Ньурба улууһугар иккис сылын бэтэрээннэр уонна инбэлииттэр дьиэлэрэ өрөмүөннэнэр

Былырыыҥҥыттан Ньурба улууһугар тыа сиригэр олорор тыыл бэтэрээннэрин уонна 1-кы группалаах инбэлииттэр чааһынай дьиэлэрин оройуон үбүн суотугар өрөмүөннүүллэр. Саха сиригэр эрэ буолбакка, Арассыыйаҕа ханна да суох маннык быраактыканы  олохтоохтор улаханнык биһирииллэр.

Кырдьыга да, өскөтүн оройуоннар кииннэригэр уонна куораттарга олорор дьон уопсай дьиэлэрэ судаарыстыба суотугар өрөмүөннэнэр буоллаҕына, эргэ дьиэлээх эбэтэр толору хааччыллыыны киллэртэриэн баҕарар тыа киһитэ көмөттөн тоҕо матан хаалыахтааҕый. Оттон тыыл бэтэрээннэрэ уонна 1-кы группалаах инбэлииттэр нэһилиэнньэ саамай көмөҕө уонна болҕомтоҕо наадыйар араҥатынан буолаллар эбээт.

Быйыл эмиэ ааспыт сыллааҕы курдук, манна Ньурба улууһугар «АЛРОСА» АК дивидениттэн киирэр үптэн 20 мөл. солк. анаммыта. Дьон санаатын учуоттаан, улуус баһылыгын уурааҕынан маннык көмөнү ылар дьон араҥатыгар эбии ДЦП-лаах уонна уҥуох-сүһүөх ыарыылаах инбэлиит оҕолор, итиэннэ бойобуой дьайыылар кыттыылаахтара эбии киллэриллибиттэрэ. Аны быйылгыттан маннык көмөнү тыа сирин олохтоохторо эрэ буолбакка, улуус киинин олохтоохторо эмиэ ылар буоллулар. Улуустааҕы хамыыһыйа бу үбү көрөн муниципальнай тэриллиилэринэн тыырбыта. Улуус уонна нэһилиэктэр дьаһалталара, итиэннэ үлэни толорооччу урбаанньыттар бу үтүө дьыалаҕа тэҥҥэ үлэлэһэллэр.

Улуус дьаһалтатын социальнай уонна дьиэ кэргэн боппуруостарыгар сүрүннүүр исписэлииһэ Евгения Кириллинаиһитиннэрэринэн, күн бүгүн улуус үрдүнэн үлэ күүскэ бара турар. Матырыйаалынай көмө бастакы аҥара көмөнү ылааччы дьон 95%-гар ыытылынна. Барыта 103 сайабылыанньа киирбититтэн улуустааҕы хамыыһыйа 98 киһи бары ирдэбиллэргэ сөп түбэһэр уонна докумуоннара толору диэн көмөнү аныырга быһаарбыта. Ол иһигэр 46 — тыыл бэтэрээнэ, 1-кы группалаах 47 инбэлиит, ДЦП-лаах 5 инбэлиит оҕо уонна 1 бойобуой дьайыылар кыттыылаахтара бааллар.

Бүгүн, атырдьах ыйын 27 күнүгэр, улуустааҕы хамыыһыйа үлэ хаамыытын хонтуруоллуур соруктаах, Ньурбачаан, Дьиикимдэ, Сүлэ уонна Октябрьскай нэһилиэктэригэр сылдьан үлэлээтэ. Дьиикимдэҕэ «Киров-строй» ХЭТ 1 тыыл бэтэрээнин уонна 1 бастакы группалаах инбэлииккэ дьиэлэригэр хааччыллыыны киллэрбит. Дьон олорор усулуобуйата тупсубутуттан улаханнык астыналларын биллэрэр, кинилэр өттүлэриттэн үлэ хаачыстыбатыгар ханнык да сэмэ-суҥха суох. Антоновкаҕа 4 киһиэхэ хааччыллыыны киллэрии, сарайдарын өрөмүөнэ бүппүт, пластиковай түннүктэр туруоруллубуттар. Эмиэ манна «Киров-строй» ХЭТ бэдэрээтчит буолан үлэлээбит. Атын нэһилиэктэргэ үлэ салҕанар.

Сарсын улуустааҕы хамыыһыйа Марха уонна Маалыкай куустатыгар баран үлэ хаамыытын бэрэбиэркэлиэҕэ.
Түмүктээн эттэххэ, былырыын Ньурба улууһугар 112 тыыл бэтэрээнин уонна 1-кы группалаах инбэлиитин дьиэлэрэ өрөмүөннэммитэ эбэтэр толору хааччыллыы киллэриллибитэ. Быйылгыны кытта холбоон, улууска олорор тыыл бэтэрээннэрин 75%-нын уонна 1 группалаах инбэлииттэрин 72%-нын олорор усулуобуйалара тупсарыллыаҕа.

***

Ааптар: Геннадий Антонов