Курс валют
$
62.87
0.04
70.79
0.19
Курс валют
Курс валют
$
62.87
0.04
70.79
0.19
Меню
Поиск по сайту

НЬУРБА ЫЧЧАТА БЫРАМЫЫСАЛАННАС ИДЭТИГЭР ҮӨРЭНИЭ

12.07.2019 10:21 0
НЬУРБА ЫЧЧАТА БЫРАМЫЫСАЛАННАС ИДЭТИГЭР ҮӨРЭНИЭ

Ньурба улууһун дьаһалтатыгар «АЛРОСА» (ПАО) генеральнай дириэктэрин солбуйааччы Алексей Дьячковскай кыттыылаах «Үөрэхтээһин уонна үлэнэн хааччыйыы боппуруостарыгар бииргэ үлэлээһин” диэн үөрэҕирии ситимин бырагырааматыгар олоҕуран төгүрүк остуол ыытылынна. Үүнэр үөрэх дьылыгар Мииринэйдээҕи тэхэньиичэскэй коллеһы кытары Ньурбатааҕы техникум дуогабар түһэрсэн, 25 олохтоох эдэр киһи горнай тэрили өрөмүөннээһин идэтигэр үөрэниэҕэ.


Мунньаҕы Ньурба улууһун баһылыгын социальнай боппуруостарга солбуйааччы Анна Уларова салайан ыытта. Киирии тылы улуус баһылыгын бастакы солбуйааччыта Артур Яковлев оҥордо. Профессиональнай орто анал үөрэхтээһин Министиэристибэтин отделын салайааччыта Л.Л. Стручкова, Мииринэйдээҕи региональнай тэхэньиичэскэй колледж дириэктэрин I солбуйааччы К.А Бурнашева, Ньурбатааҕы хайаны-байытар кэмбинээт каадыр отделын салайааччытын солбуйааччы Татьяна Николина, улуустааҕы үөрэҕирии управлениетын салайааччыта Алевтина Аргунова, дьарыктаах буолуу Киинин салайааччытын э.т. Розалия Илларионова уонна «Ньурбатааҕы техникум» СӨ ГБПОУ салайааччыта Николай Семенов иһитиннэриилэри оҥордулар.

Алексей Дьячковскай, «АЛРОСА» ПАО генеральнай дириэктэрин солбуйааччы маннык эттэ:

— Мииринэйдээҕи региональнай тэхэньиичэскэй колледж улахан хампаанньалары, бырамыысаланнай тэрилтэлэри каадырдарынан хааччыйар улахан үөрэх тэрилтэтэ буолар. Быйыл кэлэр үөрэх дьылыгар Мииринэйдээҕи тэхэньиичэскэй коллеһы кытары Ньурбатааҕы техникум дуогабар түһэрсэн, Ньурбаттан 25 эдэр ыччат горнай тэрили өрөмүөннээһин идэтигэр биир сыллаах үөрэххэ сыл аҥара Ньурбаҕа, сыл аҥара Айхалга үөрэниэхтэрэ. Үөрэҕи бүтэрбиттэр бырамыысаланнаска производственнай эбийиэктэргэ сыстан үлэлиэхтэрэ. Кинилэргэ кэнэҕэһин орто салаа салайааччылара буолалларыгар кыах арыллар.

Бырайыак хаҥаан бардаҕына, араас бырамыысаланнай-производственнай идэлэргэ үөрэнэр, үлэлиир кыахтаныахтара. Ньурба улахан улуус буоларынан сибээстээн, дьоно-сэргэтэ үлэлиир баҕалааҕынан, Бүлүү бөлөх уонна Хоту улуустарга орто анал үөрэх киинэ баар буолара тоҕоостоох. Ааспыт сылга Ньурба оройуонугар Үөһээ Муунаҕа олохтоох каадырдары бэлэмнээһиҥҥэ Бүлүү бөлөх улуустарынан үлэ барбыта. Вахтанан үлэҕэ Ньурбаттан -5, Сунтаартан — 23 киһи үлэ миэстэтинэн хабыллыбыттара. Бу маннык арыттаһыы тахсыбатын наадатыгар үөрэҕирии ситимэ ыытыллар, — диэн эттэ.

Боппуруостары, этиилэри киллэриигэ куорат дьаһалтатыттан Айталина Камилова «Саха» НКИХ Ньурбатааҕы филиала ыытар «Профи» (ааптар Роман Саввинов) бырамыысаланнай үлэҕэ сыһыаннаан биэриилэрин сөргүтэргэ этии киллэрдэ. ХИФУ горнай салаатын бүтэрбит эдэр киһи Спартак Иннокентьев үлэ миэстэтин туоһуласта. Алексей Прокопьевич Саха сиригэр бырамыысылыннас сайдыытыгар үлэлиир дьону дьоҥҥо-сэргэҕэ иһитиннэрэр-сырдатар үлэни ыытыыны сөптөөҕүнэн аахта.

Төгүрүк остуол түмүгэр улуус баһылыга Алексей Иннокентьев:

— Ньурба улууһугар ыччат бырамыысаланнаска сыстан үлэлиирин наадатыгар, хаачыстыбалаах орто анал үөрэҕи ыларыгар, сөптөөх үлэни буларыгар сорук туран, бырагыраама ылыллан олоххо киирэн эрэр. Биһиги ыччаппыт кэнэҕэски өттүгэр бырамыысаланнас, производство араас салааларыгар үлэлиир кыахтаныаҕа, — диэтэ кини.

***

Ааптар: Антонина СЕМЕНОВА

Оставить комментарий    

!