Бүлүү Эбэни туоруурга суол оҥоруутугар муус кыдьымаҕын ыраастаатылар

Сунтаар улууһун Аҕа баһылыга Анатолий Григорьев көҕүлээһининэн тэриллибит Сунтаарбыт улууһугар республиканскай «Спецназ добра Якутии” добровольческай хамсаныы Сунтаардааҕы салаата сэтинньи 7 күнүгэр, Бүлүү Эбэни туоруурга суол оҥоруутугар, муус кыдьымаҕын ыраастааһыҥҥа үлэ бырааһынньыгын тэрийдэ.

Үлэ бырааһынньыгар бары бииргэ түмсэн 120 тахса киһи бэйэтин баҕа санаатынан кыттыһан Сунтаар-Устье туорааһыҥҥа муус кыдьымаҕын ыраастаан айан суола түргэнник аһылларыгар күүс-көмө буоллулар.

Таһырдьа тымныыга үлэлии сылдьар дьоннорго тэрилтэ үлэһиттэрэ итии чэйинэн, арыылаах алаадьыннан күндүлээтилэр. Билиҥҥи туругунан муус халыҥа 20 сантымыатыры ааспыт.

Өрүү маннык көхтөөх, түмсүүлээх  буолуохха.

***

«Сунтаар улууһа (оройуона)» муниципальнай оройуон дьаһалтатын пресс-сулууспата