Курс валют
$
66.42
0.08
75.22
0.4
Курс валют
Курс валют
$
66.42
0.08
75.22
0.4
Меню
Поиск по сайту

Гавриил Колесов аатын — Олоҥхо тыйаатырыгар

04.12.2018 14:35 2
Гавриил Колесов аатын — Олоҥхо тыйаатырыгар

Ахсынньы 3 күнүгэр өрөспүүбүлүкэ норуоттарын муусукатын, фольклорун мусуойугар Саха сирин норуодунай, РСФСР үтүөлээх артыыһа П.А. Ойуунускай аатынан судаарыстыбаннай бириэмийэ лауреата, суруйааччы Гавриил Колесов «Мелодия» фирмаҕа «Дьулуруйар Ньургун Боотур» олоҥхону грампластинкаҕа уһултарбыта 50 сылыгар анаммыт «төгүрүк  остуол» ыытылынна.

Тэрээһини иилээн-саҕалаан ыыппыт муусука, фольклор мусуойун сүрүн научнай үлэһитэ Варвара Обоюкова 1968 сыл балаҕан ыйын 5-25 күннэригэр Гавриил Колесов «Мелодия» фирма Ленинградтааҕы устуудьуйатын  звукорежиссера Геннадий Любимовтыын уон күн өрөбүлэ суох, метро үлэтэ уурайбытын кэнниттэн — түүн бииртэн үс чааска диэри, судаарыстыбаннай академическай капелла  улахан сценатыгар тиритэ-хорута үлэлээн, барыта тоҕус гигант пластинканы устубуттарын, онон «Дьулуруйар Ньургун Боотур» олоҥхону үйэтиппиттэрин кэпсээтэ. Биир оччо кэм пластинканы таҥыыга, техническэй ситэриигэ барбытын аҕынна. Бу туһугар ураты, урут ханна да суох үлэ научнай салайааччытынан филологическай билим хандьыдаата, ССРС НА аан дойду литэрэтиирэтин институтун научнай үлэһитэ Иннокентий Пуховбуолбута.

Кэпсэтиигэ саха олоҥхото киһи аймах чулуу айымньытынан билиниллиитигэр,  бүгүн олоҥхонон тыынарбытыгар, олорорбутугар, төрөөбүт норуоппут үйэлээх үгэстэрэ сөргүтүллэллэригэр Гавриил Гавриилович  үтүөтэ-өҥөтө сүдүтэ, кини тыыннаах куолаһа билигин даҕаны элбэх киһини иитэрин-үөрэтэрин тоһоҕолоон этилиннэ.

Тыл эппиттэр — муусука, фольклор мусуойун салайааччы, устуоруйа билимин хандьыдаата Аиза Решетникова, «Ыал култууратын киинин тэрийээччи» бырайыак ааптара, педагогическай үлэ бочуоттаах бэтэрээнэ Любовь Аргунова, А.И.Герцен аатынан университет бочуоттаах доктора, педагогическай билим хандьыдаата Матвей Мучин, Мэҥэ Хаҥалас улууһун дьокутааттарын сэбиэтин бэрэссэдээтэлэ Павел Сазонов, култуура үтүөлээх үлэһитэ Надежда Толбонова, Кэбээйитээҕи норуот тыйаатырын сүрүн режиссера Леонид Емельянов, поэт, суруналыыс Иван Николаев-Уххан уонна да атыттар — саха норуодунай артыыһа Гавриил Колесов аатын үйэтитиигэ санааларын үллэһиннилэр, тус көрүүлэрин билиһиннэрдилэр.

«Төгүрүк остуол» кыттыылаахтара Гавриил Гавриилович аатын Олоҥхо тыйаатырыгар иҥэрэргэ, олоҥхону толорооччуларга кини аатынан судаарыстыбаннай  бириэмийэни олохтуурга, П.А. Ойуунускай «Дьулуруйар Ньургун Боотур» олоҥхотун грампластинкаҕа уһултарбыт дьиэтигэр — Санкт-Петербурга баар М.И. Глинка аатынан судаарыстыбыннай  академическай капеллаҕа — өйдөбүнньүк дуосканы ыйыырга үлэни салгыы ыытарга этиилээх суругу ылынан, өрөспүүбүлүкэ судаарыстыбаннай былааһын, олохтоох салайыныы уорганнарын, туһааннаах тэрилтэлэри, биирдиилээн дьону өйүүллэригэр ыҥырдылар.

***

  1. Роман ПОПОВ, «Саха сирэ» хаһыат, edersaas.ru

Обсуждение • 2

Добавить комментарий
  1. Оннук!

    Кэлиэсэп аатын тыйаатырга!
    Андаатыр аатын Минэкологии! Пусть поставят во дворе памятник ондатре, давшему стране миллионы шапок!
    Фероян аатын Минстройга уонна Урдуку суукка!
    Бекетов аатын Танара дьиэтигэр!

  2. Тумэн

    Ылан кердеххе, кырдьык Олонхо уйэтитиитигэр элбэги онорбут киьи, того аатын биэрбэттэрэ буолла?🤔 БАС бэйэтин аатын бэрдэрээри уурдаран сытыарар ду😅

Оставить комментарий