Ньурбаттан төрүттээх устудьуон “Якутский питчинг дебютантов-2020” күрэххэ ситиһиилэннэ

Үрдүк, орто анал үөрэх кыһаларын устудьуоннара «Дьиэҕэ олоруу» кэмигэр бириэмэлэрин туһалаахтык атаараллар. Муус устар 21-23 күннэригэр Москуба куоракка Бүтүн Арассыыйатааҕы кинематографистар  Сойуустара уонна Бэрэсидьиэн граннарын фондата «Якутский питчинг дебютантов-2020» диэн бырайыактары презентациялааһыны кэтэхтэн ыытта. Манна Ньурбаттан төрүттээх устудьуон Марк Котоконов бырайыага бэлиэтэннэ.

Сүүмэрдэммит хамыыһыйа иннигэр 8 бырайыагы «Оонньуу киинэ» уонна «Документальнай киинэ» категорияларынан көмүскээтилэр. Москубатааҕы киинэ уонна телевидение (ГИТР) институтун продюсерскай факультет устудьуона Марк Котоконов бэйэтин бырайыагынан кыттан, «Лига Кино» сценарнай оскуола анал бирииһин ылары ситистэ.

Питчинг сыала – былаһааккаларга тутулуга суох  эдэр кинематографистар инвестордары, сүрүннүүр продюсерскай хампаанньалары, дойдуга саҥа трендовай киинэлэр баар буолалларыгар бииргэ алтыһан үлэлэһэллэригэр ананна.
Экспертнэй Сэбиэккэ култуура уобалаһын аналитига уонна кинематография бэрэссэдээтэлэ Олег Иванов, «Российская газета» телевидение уонна киинэ отделын редактора Сусанна Альперина, «Телесто» хампаанньа генпродюсера Елена Гликман, СӨ култуура уонна духуобунай сайдыы миниистирин бастакы солбуйааччыта Владислав Левочкин, «Хорошо продакшн» хампаанньа генпродюсера Наталья Иванова, «Стардаст» киинэ оҥоһуутугар агена Александр Паршуто, «Canon» хампаанньа хаартыска уонна видео профессиональнай биисинэһин сайыннарыыга менеджерэ Евгений Субочев, «Yellow, Black and White» киностудия баһылыга, продюсера Руслан Татаринцев, «Сахафильм» судаарыстыбаннай национальнай киинэ хампаанньаттан Дмитрий Шадрин, Саха норуоттар икки ардыларынааҕы кинофестиваль толорооччу дириэктэрэ Ирина Энгелис үлэлээтилэр. Арассыыйа кинематографистарын Ыччат киинин дириэктэрин солбуйааччы Дмитрий Якунин питчинг модераторын быһыытынан кытынна.

Марк Котоконов: “Муус устар 21 күнүгэр бырайыактары көмүскээһин буолбута. Арассыыйа кинематографистарын Ыччат киинэ тэрийэн ыытта. Дойдуга эпидемия туран, “Zoom” нөҥүө ыытылынна. Мин манна бастакы кыттааһыным буолар. Саха сиригэр алмаас хостооһунуттан тулалыыр эйгэ экологията айгырыырыттан атааннаһыы тахсарын туһунан “Ослепительная красота” бырайыакпын көмүскээтим.
Бырайыак билигин үөрэтиллэр. Саха сиригэр күһүн уһуллуохтаах. Хамаандабын тэрийэбин, ГИТРа устудьуоннарын дипломнай бырайыактарын быһыытынан кытыннарар санаалаахпын. Инвестордары, эбэтэр интэриэһиргээбиттэри көрдүүбүт.
«Якутский питчинг дебютантов-2020» тэрээһиҥҥэ «Лига Кино» хампаанньа Олег Богатов анал бирииһин туттум. Хампаанньа киинэ оҥоһуутугар ырытан оҥорууга үлэлэһиэҕэ. Икки өттүттэн таһаарыылаахтык бииргэ үлэлэһиэхпит дии саныыбын”.

Марк төһө да эдэр буоллар, төрөөбүт дойдутун тулалыыр айылҕатын экологиятыгар харыстабыллаахтык сыһыаннаһан кыттыбыта хайҕабыллаах.

Бу иннинэ кини киинэҕэ сыһыаннаах.”Арт Дойду” хампаанньа салайааччы  продюсерыгар Марианна Скрыбыкина “Иччи” уонна “Хаар кынат” киинэлэргэ толорооччу продюсерынан үлэлэспитэ.
Эдэр киһиэхэ Марк Котоконовка үөрэҕин ситиһиилээхтик түмүктээн айа-тута сылдьарыгар баҕарабыт.

***

Ааптар: Антонина СЕМЁНОВА