«СҮРЭХТЭР КЭПСЭТЭР КЭМНЭРЭ» ӨРӨСПҮҮБҮЛҮКЭТЭЭҔИ ЫРЫА КУОНКУРУҺУГАР ХОТУ ДОЙДУ УОЛА ЧАҔЫЛХАЙДЫК КЫАЙДА!

Кулун тутар 30 күнүгэр куонкурус бастакы түһүмэҕэ «Туймаада» ырыа судаарыстыбаннай ансаамбылын камернай саалатыгар буолбута. Оттон иккис түһүмэҕэ уонна кыайыылаахтартан түмүллүбүт гала-кэнсиэр нөҥүө күнүгэр П.А.Ойуунускай аатынан Саха академическай тыйаатырыгар «Сүрэхтэр кэпсэтэр кэмнэрэ» диэн Саха Өрөспүүбүлүкэтин норуодунай артыыһа, самодеятельнай композитор, Саха Хомсомуолун бириэмиэйтин лауреата, Саха Өрөспүүбүлүкэтин бочуоттаах гражданина Аркадий Михайлович Алексеев ырыаларынан өрөспүүбүлүкэтээҕи куонкурус быйыл онус сылын ыытылынна. Бу иннинэ куонкурус Мэҥэ Хаҥалас нэһилиэктэринэн ыытыллыбыт буоллаҕына быйылгы үбүлүөйдээх тэрээһин Дьокуускай куоракка бэрт ситиһиилээхтик, киэҥ далааһыннаахтык ааста. Куонкурус ирдэбилинэн 35-тэн үөһээ саастаах анал музыка идэтэ суох, эстрадаҕа ырыаһыт быһыытынан биллибэт дьон кыттар.  Иккилии ырыаны толороллор, онтон биирэ хайаан да Аркадий Алексеев ырыата, иккиһэ — кыттааччы бэйэтэ сөбүлээн толорор ырыата.

Быйылгы куонкуруска  Сахабат сирин 10 улууһуттан уонна Дьокуускай куораттан кытыннылар. Дьүүллүүр сүбэ бэрэссэдээтэлинэн Саха Өрөспүүбүлүкэтин үтүөлээх артыыһа, сахабыт эстрадатын примадонната -– Сахая иилээн-саҕалаан үлэлээтэ. Кинини сэргэ Саха Өрөспүүбүлүкэтин норуодунай артыыһа Владимир Татаринов, В.А.Босиков аатынан Муусука үрдүкү оскуолатын үрэр оркестрын уус-уран салайааччыта Александр Куьмин, Н.Н.Васильева аатынан Майатааҕы норуодунай хор хормейстера Саргылаана Павлова уонна «Саха» НКИХ суруналыыһа Георгий Белоусов кыттааччылары көрдүлэр-иһиттилэр, сыаналаатылар. «Талаан — норуокка баар» дииллэрэ чахчы, айылҕаттан ыллыыр дьоҕурдаах уонна Аркадий Алексеев айар үлэтин сүгүрүйээччилэрэ муһуннулар. Бииртэн биир эриэккэс куоластаах дьон ыллаан-туойан ырыа бырааһынньыгын өссө киэргэттилэр. Хас биирдии финалистарга анал номинациялар, сыаналаах бириистэр туттарылыннылар. Оттон муҥутуур кыайыылаах, гран-при 100000 солк. уу харчынан наҕараадаланна. Оннук кыайыылааҕынан ыраах Орто Халыма Эбээх бөһүөлэгиттэн сылдьар Анатолий Гуляев диэн эдэр киһи ааттанна. Куолаһа — сөҥ, хойуу, эттээх баритон.  Кини Аркадий Алексеев айбыт «Умнуллубат ол кустук» , «Мин хотугу тиитим» ырыаларын олус иэйиилээхтик толорон хас биирдиибитин долгутта, ураты турукка киллэрдэ, сүргэбитин көтөхтө. Хайдах курдук ыллаан бүтээтин кытта ытыс тыаһа хабылла түстэ. Анатолий 36 саастаах эбит, үрдүк үөрэхтээх саха тылын учуутала идэлээх эрээри, билигин чааһынай тэрилтэҕэ үлэлиир. Кэргэннээх, оҕолоох. «Ырыаҕа кэнники сыстыбытым уонна онтон ылата ырыа миигин куруук батыһа сылдьар» диэн билинэр.

Маны сэргэ куонкуруска ансаамбыллар (дуэт, трио, квартет о.д.а.) туспа күрэхтэстилэр. Кинилэр бириистэрэ -– 80000 солк. Намыын-намчы ырыаларынан,  куоластара уурбут-туппут курдук тэҥҥэ дьүөрэлэһиитинэн Майа сэлиэнньэтиттэн «Сардаана» квартет (уус-уран салайааччы СӨ култууратын үтүөлээх үлэһитэ Сардаана Осипова) кыайыы өрөгөйүн биллэ. Бастыҥ баянист аатын Саха Өрөспүүбүлүкэтин култууратын туйгуна Георгий Попов сүктэ.

«Сүрэхтэр кэпсэтэр кэмнэрэ» өрөспүүбүлүкэтээҕи ырыа күөн күрэһин сыллата Аркадий Михайлович биир дойдулаахтара Мэҥэ Хаҥалас улууһун дьаһалтата тэрийэн ыытара, өйүүрэ, сүрүн бириистэри олохтуура хайҕаллаах суол диэн бэлиэтиэҕи баҕарыллар.

Өссө төгүл кыайыылаахтары эҕэрдэлиибит! Аныгы куонкуруска саҥа ааттары, талааннары күүтэбит!

Бэйэ корр.

***

Aartyk.Ru