НЬУРБАЛАР “ОҔО КУТУН ТАТТАРЫЫ” ПАННОЛАРА МОСКУБАҔА ҮРДҮК СИТИҺИИЛЭННЭ

Москуба куоракка балаҕан ыйын 5-20 күннэригэр Арассыыйа худуоһунньуктарын Сойууһун киин быыстапкалыыр саалатыгар ыытыллыбыт Аҕа дойду Улуу сэриитин 75 сылыгар аналлаах “Великому подвигу посвящается…” быыстапкаҕа Ньурба улууһун маастардарын үлэтэ Гран-прины ситистэ.

Быыстапканы тэрийээччилэр – Арассыыйа култууратын министиэристибэтэ уонна В.Д.Поленов аатынан Судаарыстыбаннай айымньы Дьиэтэ. 2019-2020 сылларга регионнар икки ардыларынааҕы биэс быыстапканы тэрийэн ыытта. Бу быыстапкаҕа Арассыыйа 57 регионнарыттан кыттыыны ылбыттарыттан Забайкальскай, Красноярскай, Симферополь, Екатеринбург, Тверь, Москуба, Москуба уобалаһа уонна Саха сирин куратордара кыайыылааҕынан тахсаннар, Гран-принан наҕараадаланнылар.

Ньурба оройуонуттан А.Е.Кулаковскай “Научные труды” кинигэтиттэн “Оҕо кутун таттарыы” өбүгэ үгэһин үйэтитиигэ анаан уран уус Аммос Прокопьевич Давыдов оҥорбут эскииһинэн улуустааҕы култуура департаменын иһинэн үлэлиир “Арыллыы” түмсүү (салайааччы Галина Дмитриевна Федорова) маастардара Алексеева Мира Никитична, Давыдова Валентина Яковлевна, Иванова Фёкла Ивановна, Кучурова Таисия Аркадьевна, Пахомова Людмила Ивановна, Петрова Домна Егоровна, Сивцева Вера Степановна, Спиридоновна Надежда Алексеевна, Трофимова Наталья Федотовна, Харитонова Саргылана Михайловна тикпит паннолара кыттан, Гран-принан бэлиэтэннэ.

Саха сириттэн СӨ норуот айымньытын ойуулуур-дьүһүннүүр ускуустуба сүрүннүүр исписэлииһэ, СӨ култууратын туйгуна Пелагея Николаевна Слепцова Саха сирин араас муннуктарыттан талыллыбыт үлэлэри Москуба куоракка илдьэн кытыннарда.

Бу иннинэ 2018 сыллаахтан үстүү этаптаах өрөспүүбүлүкэтээҕи быыстапкалартан, “Салют Победы” диэн регионнар икки ардыларынааҕы Аан бастакы Дьокуускай куоракка буолбут быыстапкаҕа лауреат буолбут үлэлэртэн талыллан үрдүкү таһымнаах Арассыыйатааҕы түмүктүүр быыстапкаҕа кытыннылар.

Ити курдук Ньурбатааҕы “Арыллыы” түмсүү Арассыыйаҕа Саха сирин, төрөөбүт улуустарын аатын ааттатаннар кыайыы өрөгөйүн аҕаллылар. Үрдүк ситиһиини ылбыт түмсүү Пелагея Николаевна Слепцоваҕа махталын биллэрэр.

***
Ааптар: Антонина СЕМЕНОВА,

Подробнее: https://ulus.media