НЬУРБАЛАР 3 ИҺИГЭР КИИРЭРГЭ СУОТТАНАЛЛАР

Аммаҕа СӨ Норуоттарын 7-с Спортивнай оонньууларыгар Ньурба улууһуттан 60 спортсмен кыттар. Улуус спортсменнара 3 иһигэр киирэргэ  турунан бэлэмнэннилэр.

Аммаҕа ыытыллар СӨ Норуоттарын 7-с Спортивнай оонньууларыгар Ньурба улууһа кыттыытын туһунан физическэй култуура уонна спорт управлениетын салайааччыта Александр Максимов билиһиннэрэр:

— Биһиги спортсменнарбыт от ыйын 4 күнүттэн саҕалаан күрэхтэһэллэр. 3-с чыыһылаҕа мандаты ааһабыт, итиэннэ аккредитация, түһэр сирбитин булуу. Түһэр сирбит барыта быһаарыллан турар, хамаанданан «Кэнчээри» дьыссаакка түһэбит. Бэтэрээннэргэ эмиэ дьиэ сакаастаатыбыт, туспа сытыахтара. 11 көрүҥҥэ 60 путевкалаахпыт. Ордук улахан түмүгү боксердартан кэтэһэбит. 1-кы буолбатахтарына, 3 иһигэр киириэхтээххит диэн сорук турар. Аэробика кыргыттара — быйылгы СӨ чөмпүйүөннэрэ эмиэ күүскэ бэлэмнэннилэр. Бырагыраамаларын уустугурдан, үчүгэйдик дьарыктаннылар. Спортиҥҥа эмиэ үчүгэй түмүгү күүтэбит. Спорт маастардара Игорь Егоров, Василий Додохов, итиэннэ Ньурбачаантан Давид Павлов Дьокуускайга сборданнылар. 3 иһигэр киириэхпит диэн настройкалаахтар. Остуол тенниһигэр кыргыттарбыт эмиэ күүскэ бэлэмнэннилэр. Сүүмэрдиир күрэхтэһиигэ 11-с буолбуттара, бу сырыыга 3 иһигэр киирдэллэр ханнык диэн суоттанабыт. Ефимова Александра Чурапчыттан үөрэҕин бүтэрэн кэлэн хамаанданы күүһүртэ. Кинини уонна Валерия Владимированы Уссурийскайга сборга ыыта сырыттыбыт. Уссурийскай куорат чөмпүйэнээтигэр, Приморскай, Хабаровскай кыраайдар кубоктарыгар кыттан, барытыгар миэстэлэстилэр. Онон бу көрүҥҥэ эрэх-турах сананабыт. Виталий Васильев 3-тэ төхтүрүйэн ойууга куһаҕана суохтук ыстаныа диэн эрэнэбит. Биир саамай күүстээх спортсеммыт буолар, дьаныардаахтык уонна күүскэ бэлэмнэннэ. Адаптивнай спорка чэпчэки атлетикаҕа Васильев Алешаттан түмүгү күүтэбит. Сүүмэрдиир күрэхтэһиилэргэ үчүгэйдик сүүрдэ, эрчилиннэ. Ядрону быраҕыыга уонна 400 м сүүрүүгэ Усов Дмитрийгэ эрэллээхпит. Тустууктарга арыый ыарахан соҕус буолуо, ол эрээри манна лиидэрбит Василий Афанасьев куһаҕана суох шанстаах. Сүүмэрдиир күрэхтэһиигэ 5-с миэстэ буолбута, бу сырыыга 3 иһигэр киирэр кыахтаах. Сэрэбиэй эмиэ элбэҕи быһаарыаҕа. Бастакы эргииргэ лиидэрдэргэ түбэспэтэхтэринэ уолаттар син барсыахтара диэн эрэнэбит. Охчуттар эмиэ күүскэ бэлэмнэннилэр. Отборочнайга 14-с хамаанданан киирбит буоллахтарына, бу сырыыга 10 иһигэр киириэхтээхтэр диэн сыал-сорук туруордубут. Сүүмэрдиир күрэхтэһиилэргэ атын хамаандалар 1-2 очукуонан араастаахтар. Ол иһин 4 охчуттан хас биирдиилэрэ 2-лии эҥин очукуону эбиннэҕинэ, лаппа инники киириэхпитин сөп. Дуобакка хамаандабыт күүстээх, хайдах баарынан оонньуохтара. 10 иһигэр номнуо баарбыт. Лиидэрдэрэ, гроссмейстер Иван Токусаров саамай титулованнай спортсмеммыт — РФ, ССРС, Европа, аан дойду чөмпүйүөнэ. Улуус хамаандатын капитанынан кини буолар. Уопуттаах оонньооччу бэйэтин дьонун өрө тардыа диэн кэтэһэбит. Б ырамыысыланнай улуустар бөлөхтөрүгэр 8 хамаанда баар, ол иһигэр: Дьокуускай, Ленскэй, Мирнэй, Нерюнгри, Алдан, ЯГСХА, «Сахастуденческай сойуус» уонна Ньурба.

3 иһигэр киириэхпит диэн күүскэ турунан баран иһэбит. Билиҥҥитэ 3-с миэстэлээхпит, иннибитигэр Дьокуускай уонна Нерюнгри иһэллэр. Нерюнгрилары кытта эмиэ киирсэн кэбиһиэхпитин сөп. От ыйын 3 күнүгэр волейбол, баскетбол, мини-футбол, инбэлииттэр олорон эрэ волейболлара саҕаланар. Манна биһиги, хомойуох иһин, путевка ылбатахпыт.

***

Ааптар: Геннадий АНТОНОВ