Мииринэйгэ үс күҥҥэ

Нэдиэлэ анараа өттүгэр АЛРОСА тэрилтэттэн “Эйигин Мииринэйгэ бэстибээлгэ ыҥырабыт”, — диэн эрийэ сырыттылар, тута бөлөххө киллэрдилэр.

Ити курдук бээтинсэҕэ Дьокуускайтан суруналыыстары илдьэн иһэр массыынаҕа аара суолтан олорсон 11 буолан эбиэт саҕана Мииринэйгэ баар буоллубут.

Биһигини тута көрсөн, эбиэттэтэн, бастакы булуллубут кимберлитовай трубка аатынан сүрэхтэммит “Зарница” гостиницаҕа олохтоотулар. Кыратык сынньана түһэн баран аҕыйах күҥҥэ кэлбит дьон буоларбыт быһыытынан куорат устун тахсан күүлэйдээтибит. Барыта тып-тап курдук архитектурнай оҥоһуулаах, олус дьоҕус уонна ыраас куорат устун хааман, салгын сиэн кэллибит уонна “Алмаз” диэн култуура киинигэр Мииринэйдээҕи балет оскуолатын 38-с сезонун арыйар түһүлгэтигэр ыалдьыттаатыбыт.
“Алмазы Якутии” балет оскуолатыгар сүүһүнэн оҕо дьарыктанар эбит. Соторутааҕыта аан дойду балетын сулуһа Андрис Лиепа бастыҥ хореографтарын илдьэ кэлэ сылдьыбытын киэн тутта кэпсээтилэр. Үөрэнээччилэр “Жизель” туруорууну көрдөрдүлэр. Сезон арыллыыта манна улахан бырааһынньык, билиэттэр атыыга тахсаат тута бүтэ тураллар эбит. Балет оскуолатыгар оҕолор ыйга 100 солк. эрэ төлөөн туран дьарыктаналлар.

Даҕатан эттэххэ, Мииринэйгэ оҕо сайдыытыгар улахан болҕомто уураллар эбит. Манна АЛРОСА улахан оруоллааҕын хас биирдии олохтоох бэлиэтиир. Ол курдук, спортивнай, культурнай куруһуоктар, бассейн, дьарыктанар саала барыта ыйга 100 солк. Онон Мииринэйгэ культурнай, спортивнай олох олус сайдыылааҕа тута харахха быраҕыллар.

Төрөппүттэр этэллэринэн манна хас биирдии оҕо дьарыктаах, мустар сирдээх. Кэнсиэртэригэр нууччалыы народнай таҥастаах саха, сахалыы таҥныбыт, илин кэбиһэр кэппит нуучча оҕолорун киһи сонурҕуу, үөрэ көрөр. Араас култуура буккуһан араас омук дьоно биир дьиэ кэргэн курдук тэринэн олороллор. Уулуссаҕа олохтоохтор эмиэ олус сайаҕастар, куораттарын туһунан үөрэ, киэн тутта кэпсииллэр.

Иккис күммүтүгэр АЛРОСА музейыгар, хайыһар, сноуборд базатыгар сырытыннардылар. “Алмазная долина” диэн ааттаах базаҕа араас сиртэн кэлэн сынньаналлар эбит. Оруобуна бу күн “Притяжение АЛРОСА” 1.600.000 фондалаах күрэх буола турар этэ. Киһи бэлиэтии көрөрө – манна дьиэ кэргэнинэн сылдьаллар уонна оҕолор отой кыра саастарыттан хайыһарынан, сноубордунан дьарыктаналлар. Бу көрүҥ улахан үбү-харчыны эрэйэр буолан Саха сиригэр Дьокуускайга, Алдаҥҥа уонна бу Мииринэйгэ эрэ баарын билэбит.

Салгыы бу базаҕа суруналыыстары кытары анаан көрсө АЛРОСА генеральнай дириэктэрэ Павел Маринычев кэлэ сырытта. Атах тэпсэн олорон хампаанньа социальнай эйгэҕэ ыытар үлэтин билиһиннэрдэ. Үлэһиттэр туох корпоративнай чэпчэтиинэн туһаналларын ньурбалар Накыыннаах буолан кэм билэбит. Онтон Мииринэйгэ тэрилтэ профсоюһа күүскэ үлэлиир буолан араас тэрээһиннэргэ, маҕаһыыннарга, спортивнай, культурнай эйгэҕэ барытыгар босхо буолбатах буоллаҕына, улахан чэпчэтиинэн туһаналлар. Мииринэй дьиэ кэргэн олохсуйан оҕону сайыннарарыгар саамай табыгастаах уонна куттала суох куорат диэн хаста даҕаны тоһоҕолоон бэлиэтээтилэр. Манна АЛРОСА улахан болҕомтотун уурар.

Оройуон, куорат салалтата уонна АЛРОСА биир ситимнээх үлэни тэрийэллэр, инньэ гынан хас биирдии үөскээбит кыһалҕаны, боппуруоһу ким даҕаны туора турбакка тэҥҥэ быһаараллар.
«Живые алмазы Якутии” диэн пааркаҕа сырытыннардылар. Куораттан 10-ча км тэйиччи турар. Бэлиэтээн этиэххэ наада, Мииринэйгэ тэрилтэ, маҕаһыын аатын баһыйар үгүһэ “алмаз” диэн тылы кытары ситимнээх эбит. Үөһээ суруллубуту таһынан “Кимберлит” муус дыбарыаһыгар, “Кристалл” бассейҥҥа сырыттыбыт.

Айылҕа пааркатыгар яктары, бизоннары, эһэлэри, сылгылары, павлиннары туталлар. Биһиги сылдьарыбытыгар төрөөбүтэ икки хоммут бизон оҕотун көрдөрдүлэр, ийэтэ маститтаан дьиэ иһигэр туталлар. Кини эдьиийэ, соторутааҕыта биир сааһын бэлиэтээбит бизон паарка устун дьону кытары тэҥҥэ күүлэйдэһэр. Кыыл пааркаҕа төрүүр-ууһуур буоллаҕына ол аата усулуобуйата сөп түбэһэр.

Бүтэһик күммүтүгэр Мииринэйгэ аатырбыт “Мир” карьерга, былырыын федеральнай бырагырааманан тутуллубут “Иирэлээх” сынньалаҥ базатыгар сырытыннардылар. “Мир” карьер хомолтолоохтук сабыллыбытын өйдүүбүт. Билигин даҕаны алмааһын саппааһа баар буолан дренажнай диэн ньыманан сотору кэминэн үлэлэтээри сылдьалларын кэпсээтилэр.

Маны таһынан эргэ аэропорт анныгар эмиэ алмаас саппааһын булбуттар эбит. Билигин саҥа баараҕай аэропорт тутулла турар. Үс өрүттээх үбүлээһин баһыйар улахан аҥаарын АЛРОСА уйуммут. Сууккаҕа 300 киһи ааһар аэропорт кэлэр сыл бүтүүтэ үлэҕэ киирээри бэлэмнэнэр. Биһиэхэ барытын иһиттэн-таһыттан көрдөрдүлэр. Аныгы тутууларын сыбаайата сир анныгар буолар эбит, тымныыны, итиини барытын хонтуруоллаан тоҥоруна турар анал систиэмэнэн оҥоһуллар өйдөөх тутуулар.

Бу күн олохтоохтору киин болуоссакка “Чернышевскай форель” диэн босхо миининэн күндүлээтилэр, кэнсиэр көрдөрдүлэр. Чернышевскай бөһүөлэккэ форель үөскэтэллэрин билэр буолуохтааххыт.

Сырыыбыт АЛРОСА “Горняк” санаторий-профилакторийыгар сырыынан түмүктэннэ. Салайааччынан СӨ доруобуйа харыстабылын миниистиринэн үлэлээбит Елена Афраимовна Борисова үлэлии сылдьар. Мииринэйгэ көһөн кэлэн үлэтин таһынан общественнай олоҕунан, айар үлэнэн дьарыктанарын, олорорго, үлэлииргэ Мииринэй олус табыгастаах куорат диэн кэпсээтэ. “Горняк” профилакторийга икки нэдиэлэ эмтэнэр 6-7 тыһ. солк буолар эбит. Манна массаж араас көрүҥүттэн саҕалаан эмтээх укуолга тиийэ барыта баар. Онон кэмиттэн кэмигэр доруобуйаны чөлүгэр түһэрэргэ абыраллаах эбит диэн бэлиэтии көрдүм.

Биллэн турар, 3 күн иһигэр оройуону толору көрөр-истэр кыаллыбат. Мин өйдөбүлбүнэн бу курдук Саха сирин суруналыыстарын ыҥыран пресс-тур оҥорбут бастакы холобур буолар. Этэн аһарбытым курдук, оройуон, куорат салалталара уонна сүрүн тирэх буолар АЛРОСА тэрилтэ кыттыгас бырайыактара олус үчүгэй өйдөбүлү хаалларда. Иккис тыыны ылынан саҥа олох хайысхатын суолугар үктэммит куорат отой атын өттүнэн арылынна.