ТОЙБОХОЙ ЭДЭР САЛАЙААЧЧЫТА ЯН КОРНИЛОВ ЫЧЧАТЫ ҮЛЭҔЭ КӨҔҮЛҮҮР

Тойбохой ыччатын үлэҕэ көҕүлүүр,  саҥаттан саҥа үлэ хайысхатын толкуйдаан таһааран, ону олоххо киллэрэргэ түбүгүрэр киһинэн Ян Трофимович Корнилов буолар. Эдэр киһи тутуу маһын бэлэмниир, тутуунан дьарыктанар тэрилтэлээх. Ол быыһыгар нэһилиэнньэни уунан хааччыйар, килиэп эмиэ астыыр.

Тойбохой ыччата Ян Корнилов икки эдэр киһини өйөөн тыа хаһаайыстыбатын салаатынан дьарыктаналларыгар күүс-көмө буолар. Ол курдук, бииргэ төрөөбүт быраата Айаал 40-ча сылгылаах бааһынай хаһаайыстыбалаах. Ону таһынан былырыыҥҥыттан хортуоппуй олордуутунан дьарыктанар. Былырыын 6 гааны олордон 600-чэ куул хортуоппуйу ылан батарбыт буоллахтарына, быйыл ыһыыларын 9 гааҕа тиэртилэр, онно эбии 5 суотайга сүбүөкүлэ, 3 суотайга моркуоп олортулар.

Сыл аайы органическай уоҕурдуу киллэрэн бааһыналарын тупсаран иһэллэр. Сааскы ууну хаһаанар сир оҥостоннор хортуоппуйдарын уунан дэлэччи хааччыйаллар. РЭС-тэри кытта үлэлэһэн билигин үүнээйилэригэр ууну электричество күүһүнэн кутар кыахтаннылар. Быйыл саас «Новай» сопхуос сүөһүтүн ыһан атыылаабытыгар 25 төбө субай сүөһүнү төлөһүтүүгэ иитээри атыылаһан аҕалла. Былырыын Туойдаах учаастагар сылгы баазата туттубута.

Иккиһинэн бииргэ үөскээбит доҕоро Иванов Алексей Дмитрьевич сылгы хаһаайыстыбата тэринэригэр күүс-көмө буола сылдьар. Алексей Туора Күөл учаастагар сылгы баазата туттарыгар матырыйаалынан, тиэхиньикэнэн көмөлөспүтүн таһынан, үлэһити кытта булан дьоһуннаах баазаны дьэргэтэн саҕалаатылар. Алексей онно 20-тэн тахса сылгыны көрөн-истэн туруорар. Билигин Алексейы олоххо саҥа киирэн эрэр “Агростартап” диэн бырайыагынан саҥа саҕалыыр бааһынай граныгар кытыннараары оттуулларын быыһыгар бэлэмниир.

Маны тэрийэригэр Ян Трофимовичка оҕо эрдэҕиттэн үлэҕэ эриллэн улааппыта, ханнык да үлэттэн иҥнэн-тохтоон турбата улахан төһүү күүс буолар. Билигин Ян хаһаайыстыбатыгар үлэҕэ туһанар тиэхиньикэлээх, оҕуруот аһын хаһаанар хранилищелаах, баазалаах. Эдэр салайааччы харытын күүһүнэн ааҕан-суоттаан үлэлээн ситистэ. Суот-учуот өттүн Ян Трофимович кэргэнэ омук тылын учуутала идэлээх Елизавета Ефониевна кыайа тутар. Эдэр ыаллар 4 оҕолоруттан күннэрэ-ыйдара тахсар.

Эдэр киһи ыччаты түмэ тардан үлэни тэрийэрэ СӨ Ил Дархана А.С.Николаев быйылгы сылы Сомоҕолоһуу сылынан биллэрбитигэр саамай сөп түбэһэр, нэһилиэгин уопсай сайдыытыгар төһүү күүс буолар. Ян Трофимовичка бары тэрээһиннэригэр ситиһиини баҕарыаҕыҥ.

***

Ааптар: Валерий Илларионов