Сунтаар Хордоҕойугар саҥа сквер уонна саха балаҕана арыллыннылар

Ахсынньы 2 күнүгэр, Хордогой нэһилиэгэр Саха Өрөспүүбүлүкэтин искусствотын үтүөлээх деятеля, П.А. Ойуунускай аатынан Судаарыстыбаннай бэриэмийэ лауреата, Арассыыйа худуоһунньуктарын Сойууһун чилиэнэ, Хордогой нэһилиэгин Бочуоттаах олохтооҕо, скульптор Эдуард Иннокентьевич Пахомов үтүө, сырдык аатын үйэтитэр сыаллаах сквер арыллынна. Ону таһынан сквер аттыгар саха балаҕана – Айыы балаҕана аһыллан нэһилиэк олохтоохторо сүрэх ымыыта оҥостубут, ыра санаалара туолан үөрүүлэрэ үксээтэ.

Эдуард Иннокентьевич – Сунтаар улууһун киэн туттуута, киһи быһыытынан үтүө-мааны майгытынан, сүдү талаанынан биһиги кэккэбитигэр улахан ытыктабылы ылыан ылар. Кини улууспутугар уонна өрөспүүбүлүкэҕэ эрэ буолбакка бүтүн Арассыыйаҕа киэҥник биллэн үгүс үтүмэн элбэх үлэлэрэ дьон-сэргэ сэҥээриитин ылбыттара.

Үөрүүлээх тэрээһиҥҥэ Сунтаар улууһун Аҕа баһылыга Анатолий Григорьев, тутуу комплексын управлениятын начальнига Иван Егоров, нэһилиэк баһылыга Геннадий Васильев, Эдуард Иннокентьевич уруулара-аймахтара, ыраахтан-чугастан кэлбит ытык-мааны ыалдьыттар уонна нэһилиэк олохтоохторо кыттыыны ыллылар. Кэлбит ыалдьыкка сахалыы сиэринэн итии чэйинэн, сагынньахтаах алаадьыннан күндүлээтилэр. Музей салайааччыта Александр Кириллин тутууга күүс-көмө буолбут дьону ахтан-санаан, махтал тылларын анаата, инникитин сахалыы тыыннаах балаҕаҥҥа уопсастыбаннай түмсүүлэр, эдэр ыччаттар, кыраайы үөрэтэр оҕолор дьарыктанар кииннэринэн буолуоҕа диэн иһитиннэрдэ.

Саҥа арыллыбыт сквер олохтоохторго история умнуллубат кэрэhитэ буолан, үтүө киһи аата үйэлэртэн үйэлэргэ ааттана турарыгар уонна ыччаты үтүөҕэ-кэрэҕэ угуйа, махталы иҥэрэ туруо диэн эрэлбит сүдү.

***

«Сунтаар улууһа (оройуона)» муниципальнай оройуон дьаһалтатын пресс-сулууспата