НЬурба улууһугар “ҮРҮҤ ТОРУОСКА” ыйа салҕанар

Ньурбаҕа Бүтүн Арассыыйатааҕы «Үрүҥ торуоска» ыйа алтынньы 15 күнүттэн сэтинньи 15 күнүгэр диэри ыытыллар. Оройуоннааҕы Көрбөттөр уопсастыбаларыгар доруобуйаларынан хааччахтаах дьон социальнай өттүнэн өйөбүлгэ, реабилитацияҕа сыһыаннаах кыһалҕалаах боппуруостарыгар туһаайан төгүрүк остуол тэрилиннэ. 

Ньурба улууһун баһылыгын социальнай боппуруоска солбуйааччы Анна Уларова киирии тылынан аста, туох-ханнык үлэлэр ыытыллыбыттарын, инники соруктар тустарынан кылгастык билиһиннэрдэ.
Улуус, куорат дьаһалталарын, доруобуйа харыстабылын, улуустааҕы пенсионнай пуонда, ФКУ ГБ МСЭ СӨ үлэ уонна социальнай сайдыы министиэристибэтин иһинэн 15 нүөмэрдээх смешаннай профиллаах филиалын бюротын, улуустааҕы социальнай харалта управлениетын, СӨ РФ социальнай страхование Фондатын Ньурба оройуонунааҕы салаатын, улуустааҕы дьарыктаах буолуу киинин, улуустааҕы ИДьО салайааччылара, исписэлиистэрэ төгүрүк остуол тула кэпсэтиигэ кытыннылар.
Доруобуйаларынан хааччахтаах дьоҥҥо тэхиньиичэскэй тэриллэри биэриигэ, санаторнай-курортнай эмтэнии, социальнай чэпчэтиилэр, хантараактар, доруобуйаларынан хааччахтаах дьону критерийдэринэн инбэлииккэ таһаарыы, бырайыас туһунан сиһилии иһитиннэриини оҥордулар.

Улуустааҕы көрбөттөр уопсастыбаларын бэрэссэдээтэлэ Светлана Семеновна Яковлева түмүк тыл эттэ:

— Оройуоннааҕы көрбөттөр уопсастыбаларыгар учуокка 148 киһи турарыттан, 68-һа харахтарынан отой көрбөт 1-кы группалаах инбэлииттэр, онтон атыттара 2-с, 3-с группалаахтар. Доруобуйаларынан хааччахтаахтар болҕомтоҕо наадыйалларын улуус баһылыга Алексей Михайлович Иннокентьев өйөөн, ааспыт сылтан кыаммат-түгэммэт доруобуйаларынан хааччахтаах дьоҥҥо болҕомтотун ууран, 1-кы группалаах инбэлииттэр дьиэлэрэ өрөмүөннэнэригэр, толору хааччыллыы киирэригэр 200 тыһыынча солкуобай үп көрүллэн үлэ барарыгар тус бэйэм, салайар кэлэктиибим аатыттан махталбытын биллэрэбит.
Биһиги уопсастыбабыт өрөспүүбүлүкэҕэ, улууска ыытыллар күрэхтэһиилэргэ мэлдьи кыттан миэстэлэһэр. Быйыл өрөспүүбүлүкэҕэ буолбут күрэхтэһиилэргэ 1 миэстэни, саахымакка, дуобакка, хабылыкка, хаамыскаҕа 2-3 миэстэлэри ылаттаабыппыт. Ыйдарынан былааннаан үлэ ыытабыт.
Бүтүн Арассыыйатааҕы көрбөттөргө аналлаах аахсыйаҕа уопсастыба сүрүн көмөлөһөөччүтэ, библиотекарь Александра Петровалыын бэйэбит уопсастыбабытыгар «Егоровскай ааҕыылары», «Далбар Хотун» куонкуруһу олус үчүгэйдик тэрийэн ыыттыбыт.

Аҕам саастаах далбар хотуттар: Киин балыыһа үлэһитэ Антонина Ксенофонтова — «Далбар Хотун», «Талба талаан» — Людмила Яковлева, «Сандалы Хотун» — Екатерина Лазарева, «Кэрэ куолас» — Светлана Степанова номинацияларынан бэлиэтэннилэр. Кэлэр нэдиэлэҕэ «Үрүҥ торуоска» ыйа түмүктэниитэ буолуоҕа.

***

Ааптар: Антонина СЕМЕНОВА