Курс валют
$
92.26
0.33
99.71
0.56
Курс валют
Курс валют
$
92.26
0.33
99.71
0.56
Меню
Поиск по сайту

Түүрдэр түҥкүлүйүүлэрэ

26.01.2016 11:00 0

Сахалыы саҥардан эрэбин Айыы Сиэн

Түүрдэр түҥкүлүйүүлэрэ
       Үрдүк Мэҥэ Күөх Халлаан  бэйэтин анныгар айбыт уолаттарын айылҕаларыттан уонна айылгыларыттан тэйитэн тобулу үктүөхтэрин,батары баттыахтарын баҕарбыт кытай омук баһылыктара, үгүс даҕаны үйэлэр усталарыгар төбөлөрүн түүнүгүрдүбүттэрэ,бастарын сыспыттара,санааларын саппаҕырдыбыттара. Хайдах гынан, тугу тобулан, ханнык бэйэлээх албастарынан абылаан,түөкэйдэринэн  үктэтэн, балыырдарынан баһыйан кинилэри истигэн илдьириискэ,куттас кумалаан,толоругас кулут гынан баран устунан сир ийэ үрдүттэн сиик гынан симэлитиэхтэрин саныыллара, күн сириттэн күл гынан көтүтүөхтэрин, күрэтиэхтэрин көрдүүллэрэ.Утуйар уулара уйгуурбута, аһыыр астара аһааҕырбыта, түптээх олохторо түлээҕирбитэ.    Ханна баарый, туохха тирэҕирэрий, кинилэр халбаҥнаабат ис эйгэлэрин тулҕадыйбат тутуллара,бигэ акылаата, акыйаантан  акыйааҥҥа диэри, байҕалтан байҕалга дылы  киэҥ кэйээр, улуу нэлэһийэр нэлэмэн истиэп, тыа хонуу олохтоохторун көстүбэт кистэлэҥ күүстэрэ.   Ити курдук саныыллара, атын даҕаны ааттаах саарыстыбалар солбуллубат суолталаах сололоохторо, чиэски дойдулар  чымаан үрдүк чыыннаахтара, суураллыбат  хааннаахтара, ыраах даҕаны дойдулартан ыраланаллара ыраахтааҕылара. Бастыҥ кыргыттарын ойох биэрэн бараабыттара, олохторун отуорун огдолутан көрөллөрө, өлөрөллөрө, өһөрөллөрө, уоттууллара, уматаллара.  Ол эрээри  син биир кинилэр, өр өтөр кэминэн өндөс гыммыттара, өрө күөрэйбиттэрэ эрэ баар буолан иһэрэ.  Оо, бу батастара сытыытын, бу куйахтара бөҕөтүн, охторо бэргэнин, сылгыларын сырыыта сыыдамын, аттарын айана айааһын. Бэйэлэрэ кентаврдар курдук хорсуннарын, харса суохтарын, өлбөт үөстээхтэрин, өрүүтүн өс саас ситиһэн тэйэллэрин. Бу киэҥ кэйээр, улуу истиэп уолаттарын, төҥкөйбөт төбөлөөх, кыырык бас хаардаах хайалар уолаттарын уолдьуганнаарылар, үгүс даҕаны Им биэрээччилэр эстибиттэрэ, бастыҥ баатырдара, дуулаҕа бухатыырдара куйахтара кумаламмыта, бастара быстыбыта, төбөлөрө төкүнүйбүтэ. Улахан даҕаны куораттар урусхалламмыттара, килиэ халаа хаарыан кириэпэстэрэ хампарыйбыттара. Ити курдук, кыайбат кыһалҕатыгар кыһарыйтаран, кыынньан, най баран, сиҥнэригэр түһэн сырыттахтарына, ол өйүнэн үөтүллүбэт өрдөөҕү кэмнэргэ, былыргы сахтарга биир бөһүлүөк кытай сиригэр төрөөн үөскээн баар буолбута эбитэ үһү.

Ол киһи огдолуйбут олохтоох, үүрүллүбүт, үтүрүйүллүбүт, кэриим хамнасчыта аатыран, кыр өстөөхтөрүн үөһүгэр өр кэмнэргэ, көс олохтоохторун ортолоругар бэрт уһуннук соҥнонон олорбута. Олохторун-дьаһахтарын, сиэрдэрин -туомнарын, майгыларын-сигилилэрин, аан дойдуну анаарыыларын, сир халлаан тутулун көрүүлэниилэрин, итэҕэллэрин, үгэстэрин үөрэппитэ уонна дьэ өйдөөбүтэ, кинилэр түҥнэстибэт төлкөлөрүн, уҕараабат уохтарын, эстибэт сэниэлэрин, көҕүрээбэт күүстэрин, сындалыйбат сындааһыннарын, хантан ылалларын, туохха олоҕуралларын. Дьэ, ол эрэ кэнниттэн, дьэбин буолан тэһэ сиэхтээх, кирис быатын быһа кэрбиэхтээх,таммах буолан тааһы даҕаны тэһиэхтээх толкуйун тобулбута. Түүрдэр өрүүтүн өбүгэлэрин үгэһин үөдүтэр үтүө үөрүйэхтээхтэр, үөрэхтээхтэр эбит. Айбыт Аҕа халлааннарын тутулугар сүгүрүйэр сүрүннээхтэр, андаҕайар айылҕалаахтар эбит. Ол кимиэхэ барытыгар күннээх даҕаны халлааҥҥа көстөрүн курдук ыраас арылхай уонна чаҕылхай, илии тарбахтарын ааҕарын курдук аҕыйахтар. Ханнык даҕаны өрөкүйэр өркөн өйдөр, бастыҥ бастар, түөрүйэлиир төбөлөр айбыт сүүһүнэн сокуоннарын   күрүөлэрин хааччаҕын, хаһаатын курдугу хаһан даҕаны ааҕан үөрэтэн, ырытан ырыҥалаан эрэйдэммэттэр эбит.

Ол тугуй? Бу кинилэр өрүүтүн айбыт Аҕа Халлаан уолаттара, кыргыттара, мэлдьи Мэҥэ Күөх Халлаан оҕолоро буолалларынан уонна бука бары бу күн анныгар, кини тапталыгар тэҥмит, аан дойду иннигэр аһаҕаспыт диэни өрүү тутуһаллара. Ол иһин кыраны даҕаны үллэстэллэриттэн үөрэллэрэ, чооруос тумсун саҕаны бэрсэллэрин умнубаттара, үгүһү үгүөрүтүк үҥүлүтэллэрин, элбэҕи эбии бэлэхтииллэрин даҕаны кэрэйбэттэрэ, үөрүҥньэҥ аһаҕас дууһалаахтара. Олохторун бары моһоллорун төбүрүөннээх түһүлгэнэн, ытык сүбэнэн быһаараллара. Ол иһин ытык хайалар ыырдарынан  ытталларыгар, баараҕай булгунньахтар бастарыгар даҕаны бары түмсэн тахсалларыгар, хас биирдии бэйэлэрин бары хом санааларын хомуйа тутаннар, киэр илгэннэр, ордук санаһыыларын ууратан, атаҕастаммыттарын аһарынан, кыынньыбыттарын кыйдаан, уордайбыттарын уҕарытан, сөҥөрдүбүттэрин сүөкээн, ыраастанан, арчыланан тахсаллара.  Ол иһин хоннохторун анныгар, быттыктарын быыһыгар  иитиэхтээбит, иччилээбит ыар хара таастара суох буоланнар, хаһан даҕаны бэйэ бэйэлэрин  түһэн биэрбэттэрэ. Бу маны билбит көрбүт киһи, кырдьар сааһыгар, өлөр үйэтигэр, аарыма кырдьаҕас, улуу бөһүлүөк аатыран дьонугар сэргэтигэр тиийэн маннык сэһэннээх буолбут. Түүрдэри саамай мөлтөх өрүттэринэн аахпыт; аан дойдуга аһаҕас буолууларын,  абыычайдарын уонна үгэстэрин уос номоҕо оҥостон илдьэ сылдьалларын.   Ол курдук Аҕа Халлаан туруору ситимнэрин быспат туһуттан, хас биирдии бэйэлэринэн үгэстэрин үөрэтээччи, абыычайдарын араҥаччылааччы, уста туора уйаларын  сэһэнин сэппэнин ситэрэр сээркээн сэһэнньит, хомоҕой хоһоонньут, ыллам ырыаһыт, туойуулаах тойуксут, оонньуулаах оһуохайдьыт, оҥоһуулаах олоҥхоһут буолаллар эбит хас биирдии бэйэлэрэ. Ханна даҕаны баар хаһаайын, дьиэлээх тойон, ыал аҕалара, тойон эрдэр ыраахтан ыйдаҥардан, үөһээттэн үөттэрэн, көрүүлэн барытын бу баардыы ырыта, ырыҥалыы, ытыс иһигэр курдук курдаттыы билэ-көрө сылдьаллара. Аан дойдуну барытын Аҕа Халлаан анныгар сытарынан сыаналыыллара, Сир  Ийэ эргийэр киининэн    Сүүмэр хайатын   ааҕаллара. Күнүһүн күн аннынан көрүүлэнэн көтөллөрө,түүнүн түһээн былыт быыһыттан Аан Ийэ Дойдуларын анаараллара.  Арай бастыҥ баатырдарын кытта быдан дьылларга бырастыылаһыыларыгар, эбэтэр ытык ийэлэрин аннараа дойдуга атааралларыгар эрэ уос номоҕо уурайара, хомус тыаһа тохтуура, айах алгыһа ньимийэрэ. Кутуллубут (курхааннарга) уурунуу суруктаах кэлэр кэмнэр кэнчээрилэригэр кэс тылларын, үйэлэргэ үөтүллүөхтээх  өйдөбүнньүк буолары олохсуталлара, мэҥэ таастары   туруораллара.

Өйдөөн көрдүгүт дуо, мөлтөх өрүттэрин, сатаҕай туруктарын? Онон бу улуу дьаалылары умсары уурарга, таҥнары таптайарга, үрдүлэриттэн үктүүргэ, быттарын баттыырга туох наада буоларын.  Биһиги сурук-бичик үйэтин үөдүтүөхтээхпит уонна аар харалтабытыгар (архивка)  хам хатаан иһиэхтээхпит. Кэм-кэрдии, сыл-хонук аастаҕын аайытын, сыыйа абыычайдарыттан  аралдьытан, атыннык атыҥыратан, тэйитэн, үгэстэрин үтүрүйэллэрин курдугу олохсутуохтаахпыт, бэйэбитигэр эрэ туһалааҕын, сөптөөҕүн хаалларыахтаахпыт. Уоннааҕытын  уларытан, тэлэритэн ону туһаныахтаахпыт.  Ол курдук аан бастакынан Айыҥа туһунан сымыйа сурахтаах үһүйээн номох суруллубута.  Оол…,үһүйээннээх үйэлэргэ, урукку охсуһуулаах сахтарга, былыргы былдьаһыктаах  кэмнэргэ, Күннэр (хууннар)  диэн норуоту өстөөхтөрө өһөөн туран өлөттөөбүттэригэр, кыырыктыйан турунан кырган кыдыйбыттарыттан, арай биир илиитэ уонна атаҕа суох уол оҕо хомус быыһыгар хорҕойон, саһан тыыннаах ордон хаалаахтаабыт. Бу оҕону тыһы бөрө булан бэйэтин үүтүнэн эмсэхтээн, аһатан улаатыннарбыт, устунан эр киһи гынан олорбут уонна тоҕус туйгун уолаттарын төрөппүттэрэ үһү диэн буолбут. (Аҕа Халлаан тоҕус уоллааҕа  “тоҕус планета” диэнин үтүктүбүттэр, олор үрүҥ көмүс утах утум суолунан түспүттэрэ диэннэригэр олоҕурбуттар). Ол  уоллаттарыттан биирдэстэриттэн, аан дойдуну аймыыр, айбардыыр  түүрдэр төрүттэнэн төрөөн үөскээн тэнийэн барбыттара үһү диэн буолбут. Ити курдук бастакы сымыйаны сыҥалаабыттара, үһүйээни үөдүппүттэрэ. Онон үөтүүлээх Үрдүк Мэҥэ Күөх Халлаан уолаттара баара суоҕа (күөх бөрө) уолаттара эрэ буолан хаалбыттара. Онтон Үрдүк Мэҥэ Күөх Халлаан анныгар баар, орто аан ийэ дойду барыта араҥас туойдаах, кыһыллыҥы  кырылас кумахтаах кытай омук тус бас билиитинэн билиниллибитэ. Оннооҕор ордук ыарахан балыырынан буолбута, ийэ бөрөнү кытта иссибитэ диэн хаһан даҕаны оҥоһуллубатах, түүллэригэр даҕаны баттаппатах ыар аньыыны сыбаабыттара уонна үһүйээни аар харалталарыгар кэмэ кэлиэр диэри кистээн саһыаран, сөҥөрдөн сытыарбыттара.  Хаһан даҕаны үтүмэн үйэлэр тухары аҕа ууһун иһинэн аймахтаһыыны айхаллаабатах, сэттэ хаан иһинэн уруурҕаһыы сэттээҕин иһин уруйдаабатах, ый-күн, халлаан сокуоннарынан олохсуппатах түүрдэргэ түүллэригэр даҕаны баттаппатах ыар аньыыларынан  ындыылаабыттара.

Түүр омуктар ийэ кыыллара аһыылаах удьуордаах буоларын  быһыытынан сэрии кыргыс кэмнэригэр эрэ Тат имнэрин (татем)  бэлиэтинэн бөрө буолара.  Оо, ама киниттэн ордук ордууларын, оҕолорун-урууларын, дьиэлэрин-уоттарын, сирдэрин дойдуларын бигэтик харабыллыыр  күүстээх уохтаах баар үһүө? Онтон иллээх, эйэлээх кэмнэргэ былаахтарыгар  тат имнэринэн Аҕа халлаан маанылаах табата буолара. Ити курдук кытайдар үөн өйдөөх өбүгэлэрин үөтүүтүн саһыара сытаннар, баттаан, үктээн, баһылаан  олорор түүрдэрин туһунан үөхсэллэрэ. Түһээннэрин төлүү төлүүлэр, араас үөҕэр үһүйээннэри үөскэтэллэрэ, хомуруйар номохтору айаллара, суоҕу сураҕы садьыгы тарҕаталлара. (Бу өрдөөҕү үһүйээн, онтон аҥаардас Чыҥыс Хаан сыдьааннарыгар кытайдар  141 сыл устата түһээн төлөөбүттэрэ –Мин эбиим).   Кинилэр араас киириилэрин-тахсыыларын барытын тулуйаллара, иннилэрин кэннилэрин илэ салыы сылдьаллара, ол курдук уһуннук дьаныардаахтык хаһан ыспыт сиэмэлэрэ силистээхтэрэ ситэрин, умнастаахтара уһуурун, туорахтаахтара торолуйарын, астаахтара астыйарын, отонноохторо буһарын кэтэһэллэр. Аан дойду үрдүнэн ааннара аһаҕас, санаалара сайаҕас, сүрэхтэрэ ууллаҕас түүрдэр, кинилэр аччыктаабыттарын аһатан, тоҥмуттарын ириэрэн, быстыбыттарын салҕаан, бүдүрүйбүттэрин көннөрөн, охтубуттарын өйөөн, тобуктаабыттарын туруортаан кэлбиттэрэ. Өссө кыргыттарын, балыстарын ойох биэртэлээн, онон астынан, дуоһуйан, көрүлээн- нарылаан олорбуттара.

Ол эрээри дьыл-хонук, кэм-кэрдии кэлэн аастаҕын аайытын, уос номохторо умнулла быһыытыйан умуллан уурайан истэҕин аайытын, сурукка суруллубут суоруллубат сокуонунан суолталанан испитэ. Бааһан оҥоһуллубут бааһынайдара бааһынайа өтөн, атын хаан буккуллубута баһыйан, балыйааччылары кытары батастаммыта, үөҕээччи үөрүйэхтэммит өттүгэр иэҕиллэн үҥүүлэнэн өргөстөммүтэ, кыраан кырыыламмыттары кытта кыттыспыта, таныйар таалламмыттардыын тайыыланан  тардыспыта.

Ити курдук Үрдүк Мэҥэ Күөх Халлаан үөтүүлээх уолаттара, барбах эрэ, баара суоҕа (күөх бөрө) аччык оҕолоро аатыраннар, аһыыр таҥнар туһуттан аан дойду үрдүнэн арҕам- тарҕан ыһыллыбыттара, аймахтарыттан арахсыбыттара, урууларыттан умнуллубуттара. Төрөөбүт төлөһүйбүт өбүгэ түөлбэлэрэ, ииппит үөскэппит ийэ сирдэрэ суох буолбуттара. Аһыыр ас айахтарыгар киирэрин туһуттан, ис иҥсэтинэн иҥэринии иһин, бэйэ бэйэлэрин кытта биликтэспиттэрэ, хабарҕаларын хайытыспыттара, тыыннарын иһиллэспиттэрэ. Ордук санаһыы олохтоохтук олохсуйбута, алдьархай аана алыстаахтык аһыллыбыта, өлүү үөлэһэ үөһээттэн өҥөйбүтэ. Уол аҕатын атарахсыппыта, улахаттарга убаастабыл уурайбыта, умнуллубута, өрдөөҕү өбүгэлэрин өйдөбүллэрэ өлбөөрбүтэ, аанньа ахтыбаттыы антах хайыспыттара. Бэйэлэрин симитиннэрэн сэнэммиттэрэ, үрдүлэригэр үтүөхтэри үүннэрбиттэрэ, бытыахтары баарыҕырдыбыттара. Атыттары алыс айхаллаан аатырдыбыттара, уратылары олус уруйдаан улаатыннарбыттара, туспаларга туус куоһур гынан үҥпүттэрэ, өстөөхтөрүн өрөгөйдөппүттэрэ. Өбүгэлэрин үөттэрдэхтэринэ даҕаны, абааһы лаадантан куотарыныы антах хайыһаллара, бууттара быстара. Аймах иһигэр аймахтаһыыны арбаабыттара, уруу иһигэр уруурҕаһыыны уруйдаабыттара, төрүөхтэрэ төннүбүтэ, кэнчээрилэрэ кэхтибитэ. Таҥара таҥыыта таҥнастыбыта, түөрэҕэ түҥнэстибитэ. Сир ийэ үрдүгэр баар саамай ыарахан аньыынан ааҕыллар дьиэ кэргэн иһинэн  кыраһыы (семейная карма – мин бэлиэтээһим) кыынньыбыта, таныйсыы таһымнаабыта, үөхсүү өрөгөйдөөбүтэ, өлөрсүү үөдүйбүтэ. Ити итэҕэллэрин сүтэрбиттэргэ, үөрүйэх быһыытынан үгэс курдук үөдүйбүтэ, олохсуйбута.  Бу курдук Үрдүк Мэҥэ Күөх Аҕа Халлаан уолаттарын сүтэрбитэ, сокуоннара суураллыбыттара, ыйаахтара ыһыллыбыттара. Быыллыйбыт кинигэҕэ бааллара эрэ баһыйбыта, баһылаабыта эбитэ үһү.

Уһун түүннэри кылгатар улуу олонхоһуттара уурайбыттара, сээркээн сэһэнньиттэрэ симэлийбиттэрэ, хомоҕой хоһоонньуттара хорҕойбуттара. Түлэ бараан дьиэлэригэр күлүгү көрдөрбөт көмүлүөк уота күөдьүйэрэ, боруҥуйга таһырдьа угуйар кутаа уота кытыастыбата, хараҥаҕа хомус тыаһа даҕаны хоҥкунаабат чуумпута, дүҥүр тыаһа кытта дүпсүйбэт чуҥкуга. Аан ийэ дайдыны арҕаһынан айаннаабыт, сир ийэ дойдуну сиксигинэн сиэлбит, орто туруу дойдуну оройунан ордууламмыт, тоҕус халлаан улаҕатыгар тиийтэлээбит, дириҥ далай байҕаллары түгэҕинэн тиҥсирийбит бэйэлэрэ билиҥҥи билиилэрэ диэхтээн (үһү-тамах) курдук эрэ ордон хаалаахтаабыт.  Аҕа Мэҥэ Күөх Халлаан билиилэриттэн сомсор кыахтаах уолаттарын кынаттара кыпчыллыбыт, дабыдаллара тостубут, куорсуннара кырыллыбыт, түүлэрэ үргэммит. Аҕа халлаан уолаттарын күүстэрэ көҕүрээбит, муударастара сүппүт, сур бөрө курдук сундулуһан суллугурас буолбуттар. Урукку улуу норуот уостан, умуллан умнуллубут, үрэллэн ыһыллыбыт, бытархайы быһаарсар эрэ буолан бытарыһан хаалбыттар.

(салгыыта бэчээттэниэ – “Кистэлэҥ күүс” сурунаал №1  2016 с.).

http://yakutiafuture.ru/2016/01/22/t%D2%AF%D2%AFrder-t%D2%AF%D2%A5k%D2%AFl%D2%AFj%D2%AF%D2%AFlere/ 

 КОММЕНТАРИИ 
#1

аата26.01.2016 08:00
А5а халлаан эбэтэр Мэнэ Халлаан диэн оннугар Танара диэн буолуохтаах этэ. То5о эмиэ оннук терют тылтан куттанна ааптар? Былыргы тююрдэр мэнэ таастарын тылларын уларыта сатыыр туохха наада?
#2

Тайыла26.01.2016 10:43
х..й заниматесь
#3

Тайыла26.01.2016 11:51
Саха тылын билбэт долбай суруйуута. “хомоҕой хоһоонньуттара хорҕойбуттара” — ханна хоргойбуттарый? “Симэлийбиттэрэ “, “уурайбыттара” диэн тылларга “ханна, ха0ан, хайдах” диэн ыйытыктар турбат буоллахтарына, “хоргойбуттар” диир буоллаххына хайаан да ханна хоргойбуттара этиллиэхтээх.
Тылы баьылаабатах киьи тылынан оонньуура сэрэхтээх буолбатах — просто смешно.
#4

сэмэн26.01.2016 12:23
туцкЭлийиилэрэ
#5

Хех26.01.2016 12:30
Тайыла сеуьу аны тюрколог-лингви ст буолбут дуу. Арааьа Муттуххай быьыылаах бу.
#6

Тайыла26.01.2016 13:40
Хех сеьу, маны билэргэ “тюрколог-лингв ист” буолар наадата суох. Эн бэйэн суруйан муннаммыккын дуу, хайдах дуу?
#7

петр слепцов27.01.2016 00:57
Таах олоруохтаа5ар
Тамалыйа тус
Ьи буолуохтаа5ар
Сэьэргээн ис
Кун бутэй
Таас дьулэй
Истибэтин да
Оттон
Уу харахтаах
Хара5а уоттаныа
Тэбэр тымырдаах
Хаана оонньуо
Саппа5ырбыт санаа
Сай5аныа
Хоммут уос
Хоннуо
Орообут уос
Оьуллуо
Тумсун тэьиннин
Айа5ын аьылыннын
Илин оттун
Ибири билбэтин
Кэлин оттун
Кэбирэ суох буоллун
Куттаммакка
Кутан ис
Саараабакка
Санаран ис…
#8

афанасий27.01.2016 22:28
Автор статьи известный общественный деятель из Республики Алтай Акай Кине.
Перевод статьи сделал якутский философ и целитель Айыы Сиэн. Оба люди неординарные.
Поэтому внимательно прочитайте содержание статьи.
#9

Дохсун28.01.2016 05:17
Бэрдин бэрт.
Хай5ыахха наада.
Ол эрээри кыратык ону-маны ыйан биэриэм этэ.
Олох уу сахалыы суруйа сатаабыт аата, то5о наЬаа хойуутук нууччалыы тыллары тутарый автор?
Ол сыыЬа.
Олох сахалыы барытын суруйуохха наада этэ.
Далан суруйарын курдук.
Кини эмиэ сахалыы суруйарыгар онон-манан нуучча тылыттан киирбит тыллары соччо ейдеебекке туттан кэбиспит этэ.
Ону ыйан биэрбиппэр, бастаан еЬургэнэн баран, кэлин кулэн кэбиспитэ уонна саха омук былыргытын сырдатар аныгыскы айымньыларыгар биир да нууччаттан киирбит тылы туттубата5а.
#10

олонхоьут30.01.2016 13:57
биир олонхо5о маннык баар этэ:

Сахалар кэлиэхтэрин иннинэ
Олорбуттар эбит бу сиргэ
Айа5ар себунэн мунурданар
От-мас аьылыктаах
Кетер-суурэр утэлээх
О5о курдук майгылаах
Орду5ур5аабат оноьуулаах
Ойуур дьоно…
Ураанхай сахалар кэллэ кэлээт
Бу дьону дьон диэбэккэ
Баар биистэри биир-биир тутан
Бутуннуу эьэн биспиттэр,
онтон…
Ыьыах ыспыттар, оьуокай тэппиттэр
Олохторун оностон олохсуйан кэбиспиттэр.

Ол эрээри…
Тыа дьиэлээх танарата суох ойуур дьоно
Туора маары ойбокко, куоппакка олоортор…
Елер елуу айа5ар кербутунэн бары кииртэр
уонна
Кун сириттэн курэнэр куннэригэр эппиттэр:
Ус уйэнэн утуруллэр буолаарын
Биэс уйэнэн бэркитин былдьатаарын
Сэттэ уйэнэн сэнэбилгэ тэбиллээрин
То5ус уйэнэн тобуктуу сылдьаарын…

#11

сельчанка07.02.2016 14:04
ойуур дьонун олоччу эспэтэх, эйэнэн сирдэригэр етен киирбит Нам эрэ улууьа баар киин оройуоннарга. былыр былыргыттан Намтан ейдеех утуелэрэ майгылаах бастыннара тахсар этилэр да5аны бэрт былдьаьан самнаран иьэллэрэ. Холобура, Мымах, Ньыка Намов… кэнники кэми а5ыннахха Илья Винокуров, Максим Аммосов…

Источник: old.aartyk.ru

Оставить комментарий    

Шиномонтаж Левша

СахаСтройПлит
Cтоматология 32
«Стоматология Все 32»