Бүгүн Ийэ күнүн көрсө, саха кэрэ кыыһын дьиҥ кэрэтин, уратытын, сахалыы өйүн-санаатын, кутун-сүрүн кынаттаабыт, улуустааҕы «Мисс Горный» куоҥкурус кыттыылаахтара, Кэрэ Куоларбыт билигин тугу үлэлии-хамсыы, айа-тута сылдьалларын билистибит.
Улууска аан бастакы «Мисс Горный» кыайыылааҕа Ольга Борисова.
Биллэн туран, маннык улахан тэрээһиннэр тус олохпор чаҕылхай суолу-ииһи арыйбыттара.
Саамай күндү дьоннорум ийэм, чугас аймахтарым, дьүөгэ кыргыттарым сүбэлэрэ-амалара, көмөлөрө туохтааҕар да үрдүк сыанабыл буолар. Кинилэргэ махталым хаһан да уҕараабат.
Мин билигин Нерюнгрига олоробун. «Саханефтегаз» филиалын кылаабынай бухгалтера буолабын. Бу эйгэҕэ өр үлэлээтим. Дьолум чөмчүүгэ — уол оҕолоохпун.
Киэҥ сирдэри кэрийэрбин, көрөрбүн-истэрбин билиибин хаҥатарбын, сынньанарбын ордоробун. Ону таһынан ырыаҕа олус чугаспын. Ыллыыбын, араас куоҥкурустарга кыттыыны ылабын.
Киһи баҕа санаатын бириэмэтигэр куоттарбакка
ситиһэргэ дьулуһуохтаах. Ол буолар олох үрдүк чыпчаалыгар дабайыы.
Полина Аргунова — «Мисс Горный — 2000»
Саҥа үйэ кирбиитигэр 2000 с бу куоҥкуруска ситиһиилээхтик кыттыбытым. Ону таһынан, саҥа үйэҕэ анаммыт «Мисс Интернет» үрдүк аатын бар дьон куоластааһынынан ылбытым. Ол саҕана аан бастакы титул этэ, ЯГУ кафедрата төрүттээбитэ. Дьокуускайга интернет Киинин дириэктэрэ Анатолий Жожиков туттарбыта. Элбэх киһи миигин билэр-истэр буолбута ураты долгутуулаах, үөрүүлээх этэ.
Мин фармацевт идэлээхпин, билигин бу эйгэҕэ үлэлии сылдьабын.
Саха Далбар Хотуна олус муударай, тулуурдаах айылҕаттан талааннаах, элбэҕи билэ-көрө сатыыр. Ис иһиттэн иэйэр-куойар айылгылаах.
Санааларбын сааһылаан, суруйабын-бичийэбин. Бастакы кинигэм күн сирин көрбүтэ. Хоһооннорбун ырыа гынан бар дьоммор бэлэх уунабын. Олохпор саҥа сүүрээним сүргэбин көтөҕөр.
Аттыбар күндү ийэм, оҕолорум, чугас аймах-билэ дьонум, дьүөгэлэрим баалларыттан дьоллоохпун.Төрөөбүт дойдубун олус күүскэ таптыыбын. Тулалыыр айылҕабыттан күүс-уох ылынабын. Саха буоларбынан киэн туттабын.
Бар дьоммор ситиһиини, дьолу-соргуну, итэҕэйсиини, табыллыыны баҕарабын.
Евгения Ноговицина — «Мисс Горный — 2001»
Кэрэни кэрэһэлиир куоҥкуруска X-с кылааска үөрэнэ сылдьан кыттыбытым. Учууталым Вера Федорова бэлиэтии көрөн, көҕүлээн, кичэйэн кыһаллан туран бэлэмнээбитэ. Кыра эрдэхпиттэн сыанаҕа ыллаан, үҥкүүлээн улааппыт буолан, олус үөрэн-көтөн, долгуйан туран кыттыбыппын өйдүүбүн. Улууспут нэһилиэктэриттэн биэс буолан куоҥкуруһу ааспыппыт. Олус үчүгэй тэрээһиннээх куоҥкурус буолбута. Ити кэми билигин да астына саныыбын.
«Кэрэ Куо» куоҥкурска кыттыым тус олохпор элбэх умнуллубат түгэннэри бэлэхтээбитэ. Эһиилги сылыгар 2002 с. Горнайым аатыттан «Мисс Якутия» куоҥкуруска кыттан, l «Вице-мисс Якутии» аатын сүкпүтүм. Улахан миэстэҕэ тиксэн олус дьолломмутум. Онно Саха сирин араас улуустарыттан уопсайа 16 кыыс кыттыыны ылбыта.
Мин билигин 4 оҕо амарах ийэтэ буолабын. Кэргэмминээн бэйэ дьарыктаахпыт.Ону сайыннарарга сүрүн болҕомтобутун уурабыт.
Дьиэ кэргэнинэн айылҕаҕа сынньанарбытын олус сөбүлүүбүт. Иллэҥ кэммэр сахалыы симэхтэри оҥорорбуттан, оҕолорбор минньигэс араас аһы астыырбыттан күүс-уох ылынабын. Киһи хаһан баҕар сайда-үүнэ туруохтаах. Дьолун уйатын харыстыахтаах, араҥаччылыахтаах.
Саамай күндү дьонум күн күбэй ийэм, бииргэ төрөөбүт быраатым уонна кини дьиэ кэргэнэ буолаллар. Кинилэр ситиһиилэриттэн, олоххо тардыһар күүстээх санааларыттан кынаттанабын.
Биир дойдулаахтарбар, олохтоох хаһыаппыт эрэллээх ааҕааччыларыгар чэгиэн-чэбдик туругу, уйгуну-быйаҥы, иллээх-эйэлээх олоҕу ис сүрэхпиттэн баҕарабын.
Ирина Андреева — «Мисс Горный — 2002»
Screenshotбиир бастыҥ, кэрэни үксэтэр «Кэрэ Куо 2002» куоҥкуруһугар кыттыбыт дьоллоохпун.
Манна саҥа үүнэн-сайдан, ситэн-хотон эрэр кыргыттар сэттэ буолан үрдүк сыанаҕа аан бастакыбытын тахсыбыппыт.
Барыта сонуннук уратытык, олус тэрээһиннээхтик ааспыта. Дьокуускайтан «Мисс Якутии» куоҥкурус президена Лена Голубь бэйэтинэн кэлэн, дьүүллүүр сүбэҕэ үлэлээбитэ.
Мин VII кылаастан «Сайдыына» Нарыйаана Уус кыыһа куруһуогар кэрэ эйгэҕэ дьарыктаммыт буоламмын, сыанаҕа холкутук туттарга- хаптарга бэлэм этим. Оҕолорго анаан маннык куруһуоктар бааллара олус көмөлөөх буоларын өйүүбүн уонна махтанабын.
Кэрэ диэн үчүгэйгэ, сайдыыга тардыһыы буоллаҕа, биллэн туран бу куоҥкурус бигэ эрэли кынаттаабыта.
Улуустааҕы нэһилиэнньэ социальнай көмүскэлин кэлим киинигэр 13 сылтан ордук үлэлии сылдьабын.
Түөрт оҕо тапталлаах ийэтэ буолабын. Бары бииргэ айылҕаҕа сылдьарбытын сөбүлүүбүт. Инним диэки хардыылыырбар мэлдьи күүс-көмө өйөбүл буолар, ийэм тэҥэ күндү киһибэр, аҕам бииргэ төрөөбүт балтытыгар Римма Иннокентьевнаҕа махталым, тапталым улахан.
Screenshot
ScreenshotОлоххо ахтыыбынай көрүүлээх-истиилээх, сайдыылаах, бигэ тирэхтээх дьону сыаналыыбын.
Күннэй Иванова — «Мисс Горный — 2010»
Оскуолабын бүтэрэр сылбар бу «Кэрэ Куолар » куоҥкурустарыгар кыттыыны ылбытым. Саамай долгутуулаах умнуллубат кэрэ-бэлиэ сылым. Өссө эбиитин кыайыылаах үрдүк аатын сүгэр дьолу билбитим.
Кыра оҕо эрдэхпиттэн бу куоҥкуруска кыттар кыргыттары сэргии, сэҥээрэ көрөөччүбүн. Уонна хайаан да кыттарга сыал-сорук туруоруммутум. Ол баҕа санаабын толоруум, үрдүк ситиһиилэрбэр бастакы хардыым буолар.
«Мисс Горный» куоҥкурус миэхэ элбэҕи биэрбитэ. Бэйэбэр эрэниим улааппыта, туруорбут сыалбын ситиһиэхпин сөп эбит диэн бигэтик өйдөөбүтүм.
Улууспар Кэрэ Куо хаһаайката буоларым быһыытынан, уопсастыбаҕа тутта-хапта сылдьарым, тылбын-өспүн көрүнэрим өссө күүскэ үрдээбитэ.
2015 сыллаахха суруналыыс идэтин баһылаан, төрөөбүт дойдубар «Саха Көрдөрөр иһитиннэрэр хампаанньа» Горнайдааҕы филиалыгар редакторынан үлэбин саҕалаабытым.
Кэлин ини-бии Семен, Софрон Даниловтар ааттарынан Духуобунас киинигэр уус-уран салайааччынан ситиһиилээхтик үлэлээбитим.
2021с. дьиэ кэргэммин кытта дойдубут тэбэр сурэҕэр Москва куоракка көһөн олоробут.
Кэргэмминээн урбаанынан дьарыктанабыт. Вайлберис атыы эргиэн ситимигэр баарбыт.
Тус олохпор, инники хардыыбар күүс-уох биэрэр саамай чугас дьоннорум күн сирин көрдөрбүт күн күбэй ийэм, тапталлаах кэргэним, оҕолорум буолаллар.
Дьиэ кэргэммин, доҕотторбун кытта бииргэ бириэмэ атаарарбын, аһаҕастык ирэ-хоро кэпсэтэрбин ордоробун.
Араас дойдуларынан, куораттарынан сылдьабыт. Билиибитин-көрүүбүтүн хаҥатабыт.
Бүгүн ураты болҕомтону уурар, Сахабыт сиригэр Ийэ күнэ бэлиэтэнэр. Түгэнинэн туһанан, күн сирин бэлэхтээбит тапталлаах күндү ийэбин Мария Романовнаны итиитик-истиҥник эҕэрдэлиибин. Кытаанах доруобуйаны, этэҥҥэ буолууну баҕарабын.
Ааҕааччыларга, хаһыат үлэһиттэригэр, биир дойдулаахтарбар сыал-сорук туруорунан баҕа санааҕыт хоту эрэллээхтик баран иһиҥ диэн баҕа санаабын ыытабын. Туохтан да толлор, чаҕыйар буолумаҥ. Эйэлээх-иллээх олох туһугар үтүө кылааппытын киллэрсэ туруоҕуҥ.
«Мисс Горный — 2016 » кыайыылааҕа — Арылыйа Слепцова.
Бу куоҥкурска 2016 с. кыттыбытым, бу сыл миэхэ умнуллубат сылым буолар. Куоҥкурус V түһүмэхтээх этэ, бииргэ кыттар кыргыттарбын кытта наһаа үчүгэйдик билсэн, бэлэмнэнэн, бэйэ-бэйэбитигэр көмөлөсүһэн биир тыынынан барыта ааспыта. Учууталбыт Туйгууна Ивановна күүс-көмө буолбута.
«Надежда» диэн муода-кэрэ студияҕа дьарыктанар буоламмын, үрдүк сыанаттан толлубатаҕым.
Маннык улахан куоҥкуруска кыттыым тус кыахпар эрэллээх буоларбар сирдээбитэ.
Мин медикпын. Дьокуускайга ГАУ РС(Я) Поликлиникаҕа 1 учасковай медицинскэй сиэстирэнэн үлэлиибин. Сыл анараа өттүгэр ийэ буолар дьолу билбитим. Кырачаан уол оҕобор күн сирин көрдөрбүтүм.
Иллэҥ кэммэр спордунан дьарыктанабын.
Саамай күндү, тумус туттан холобурдуур дьоннорум миэхэ төрөппүттэрим буолаллар. Онтон күүһү-уоҕу кыракый уолчааным биэрэр. Кини туһугар тугу барытын кыайыах курдукпун.
Биир дойдулаахтарбар хаһан да, туохтан да толлубат буоларгытыгар баҕарабын.
***
Нина Сутакова, “Үлэ күүһэ”
Оставить комментарий