Дьокуускайга “Дьиикимдэ дьээбэлэрэ” көрөөччүлэр биһирэбиллэрин ылла
- Кулун тутар 30 күнүгэр, Үүнэр көлүөнэ тыйаатырыгар “Дьиикимдэ дьээбэлэрэ” норуодунай көр-күлүү тыйаатырын киэһэтэ бэрт сэргэхтик, көрөөччүлэргэ күлүүлээхтик ааста. Кинилэр бу сыанаҕа 2001 сыллаахха, 24 сыл аннараа өттүгэр, Дьокуускай куорат олохтоохторугар бэйэлэрин билиһиннэрбиттэрэ.
Тыйаатыр артыыстара кылгас сыанкаларга оруолларыгар бэрт итэҕэтиилээхтик киирэн саалаҕа мустубуттары тохтоло суох күллэрдилэр. Дьэ, кырдьык, күлүүттэн олох уһуур диир буоллахтарына, хас эмит сылы эбиннэхпит буолуо диэн көрөөччүлэр санааларын атастастылар. Оттон ырыаһыт кыргыттар истиҥ ырыалара, тупсаҕайдык сыанаҕа тутуулара-хаптыылара көрөөччүлэри биһирэттэ.
Санатан кэпсээтэххэ, “Дьиикимдэ дьээбэлэрэ” Горнайга 1999 сыл сэтинньи ыйыгар төрүттэммитэ. Мытаах нэһилиэгин сынньалаҥ киинигэр дириэктэрдии сылдьар Владимир Николаевич Акимов сонун сүүрээни дьону түмэр сыалтан төрүттээбитэ. Ол кэмтэн олоххо буолар араас сыанкалары, күлүүлээх түгэннэри сыанаҕа толорон, сайдан, дьон биһирэбилин ылан барбыттара.
2001 сыллаахха Өрөспүүбүлүкэ көр-күлүү көрүү бэстибээлигэр Гран При үрдүк аатын сүкпүтэ 2004 сыллаахха “норуодунай” аат иҥэрилибитэ. Тыйаатырга бу 26 сыл устата нэһилиэк араас идэлээх дьоно, нэһилиэнньэ бары араҥата оонньоһоллор, оонньоспуттара. Билигин сорохтор атын улуустарга, куораттарга олороллор, үлэлииллэр эрээри, тыйаатырдарын өрүү истиҥник ахталлар, саныыллар.
“Дьиикимдэ дьээбэлэрэ” режиссердарынан араас кэмнэргэ Артур Николаевич Егоров, Владимир Владимирович Егоров сырыттылар. Репертуары барытын Артур Егоров суруйар, туруорар.
Тыйаатыр “КӨРКҮЛ”, “КӨР АБЫТАЙ” кэнсиэрдэринэн араас улуустарынан гостуруоллуур. Өрөспүүбүлүкэҕэ биһирэнэр “Без быара”, “Тайах мичээрэ”, “Көр бутугас” о.д.а. көр-күлүү шоуларыгар кыттар.
Кулун тутар 30 күнүгэр буолан ааспыт кэнсиэргэ тыйаатыр сүрүн артыыстара кытыннылар. Ол курудк тыйаатыры төрүттээччи, билигин Дьокуускай куоракка үлэлиир Владимир Акимов-Үрүҥ Һуба Оһокко тойон, Мытаах музей-галереятын дириэктэрэ Артур Егоров – Били киһи, “Дьиикимдэ дьээбэлэрэ” тыйаатыр дириэктэрэ Диана Максимова – Сайылык кыыһа Бэлэс Мэтэкэ Хотун, И.Е.Варламов аатынан Мытаах сынньалаҥ киинин дириэктэрэ Анастасия Мордовская, Мытаах нэһилиэгин ыччакка бэлиитикэтигэр салайааччы Сергей Высокомернай – Хотой, тыйаатыр артыыскалара, ырыаһыттара Сайыына уонна Мия Егоровалар.
***
Оставить комментарий