Ааҕыы көлүөнэни ситимниир

2019 сыл кулун тутар 31 күнүгэр Дьокуускай куораттааҕы национальнай гимназияҕа “Ааҕыы көлүөнэни ситимниир” оскуола-дьиэ кэргэн холбоһуктаах Проект чэрчитинэн сэттэ үйэни ситимниир Таатта Баайаҕатын биир кыраһыабай баһа “Байымаайы” үрэхтэн олохторо тардыылаах биир “Тээкэ” аҕа ууһа Дедюкиннар аймах ытык кырдьаҕаһыттан кыра оҕотугар дылы түмсэн көлүөнэттэн көлүөнэҕэ бэриллэр дьиҥ “Народнай педагогика” үтүө холобурун көрдөрдүлэр.

Тэрээһин сүрүн оҥкула тыыл, Полярнай авиация ветерана, хотугу муустаах акыйаан биллибэт байҕалын чинчийии үлэтин көтөр аалынан хааччыйыыга олоҕун анаабыт, сахалартан соҕотох бастакы уонна уһуннук үлэлээбит полярнай летчик Дедюкин Афанасий Ефремович 85 сааһын туолбут дьоһун кэмин бэлиэтээһин тула барда.

Кыттыыны ыллылар: СР транспорт Департамена, “Полярнай авиалиния” АО, республика, куорат ветераннарын советтара, Центральнай округ управата, гимназия үлэһиттэрэ, үөрэнээччилэрэ, “Тээкэ удьуора” аймах, уонна Афанасий Ефремовичка аналлаах сабыс-саҥа, “Таатта хаһыата” редакцияҕа бэчээттэммит буруолуу сылдьар “Мне до сих пор снится, что я летаю” кинигэҕэ киирбит ыстатыйалар автордара.

Дьоро күн Дедюкиннар сиэн уоллара РФ художниктарын союһун чилиэнэ Яроев Вячеслав Васильевич уруһуйдарын выставкатын аһыыттан, алгыс тылтан, арчылааһынтан, биир дойдулаахтара СР культуратын туйгуна Станислав Николаевич Луковцев авиацияҕа аналлаах коллекциятын көрүүттэн уонна сэттэ көлүөнэни ситимниир толору оҥоһуллубут “Тээкэ удьуора” родословнайы билсиһииттэн, кэлбит хаан-уруу аймах онно бэлиэтэниититтэн саҕаланна.
Салгыы 300 миэстэлээх залы толору киирэн олорууну классическай музыканан доҕуһуоллуу көрүстүлэр СР культуратын туйгуна Дедюкин Андрей Семенович 2012 сыллаахха тэрийбит, салайар, пианист Дедюкин Артем кыттыылаах “Арко Артико” симфоническай ансамбль.

Ытык дьон: Афанасий Ефремович кэргэнэ РФ Доруобуйа харыстабылын, фармациятын туйгуна Старостина Татьяна Гаврильевна, бииргэ төрөөбүттэрэ- 90 саастаах тыыл ветерана, сүүрүк, булчут Дмитрий Ефремович, 82-лээх ССРС эргиэнин туйгуна Анна Ефремовна, убайдарын сэрии ветерана Семен Ефремович уола супермарафонец, Аан-дойду, Европа хас да төгүллээх кыайыылааҕа, призера, Россия сборнай хамаандатын чилиэнэ, сүүрүүгэ международнай кылаастаах маастар Семен Семенович Дедюкин, сааһын тухары учууталлаабыт Николай Ефремович кэргэнэ РФ журналистарын союһун чилиэнэ Татьяна Афанасьевна- Татыйаас алгыстарын ылына сиэн оҕо-аймах летчик Афанасий олоҕун кэрдиис кэмнэрин кэпсии, ырыанан-тойугунан киэргэтэ тоҕуоруспуттара олус кэрэхсэбиллээх, истиҥ-иһирэх буолла.
“Остуол тула олорон сэһэргэһии” диэн тэрээһин иккис чааһын РФ уопсай үөрэхтээһинин бочуоттаах үлэһитэ, СР үөрэҕириитин туйгуна, гимназия саха тылын учуутала Анисимова-Дедюкина Галина Семеновна иилээн-саҕалаан ыытта.

Дьоро күнү тэрийбит, киэҥ аймаҕы түмпүт, ыччаттары бэлэмнээбит кэргэннии Люция Ильинична, Михаил Семенович Дедюкиннарга, ООО “Дизайн-студия “Уран” директора Екатерина Степановна Яроеваҕа, Галина Семеновнаҕа бары дириҥ махталларын тиэртилэр.

***

Михаил Дедюкин,  

Дьокуускай к.