«Олоҥхо дойдутун оҕотобун» өрөспүүбүлүкэтээҕи фестиваль

2019 с. кулун тутар 29-31 күннэригэр Өксөкүлээх Өксөкүлээх аатынан норуоттар доҕордоһууларын Дьиэтин СӨ норуоттарын култуурунай нэһилиэстибэлэрин Киинэ, Олоҥхо тыйаатыра тэрийиилэринэн, үгэс буолбут өрөспүүбүлүкэтээҕи эдэр олоҥхону толорооччулар фестиваллара буолан ааста. Барыта 16 улуустан уонна Дьокуускай к. 276 оҕо кыттыыны ылла. Күрэхтэһии олоҥхону биирдиилээн уонна бөлөҕүнэн толорууга сааһынан көрөн икки бөлөҕүнэн барда: оскуола иннинээҕи саастаах уонна оскуола оҕолоро.

Жюрига үлэлээтилэр Г.С. Попова, М.К. Аммосов аат. ХИФУ профессора, п.н.к., А.Н. Данилова, ГЧуо.ААХНПИ научнай сотруднига, ф.н.к., Д.Г. Ефимова, СӨ үөрэҕириитин үтүөлээх үлэһитэ уонна СӨ норуоттарын култуурунай нэһилиэстибэлэрин Киинин специалистара З.Г. Сысолятина, фестиваль салайааччыта, СӨ култууратын үтүөлээх үлэһитэ, Е.Н. Протодьяконова, П.А. Ойуунускай аатынан Государственнай бириэмийэ лауреата, У.М. Флегонтова, СӨ үөрэҕириитин туйгуна.

Фестиваль түмүгүнэн оҕолор көхтөөхтүк, баҕаран туран кыттыылара, толорор эйгэлэммиттэрэ, олоҥхолуур үөрүйэхтэрэ олоҕурбута бэлиэтэннэ. Толорооччуларга уолаттар элбээбиттэрэ, үгүстэрэ бириистээх миэстэҕэ тиксибиттэрэ үөрдэр.

Уһуйааччылар идэтийэн туран үөрэтэллэрэ кэрэхсэнэр эрэ. Бастыҥ салайааччыларынан А.Д. Софронов (Амма улууһа), З.П. Лугинова (Уус Алдан улууһа), М.Е. Григорьева (Бүлүү улууһа), Е.К. Маркова (Нам улууһа), В.Н. Старкова (Хатас бөһ.), Е.П. Иванова (Мэҥэ Хаҥалас) о.д.а. ааттыыбыт, олоҥхо курдук күөн туттар улуу айымньыбытын эдэр көлүөнэҕэ утумнаахтык, дьаныһан туран тиэрдэллэринэн киэн туттабыт, махтанабыт. Манан сиэттэрэн этиэхпитин баҕарабыт: кинилэргэ үлэлиир усулуобуйаны тэрийиини салайааччы болҕомтоҕо ылара наада.

Түмүккэ сүбэ быһыытынан эттэххэ, олоҥхону үгэс быыһытынан толоруу хайаан да тутуһаллара, ырыатын, сэһэнин биир тэҥник тутуу, тылын-өһүн чуолкайдык саҥарыы өрүү ирдэнэрин бэлиэтиибит. Маны таһынан бэйэлэрин түөлбэлэригэр аатыран-сураҕыран олорон ааспыт олоҥхоһуттарын бэчээккэ тахсыбыт олоҥхолоруттан толоруулара биһирэнэр эрэ.

***

СӨ норуоттарын култуурунай нэһилиэстибэлэрин

Киинин специалистара Е.Н. Протодьяконова,

З.Г. Сысолятина, У.М. Флегонтова.