Сунтаарга өрүс хаайыытын кэмигэр сэрэхтээх буолууга күнүнэн дьуһуурустуба олохтонуо
Муус устар 29 күнүгэр, Сунтаар улууһун баһылыктарын планерката.
Бүлүү Эбэ нөҥүө уонна хочо өттүнээҕи нэһилиэктэр баһылыктара улуус Аҕа баһылыгын Анатолий Григорьевы уонна туһааннаах тэрилтэлэр салайааччыларын, исписсэлиистэрин кытта куйаар ситиминэн быһа сибээскэ тахсан планерка ыыттылар. Сүбэ мунньахха халлаан сылыйан үрэхтэр уулара киириитигэр уонна өрүс хаайыытын кэмигэр сэрэхтээх буолууга күнүнэн дьуһуурустуба олохтоноро биллэрилиннэ, ону сэргэ күнү-дьылы кэтээн көрөөччүлэр арҕаа улуустарга кураан уонна куйаас дьылы сабаҕалаабыттарынан сибээстээн баһаартан сэрэхтээх буолууга бэлэмнэнии үлэтин ыыталлар.
Мунньахха доруобуйа харыстабылыгар, үөрэҕириигэ уонна тыа хаһаайыстыбатыгар туһаайыллыбыт боппуруостары торумнаатылар, биирдиилээн нэһилиэктэр баһылыктара туруорсуулары, этиилэри киллэрдилэр.
«Коронавируһу» утары охсуһуу миэрэлэрин тутуһар сыалтан Дойду Президиэнэ Владимир Путин ыам ыйын 1күнүттэн 11 күнүгэр диэри өрөбүл күннэринэн биллэрдэ. Бастатан туран, ол дьон доруобуйатын харыстыыр сыалтан ылыныллыбыт миэрэ. Онон быйылгы 1 Маайдааҕы бырааһынньык уонна атын суолталаах бырааһынньыктарбыт виртуальнай эйгэҕэ көстүлэр. Тэрилтэлэр социальнай ситимнэргэ уонна көрдөрөр-иһитиннэрэр ньымалар тэрийэр хамсааһыннарыгар эҕэрдэ телемарафоннары, кэнсиэрдэри ыытар былааннаахтар.
Оставить комментарий