Сиэйэ нэһилиэгин ытык кырдьаҕаһын Прокопий Степанов олорор дьиэтигэр Өрөгөйдөөх Кыайыы 75 сылынан «Манна дьоруой олорор» акция чэрчитинэн анал бэлиэни астылар

Сиэйэ нэһилиэгин ытык кырдьаҕаһа, Аҕа Дойдуну көмүскээбит уоттаах сэрии бэтэрээнэ 98 саастаах Прокопий Афанасьевич Степанов олорор дьиэтигэр Өрөгөйдөөх Кыайыы 75 сылынан «Манна дьоруой олорор» диэн Өрөспүүбүлүкэ үрдүнэн ыытыллар акция чэрчитинэн анал бэлиэни аһар үөрүүлээх тэрээһин ыытылынна.

Аҕа Дойду сэриитин уот-буурҕа холоругун аннынан 1941-1947 сылларга кыргыһыы саамай кутаатын ортотунан Европаны сатыы тилийэ хааман өстөөх арҕаҕар Берлин куоракка тиийэ, Берлин туһаайыытынан историяҕа биир сүрүн миэстэни ылар Висло-Одескай операция кыттыылааҕа, кини хорсун быһыытын «За взятие Берлина»,  «Германияны кыайыы иһин», «За отвагу», «За освобождение Праги» мэтээллэр туоһулууллар. 1945-47 сс. Австрия Вена куоратыгар 143 гвардейскай штурмовой авиаполк техник – механига, мастер авиавооружения, сержант званиялаах сэрии суолун саппыта.

1948 сылтан 1985 сылга диэри ойуур хаһаайыстыбатын харыстабылыгар үтүө суобастаахтык үлэлээбит үлэ ветерана. Оройуон хаһыатыгар 1950 сылтан суруйар уопсастыбаннай корреспондент, эдэрдэргэ наставник, норуодунай суут бэрэссэдээтэлэ, Сиэйэ нэһилиэгин, Сунтаар улууһун Бочуоттаах олохтооҕо. Прокопий Афанасьевич төрөөбүт дойдутугар эргиллэн кэлэн дьоһуннаах олоҕу олорон, дьиэ-уот тэринэн үс кыыс амарах аҕата, элбэх сиэн, хос сиэн тапталлаах эһээтэ буолбута.

Үөрүүлээх тэрээһиҥҥэ сэрии бэтэрээнин Сунтаар улууһун Аҕа баһылыга Анатолий Григорьев, улуус баһылыгын социальнай уонна имиджевай политикаҕа солбуйааччы Гаврил Еремеев, улуус бэтэрээннэрин Сэбиэтин бэрэссэдээтэлэ Афанасий Васильев, улуустааҕы ыччат бэлиитикэтин салаатын салайааччыта Евгений Данилов уонна сүрүн исписсэлиис Егор Андреев, нэһилиэк олохтоохторо эҕэрдэлээтилэр.

***

“Сунтаар улууһа (оройуона)” муниципальнай оройуон дьаһалтатын пресс-сулууспата