Курс валют
$
64.12
0.29
70.6
Курс валют
Курс валют
$
64.12
0.29
70.6
Меню
Поиск по сайту

НЬУРБА ЧУЛУУ ДЬОНУН ҮЙЭТИТЭР ГАЛЕРЕЯ АҺЫЛЫННА

26.06.2019 11:59 0
НЬУРБА ЧУЛУУ ДЬОНУН ҮЙЭТИТЭР ГАЛЕРЕЯ АҺЫЛЫННА

Ньурба улууһун дьаһалтатын дьиэтигэр судаарыстыбаннай уонна уопсастыбаннай деятеллэр сырдык ааттарын үйэтитэр галерея аһылынна. Манна оройуон киэн туттар чулуу салайааччылара, өрөспүүбүлүкэ судаарыстыбаннаһын атаҕар туруорууга, бөҕөргөтүүгэ уонна сайыннарыыга сүдү кылааттарын киллэрбит дьон мэтириэттэрэ бааллар.


Быйыл төрөөбүтэ 120 сыла туолбут САССР Ситэриилээх Кэмитиэтин Бэрэссэдээтэлэ Александр Гаврилович Габышев, САССР Совнаркомун Бэрэссэдээтэлин э.т. Степан Васильевич Васильев, Саха сиринээҕи Киин Ситэриилээх кэмитиэт Бэрэссэдээтэлэ Михаил Васильевич Мегежекскэй, сир оҥоһуутун бастакы наркома, САССР Ситэриилээх Кэмитиэтин Бэрэссэдээтэлин солбуйааччы Семен Николаевич Донской – I, САССР үөрэҕин бастакы наркома Семен Николаевич Донской – II, САССР үөрэҕин миниистирэ Семен Семенович Сюльскай, САССР Верховнай Сэбиэтин Президиумун Бэрэссэдээтэлэ Александра Яковлевна Овчинникова, Саха сиригэр дьахталлартан бастакы коммунист, дьахтар хамсааһынын тэрийээччи, Казахстан доруобуйа харыстабылын миниистирин солбуйааччы Дора Самуиловна Жиркова, политическэй деятель, РСФСР Үрдүкү Сэбиэтин Президиумун Бэрэссэдээтэлин солбуйааччы Анастасия Петровна Данилова, райсовет бэрэссэдээтэлэ, Саха Өрөспүүбүлүкэтин Үрдүкү Сэбиэтин бастайааннай кэмитиэтин бэрэссэдээтэлэ, Абый, Ньурба улуустарын баһылыга, СӨ экономика миниистирин солбуйааччы, Ил Түмэн Бэрэссэдээтэлин сүбэһитэ Варвара Андреевна Петрова ааттарынан Ньурба улууһун олохтоохторо киэн тутталлар. Кинилэр тустарынан өйдөбүлү көлүөнэттэн көлүөнэҕэ өйдөрүгэр-санааларыгар сүппэт гына иҥэрэр туһугар үлэ-хамнас былааннаахтык ыытыллар. Бу үтүө дьоммут мөссүөннэрэ үйэтитиллибит мэтириэттэрин галереята улуус дьаһалтатын дьиэтигэр аһыллар үөрүүлээх түгэнэ буолан ааста.


— Аны икки сылынан өрөспүүбүлүкэҕэ автономия тэриллибитэ 100 сыллаах үбүлүөйдээх тэрээһиннэрэ ыытыллыахтара. Хас биирдии улуус олохтооҕо, чуолаан эдэр көлүөнэ, биһиги автономиябытын төрүттэспит чулуу дьоммут, биир дойдулаахтарбыт биографияларын, үлэлэрин-хамнастарын туһунан билиэхтээхтэр. Онно бэлэмнэнэн Октябрьскай нэһилиэгэр судаарыстыбаннас түмэлин тутуллуохтаах. Бу улуу дьоммут олохторо, кинилэр тустарынан өйдөбүл устуоруйа биир кэрчигин быһыытынан бэйэтин сөптөөх миэстэтин булуохтаах, — диэн бэлиэтээтэ эҕэрдэ тылыгар улуус баһылыга Алексей Михайлович Иннокентьев.

Галереяҕа Ньурба чулууттан чулуу элбэх ахсааннаах дьонуттан 10 киһи мэтириэтэ аныгы ньыманан оҥоһуллан ыйаммыт. Улуус Сүбэтин бэрэссэдээтэлэ Сергей Иванович Евсеев «Саха сирин автономията сайдарыгар бэйэлэрин кылааттарын киллэрбит дьон ортолоругар бастакы икки наркомнарынан бырааттыы Донскойдар буолалларынан бары киэн туттабыт, судаарыстыбаннас түмэлэ аһыллан элбэх үтүөнү оҥорбут дьоммутун уйэтитэр туһугар улэ-хамнас барыахтаах«, — диэн чиҥэтэн эттэ.

Үбүлүөйдээх Александр Гаврилович Габышев сиэн балта, үлэ, тыыл бэтэрээнэ Саргылана Ивановна Скобелеватаайдарын аатын үйэтитиигэ ыытыллар үлэ иһин улуус баһылыгар махтанна, бу галереяҕа мэтириэттэрэ ыйаммыт дьону үксүлэрин оҕо сылдьан көрбүтүн, Донскойдар тобуктарыгар көтөхтөрөн олорбутун, Дора Самуиловнаны 50-60-с сылларга көрсүбүтүн туһунан аҕынна. А.Г.Габышев сиэн балта, Арассыыйа үтүөлээх, СӨ норуодунай артыыската Изабелла Васильевна Николаева махталы кытта улуус баһылыга А.М.Иннокентьевка тыйаатыр туһунан 3 томнаах кинигэни бэлэх уунна.

Ити курдук Ньурба улууһугар судаарыстыбаннас түмэлин тэрийиигэ бастакы тэрээһин ыытылынна.

***

Ааптар: Лариса ДОРОФЕЕВА

Оставить комментарий