Курс валют
$
73.97
0.92
83.84
0.99
Курс валют
Курс валют
$
73.97
0.92
83.84
0.99
Меню
Поиск по сайту

Ньурбаттан 30 км кэриҥэ аллараа муус харан турар

10.05.2020 13:57 2
Ньурбаттан 30 км кэриҥэ аллараа муус харан турар

Быйыл хаһааҥҥытааҕар даҕаны сааспыт эрдэ кэллэ. Ону кытта өрүстэр муустара эрдэлээн эһиннэ. Ньурба куорат аннынан Бүлүү мууһа бастаан ыам ыйын 4 күнүгэр кыралаан оннуттан хамсаабыта. Онон ыла харан тохтоон ыла-ыла, устубута хаһыс да хонуга буолла.


Ньурба улууһунааҕы Биир кэлим диспетчерскэй сулууспа салайааччыта Афанасий Кириллин иһитиннэрэринэн, муус Ньурба куораттан 30 км кэриҥэ аллараа Үрүҥ Хайа диэн сиргэ тиийэн харан турар. Ньурба куорат саамай намыһах сиригэр – Нюрбинка үрэх үрдүгэр олорор ыал дьиэлэрин уу ылла.

 
Ыам ыйын 8 күнүгэр уу ылар куттала чугаһаабытынан сибээстээн, түүн куорат дьаһалтата, куорат хаһаайыстыбатын көрөр-истэр сулууспа уонна Быыһыыр сулууспа Нюрбинка үрэх үрдүгэр Речников уулуссаҕа олорор ыаллары көһөрбүттэрэ. 1 ыал үлэлиир тэрилтэтин – техучаастак көмөтүнэн көспүтэ. 1 ыал көспөппүт диэн суругунан аккаастаан баран, түүн уу ылан барбытыгар бэйэлэрэ көспүттэрэ. Инньэ гынан 6 дьиэҕэ олорор 17 киһи, ол иһигэр 8 оҕо үрдүк сирдэргэ олорор аймахтарыгар көһөн олороллор.

Бэҕэһээ КЧС быһаарыытынан Үрүҥ Хайа анныгар квадрокоптеры көтүтэн муус харбыт сирин устан көрбүппүт, – диир Афанасий Кириллин. – Ол анараа Марха Бүлүүгэ түһэр сиригэр диэри ыраас, муус суох. – Бүгүн сарсыарда 8 ч. Ньурба куорат аннынан уу таһыма – 10 м 17 см тэҥнэстэ, суукка устата 60 см эбилиннэ. 12 ч. көрдөрүүтэ – 10 м 16 см. Ньурба к. уу таһымын кутталлаах кирбиитинэн 12 м 50 см ааҕыллар.
Балаһыанньа хонтуруолга тутуллар, РСЧС (“Единая государственная система предупреждения и ликвидации чрезвычайных ситуаций”) Ньурбатааҕы звенотун күүстэрин уонна сириэстибэлэрин муҥутуур бэлэмнээхтик тутан олоробут, РФ Ыксаллаах быһыыга-майгыга уонна гражданскай оборуонаҕа министиэристибэтин Саха Өрөспүүбүлүкэтигэр Управлениетын кытта мэлдьи сибээһи тутуһа, консультациялаһа олоробут. Кинилэр муус харыыта наһаа улахан буолбатаҕын, уутун аннынан ыыта турарын, онон күнүс халлаан сылыйдаҕына муус харыыта төлөрүйэрин кэтэһиллэрин биллэрбиттэрэ.

 
Бүгүн 11 чааска улуус баһылыга Алексей Иннокентьев ыксаллаах быһыыга-майгыга улуустааҕы хамыыһыйа сүбэ мунньаҕын ыытта. Туһааннаах салайааччылар информацияларын истэн баран, салгыы хайдах дьаһанар туһунан сүбэлэстилэр. Куорат баһылыгын солбуйааччыта Яков Замятин уу түспүтүн кэнниттэн Речников уулусса дьиэлэрин пушканан үрдэрэн куурдар үлэ барыахтааҕын, матырыйаалынай көмө оҥоһулларын туһунан эттэ. Сүбэ мунньах түмүгэр туһааннаах тэрилтэлэргэ сорудахтар тиэрдилиннилэр. Биир пуунунан боротокуолга СӨ Ыксаллаах быһыыга-майгыга хамыыһыйатыгар Ньурба к. эрдэ олохтоммут кутталлаах уу таһымын көрдөрүүтүгэр Речников уул. балаһыанньатын учуоттаан уларытыы киллэрэргэ этии быһыытынан киирдэ.


Бүгүн ЕДДС-ка, Быыһыыр сулууспаҕа уонна ГИМС-ка Нефтебаза таһыгар муус харыан сөптөөх сирин эмиэ көрөллөрүгэр сорудахтанна. Баһылык “Полярные авиалинии” филиалын дириэктэрэ Иван Ильиновка эрийэн бөртөлүөтүнэн көтөн көрөллөрүгэр көрдөстө.

Түмүк оннугар эттэххэ, Ньурба куорат саамай намыһах сиригэр – Нюрбинка үрэх үрдүгэр уруккута бириистэн бу иннинэ өр сылларга уу ылбатах сирэ диэн, эрдэ үлэһиттэригэр анаан дьиэлэри туттаран турар. Саас муус харыыта тахсан уу наһаа элбээтэҕинэ ууга бараллар. Бу дьиэлэр “Саахалланар туруктаах дьиэлэртэн көһөрүү” федеральнай бырагыраамаҕа киирэн, дьоно 2025 с. саҥа дьиэлэргэ көһөрүллүөхтээхтэр.


***

Геннадий Антонов,

Издание: «Газета «Ньурба-Огни Нюрбы»»

 

Обсуждение • 2

Добавить комментарий
  1. 123

    Халлаан хатаан турар, ол иһин харар. Уонна Ньурбаттан дальше кыһын турдаҕа дии. Бүлүүгэ холобур кыһыҥнылыы погода турар билигин.

  2. Павел

    Уэhээ-Булуугэ, Хорого — туох-туох буолар? Тугу билгэлииллэр?

Оставить комментарий