тэрийдэ. Бу күн Дьокуускайдааҕы култуура уонна искусство колледжын устудьуона Сандаара Павлова Андрей Чикачев айымньылаах үлэтигэр аналлаах «Күөх Ньурба ыҥырар» коллаборация-кэнсиэри Ньурба дьонугар бэлэх уунна.

Кыра сааһыгар Ньурба сиригэр олорон ааспыт биллиилээх худуоһунньук аатырбыт хартыыналарын кытта алтыһыннаран, сэргэх кэнсиэр туруорулунна. Норуот биһирэбилин ылбыт хартыыналар тиллэн кэлэн, кэрэ кыргыттар куба буолан үҥкүүлээн дайдылар; саха төрүт дьарыктара, күннээҕи үлэтэ, өбүгэ-сиэрэ туома үҥкүү, ырыа тиийимтиэ тылынан көрдөрүлүннэ. Окко, булка-балыкка хайдах туттан-хаптан сылдьарга оҕолору такайан иитэр ис хоһоонноох нүөмэрдэр эмиэ сэргэхтэр.

Кэнсиэргэ «Сулусчаана», «Эрэлчээн», «Сир симэхтэрэ», «Сандаар», «Ньурбачаан», «Чуораанчыктар» оҕо айымньылаах кэлэктииптэрэ уонна «Кыталык» КД талба талааннаах үлэһиттэрэ кытыннылар. Муусуканы тыыннаахтыы доҕуһуоллаабыттара өссө үчүгэй буолла. Дьон кутун туппут балыксыт оҕо оруолун – Андриан Яковлев уонна 2 кыыс сиэннээх эбэ оруолун Александра Догуева толордулар.

Коллаборация-кэнсиэр бүтүүтэ, «Кыталык» КД дириэктэрэ Самангади Дондокова Сандаара Павлова биир ый устата кинилэргэ ситиһиилээхтик бырааактыкаламмытын, дипломнайын түмүктүүр тэрээһинэ ситиһиилээхтик ааспытын иһитиннэрдэ, киниэхэ Эҕэрдэ суругу уонна бэлэҕи туттарда.

Сандаара Павлова: «Мин Дьокуускайтан төрүттээхпин, А.Д.Макарова аатынан Дьокуускайдааҕы култуура уонна искусство колледжыгар үөрэнэбин. Үөрэҕим хайысхата — социальнай-културуунай үлэ, идэм — култуурунай-маассабай тэрээһиннэри уонна театрализованнай оонньуулары тэрийээччи диэн.

Бастаан дипломнай үлэм туһунан толкуйдуурбар Ньурбаҕа кэлэбин диэн саҕалаабытым. Ньурбаҕа сыһыаннаах тиэмэни талыахпын баҕарбытым. Салайааччым этиитинэн Андрей Чикачев худуоһунньук айымньылаах үлэтин талбытым. Кини биографиятын ааҕаммын, кини дойдута Ньурба улууһун Хатыҥ Сыһыы сэлиэнньэтэ буоларын билбитим.

Хайдах быһыылаах тэрээһини туруорарым туһунан толкуйдуурбар, коллаборация-кэнсиэри тэрийэр туһунан санаа киирбитэ. Коллаборация-кэнсиэр уратыта – искусство икки көрүҥэ бэйэ-бэйэлэрин силбэһэн биир бырайыак курдук буолаллар. Онон тыйаатыр уонна худуоһунньук айымньылаах үлэтэ тэҥҥэ силбэһиилэрин курдук тиэмэни талбытым. Көрөөччүлэр бырайыакпын истиҥник ылыммыттарыгар долгуйдум уонна үөрдүм.

Үөрэхпин бүтэрдэхпинэ салгыы үрдэтинэн баран, Ньурбаҕа «Кыталык» КД-гар үлэлии кэлиэхпин баҕарабын».

***

Геннадий АНТОНОВ