Успуорт миниистирэ Ньурба 1 №-дээх оскуолатын саҥа былаһааккатын аһыллыытыгар кытынна

Балаҕан ыйын 14 күнүгэр, Степан Васильев аатынан Ньурба 1 №-дээх орто оскуолатын саҥа спортивнай былаһаакката үөрүүлээхтик аһылынна. Тэрээһиҥҥэ СӨ успуордун миниистирэ Иннокентий Григорьев, улуус уонна куорат салайааччылара, үөрэнээччилэр уонна успуорт уопсастыбаннаһа кытыннылар.

Тэрээһин сахалыы сиэринэн-туомунан уонна оскуола бастыҥ спортсменнарын параадынан саҕаланна. Арасссыыйа, Саха сирин уонна Ньурба улууһун гимнэрэ дуораһыйда.

Оскуола попечителэ, Ил Түмэн сис кэмитиэтин бэрэссэдээтэлэ Владимир Прокопьев эҕэрдэ тэлигирээмэтин ааҕан иһитиннэрдилэр. Оскуола дириэктэрэ Валентина Васильева спорт-былаһаакка тутуутугар уонна манна аналлаах оборудование ылыытыгар көмөлөспүт салайааччыларга, тутааччыларга истиҥ махталын анаата, оҕолор успуордунан дьарыктаналларыгар саҥа былаһаакка улахан көмөлөөх буолуоҕун бэлиэтээтэ, итиэннэ Иннокентий Григорьевка «Школа окнами на Вилюй» кинигэни уонна сувениры туттарда.

Иннокентий Григорьев успуорт эйгэтигэр кэнники бэлиэ түгэннэр тустарынан иһитиннэрдэ, саҥа былаһаакка аһыллыытынан сибээстээн оҕолорго үтүөнү баҕарыыларын тиэртэ, физкултуура учуутала Елена Максимоваҕа «СӨ физическэй култууратын уонна успуордун туйгуна» түөскэ анньыллар бэлиэни, успуорт управлениетын кылаабынай исписэлииһэ Роберт Алексеевка уо.д.а. министиэристибэ Махтал суруктарын туттарда. Салгыы физическэй култуура уонна успуорт управлениетын салайааччыта Александр Максимов, улуус баһылыгын социальнай боппуруостарга солбуйааччыта Анна Уларова, Ньурба к. баһылыгын солбуйааччыта Яков Замятин, улуустааҕы үөрэх управлениетын салайааччытын солбуйааччыта Данил Федоров, оскуола 1970 сыллааҕы выпускнига, успуорт бэтэрээнэ Римма Угапьева эҕэрдэлээтилэр.

«Снежный барс» байыаннай-спортивнай оонньууга ситиһиилэммит оҕолорго Махтал суруктар уонна грамоталар туттарылыннылар. Оҕолортон харда махтал тылын Герман Степанов эттэ.

Өрөгөйдөөх быһыыга-майгыга аалай лиэнтэ быһылынна. Успуорт былаһаакката 40х20 м кээмэйдээх, искусственнай бүрүөһүннээх, футбол, волейбол уонна баскетбол оонньуурга анаан оҥоһулунна.

Бу эбийиэккэ тутуутугар улуустан үп көрүллэн, бэдэрээтчитинэн Тимофеев А.В. ИП үлэлээтэ. Артем Тимофеев кэпсииринэн, үлэлэрин атырдьах ыйыгар саҕалаан бу болдьоҕор бүтэрэн киллэрдилэр. Былаһаакка олоҕун бетоннаатылар, каркаһын уонна сиэккэтин оҥордулар. 10-ча киһилээх биригээдэ үлэлээтэ.
«Үксүн попечительство бэрээдэгинэн үлэлээтибит, — диир кини. — Тоҕо диэтэххэ, 1 мөлүйүөн солкуобай манна аҕыйах, дьиҥнээх сыаната 1,5 мөлүйүөн солкуобай кэриҥэ, онон саҥа былаһаакка оҕолорбутугар хайдах курдук наадалааҕын өйдөөн, оскуолаҕа көмөлөһөн үлэлээтибит».

Бу кэнниттэн мини-футболга Ньурба 1 №-дээх оскуолатын Кубогар күрэхтэһии ыытылынна. 7 хамаанда кыттыбытыттан, хаһаайыттар — бастакы, Антоновка оскуолата — иккис уонна Ньурбатааҕы техлицей хамаандата үһүс миэстэ буоллулар.

СӨ физическэй култуураҕа уонна успуорка миниистирэ Иннокентий Григорьев уонна министиэристибэ тутуу отделын салайааччыта Петр Сивцев Ньурба к. урут саҕаланан баран тутуута тохтоон турар Физкултуурунай-чэбдигирдэр комплекска уонна стадиоҥҥа сырыттылар, Антоновкаҕа федеральнай бырагырааманан спорт комплексын тутуутун көрдүлэр-иһиттилэр.

«Барт-Строй» производственнай-тутуу фирматын дириэктэрин солбуйааччыта Владимир Терентьев уонна улуус баһылыгын тутууга, ОДЬКХ-ҕа солбуйааччыта Макар Семенов үлэ хаамыытын иһитиннэрдилэр. Бэдэрээтчиттэр эбийиэги ыйыллыбыт болдьоҕор бүтэрэн үлэҕэ киллэрэргэ соруктанан үлэлииллэр. 3 күнүнэн бетон үлэтэ бүтэр, оптуорунньуктан сэндвич-панелларынан эркинин үлэтэ саҕалаан 10-ча күнүнэн бүтэриэхтээхтэр. Тутааччылар түннүктэрин, ааннарын куоракка сакаастаабыттар, харчыта төлөммүт.

 
Октябрьскай нэһилиэк дьаһалтатыгар өрөспүүбүүкэ успуордун уонна улуус салайааччылара кыттыылаах сүбэ мунньахха Антоновкаҕа спорт комплексын тутуутун, Крахмалга баар базаны улуус бас билиитигэр босхо биэрии, Ньурба к. Физкултуурунай-чэбдигирдэр комплекс тутуутун кэскиллээх боппуруостарын уо.д.а. дьүүллэстилэр.

***

Ааптар: Геннадий Антонов