Сахабыт сиригэр историяҕа киирэр улахан суолтаталаах саҥа хардыы

Ил Дархан Айсен Николаев  айылҕаны харыстааһын бастакы ыйааҕын чэрчитинэн, бүгүн Светлай бөһүөлэгэр  Чернышевскай балык собуотугар иитиллибит 35 000 устуука хатыыс ыаматын Бүлүү Эбэҕэ ыыттылар.

Бүлүү Эбэбит балыгынан баайын хаҥатар сыалтан, саҥа улахан бырайыакка биһиги учуонайдарбыт, экологтарбыт, республиканскай, муниципальнай структуралар уопсай биир ситиһиилэрэ буолар.

Үөрүүлээх тэрээһиҥҥэ Сунтаар улууһун Аҕа баһылыга Анатолий Григорьев, айылҕа харыстабылын миниистирин солбуйааччыта Яков Заровняев, Ил Түмэн депутата Юрий Николаев, Сүлдьүкээр нэһилиэгин баһылыга Иван Игнатьев, Чернышевскай рыбзовод директора Василий Черепанов уонна олохтоох нэһилиэнньэ кыттыыны ыллылар.

Дьон-сэргэ Ил Дархан Айсен Николаевка уонна айылҕа харыстабылын миниистиригэр Сахамин Афанасьевка махталлара муҥура суох. Инникитин айылҕаны харыстыыр уопсай сомоҕолоһуу үлэтэ Саха сирин атын өрүстэригэр салҕанан барар.

***

“Сунтаар улууhа (оройуона)” муниципальнай оройуон дьаһалтатын пресс – сулууспата