Ордук Николай Семенович Дьяконов хараҕа уоттаммыта, ылсан барбыта. Бу, 2025 сыллаахха былырыын этэ. Тириини ыыһыырга анаан коптильня диэн ааттаабыт хоспохпутун саҕалаабыта. Ол эрэн, атын түбүк ыган, тириилэрбит кыра уонна баастаах буоланнар, тохтоон хаалбыппыт. Кыһын Ворошилов бааһынай хаһаайыстыбатын салайааччыта Аксинья Васильевна Левинаны кытта кэпсэтэн, уола Андрей Егорович икки тириини үөрүүнү кытта биэрбитэ. Дьэ мантан ыла тириилэрбитин таҥастааһын үлэтэ саҕаламмыта. Бу, тириилэри сытытыы, таҥастааһын, ыыһааһын, быһыы, тигии курдук ньэҥири ылар түбүккэ кэргэним Андрей Николаевич, кулууппут үлэһиттэрэ Юрий Викторович, Иван Егорович улахан көмөнү оҥордулар. Икки сылы быһа атын дьарык быыһыгар иҥиири таҥастаан сап хаппытым, Егор Иосифович Гуляев көҥкөлөй оҥордо, 7 кылаас үөрэнээччитэ Айсаана Гуляеваҕа чинчийэр үлэ саҕалааммын симэҕин оҕуруотун тигистэ, үлэни кэтээн көрдө-иһиттэ. Дьону көҕүлээн Алена Алексеевна Захарова, Мария Яковлевна Гаврильева, Анна Алексеевна Иванова, Татьяна Алексеевна Захарова, Акулина Афанасьевна Полятинская, Мария Михайловна Дьяконова тирии таҥастастылар, сиэл хатыстылар, иҥииринэн сап оҥорустулар. Нэһилиэкпит ыһыаҕар сири иһиппитин киллэрэн айылҕабытын, дьоммуиун-сэргэбитин кыынньа оонньуур быырпаҕынан айах тутан бастакы холонуубутун ааспыппыт. Мантан иннэ сири иһиттэн кымыс үрдэ охторуу туомун өбүгэ үгэһинэн ыытыахпыт диэн бигэ эрэллэннибит.
Бу курдук, инники билбэтэх көрүҥмүт маннык, элбэх киһи көмөтүнэн этэҥҥэ түмүктэнэн, улууспутугар тэриллэр Олоҥхо ыһыаҕар бэйэбит оҥорбут сири, симиир иһиттэрэ кыттыахтаахтарыттан дуоһуйа, астына үөрэбин. Онтон кэлэр сылларга бу дьарыкпытын бырахпакка, өбүгэ үтүө үгэһин тарҕатар бигэ санаа ылынныбыт.
***
Екатерина Архипова, Дабаан
Оставить комментарий