Саха норуотун кэрэ-чуор куоластаах ырыаһыта, маанылаах Кыталыктаах кырдалыгар улууспут ыһыаҕын алҕаан аһар алгысчыппыт.
«Сэтинньигэ биир нэдиэлэ Дьокуускайга тиийэн, В.А.Кондаков төрүттээбит СӨ Норуот эмчиттэрин Ассоциациятын Үрдүкү оскуолатын сэминээригэр үөрэннибит, — диир Илья Николаев. — Владимир Кондаков үөрэнээччитэ Алиса Михайловна Иннокентьева эмиэ бу ассоциацияҕа баар, миигин мэлдьи бэйэтигэр сыһыаран үөрэтэ-такайа сылдьар.
Сиэссийэбит бүтүүтүгэр, сэтинньи 28 к. Аар Айыы итэҕэлин Алгысчытын уонна бу Ассоциация чилиэнин дастабырыанньаларын туттардылар. Онон бу миэхэ үөрэхпэр биир улахан кирбии.
Мин 2022 сылтан үөрэнэбин. Мирнэйгэ олорор эрдэхпинэ, аан бастаан саас «Байанай күрэҕин» алҕаабытым, уһуйбут-такайбыт учууталларбыттан көҥүл ылан уот алгыһын оҥорбутум. Ол сыл Таас Үрэххэ ыһыахтарын Аар Айыы итэҕэлин канонунан алҕаабытым. Ол саҕаттан син-биир ыытар үлэбин отчуоттуубун, ситимин быспакка үөрэнэр тэрилтэм, учууталларым көҥүллэринэн, сүбэлэринэн үлэлии сылдьабын.
Дойдубар Ньурбаҕа көһөн кэлэн, 2023 сылтан Алиса Михайловна Иннокентьевалыын ыһыах алгыһын – ыһыах арыллыытын, күн көрсүүтүн алгыыр буолбуппут.
1696 с. М.А.Арсеньев воевода Айыы ойууттара итэҕэл үҥүүлэрин ыытар сиэрдэрин-туомнарын боппута. Дьэ ити түмүгэр Айыы итэҕэлэ 300-тэн тахса сыл устата умнуллубута, ыһыахха эҥин айыылыы сиэр-туом ыытыллыбат буолбута. Уот эрэ алгыһа ыытыллара.
Медицинскэй, психологическай наукалар дуоктардара, профессор, суруйааччы, СӨ норуот эмчиттэрин Ассоциациятын Бочуоттаах Бэрэсидьиэнэ, уһулуччулаах норуот эмчитэ, Аар Айыы итэҕэлин Улуу Айыы ойууна Владимир Алексеевич Кондаков умнуллубуту барытын саха норуотугар төнүннэрбитэ, сурукка бичиккэ киллэрэн үйэтиппитэ.
Аар Айыы итэҕэлэ диэн Хаҥаластартан кэлбит сүдү итэҕэл. Биһиги, ньурбалар, эмиэ хаҥаластартан төрүттээхпит. В.А.Кондаков сөргүппүт Аар Айыы итэҕэлин сиэрэ-туома сөпкө ыытылларын дьоҥҥо-сэргэҕэ тиэрдиэхтээхпит. Аар Айыы итэҕэлинэн сиэр-туом бастаан үөһээҥҥи Аар Айыыларга — Үрүҥ Аар Тойоҥҥо уонна Аар Айыыларга үҥүүттэн саҕаланар.
Учууталым Алиса Михайловна Иннокентьева Аар Айыы Улахан Алгысчыта.
Киһи үйэтин тухары үөрэнэр, онон салгыы үөрэнэн таһыммытын үрдэтэн иһиэхтээхпит».
***
Геннадий АНТОНОВ
Ситэри аатын уларытыагын …
Аат киhи ханнык итэ5эллээ5ин бэлиэтэ. Бу киhи православнай итэ5эллээхпин диэн суруна сылдьан Аар Айыы Итэ5эллээхпин диирэ, ону тар5атара итэ5эппэт. Аатын уларытта да орун оннугар туhэр.